ព័ត៌មានជាតិ

សមត្ថកិច្ចឃាត់ខ្លួន ម្ចាស់ទំព័រហ្វេសប៊ុកឈ្មោះ «ស្លាបប៉ាកកាទេវរាជ» បានហើយ!

បានផុស

៣ years មុន

នៅ

ថ្ងៃអង្គារ ២៧ កក្កដា ២០២១

ដោយ

បុគ្គលឈ្មោះ ផុន កុលចំរើន ដែលជាម្ចាស់ទំព័រហ្វេសប៊ុកឈ្មោះ «ស្លាបប៉ាកកាទេវរាជ» ត្រូវបានកម្លាំងសមត្ថកិច្ចចាប់ខ្លួនកាលពីយប់ម្សិលមិញ ពាក់ព័ន្ធនឹងករណីញុះញង់ និងជេរប្រមាថថ្នាក់ដឹកនាំ។ បើតាមរបាយការណ៍បឋម បានឲ្យដឹងថា ម្ចាស់ទំព័រហ្វេសប៊ុកឈ្មោះ «ស្លាបប៉ាកកាទេវរាជ» ហើយមានឈ្មោះពិតថា ផុន កុលចំរើន ត្រូវបានកម្លាំងសមត្ថកិច្ចខេត្តព្រះវិហារឃាត់ខ្លួន កាលពីយប់ថ្ងៃទី២៦ ខែកក្កដា ឆ្នាំ២០២១ ពីបទញុះញង់ និងជេរប្រមាថប្រមុខរាជរដ្ឋាភិបាលកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុគ្គលឈ្មោះ ផុន កុលចំរើន បានរៀបរាប់ប្រាប់សមត្ថកិច្ចថា រូបគេបានគេចខ្លួនមកដល់ខេត្តព្រះវិហារ និងបានស្នាក់នៅផ្ទះឈ្មោះ មុំ កន រយៈពេល២ថ្ងៃ នៅភូមិស្វាយប៉ាត ឃុំរំដោះ ស្រុករវៀង ខេត្តព្រះវិហារ រហូតដល់ថ្ងៃទី២៦ ខែ កក្កដា ឆ្នាំ២០២១ ក៏ត្រូវសមត្ថកិច្ចចាប់ខ្លួនតែម្ដង។ តាមការពិនិត្យរបស់សមត្ថកិច្ច បានរកឃើញមានទូរស័ព្ទដៃ១ គ្រឿង និងប័ណ្ណចំនួន៤សន្លឹក នៅលើខ្លួនបុរសរូបនេះ។

បើតាមរបាយការណ៍ដដែល បានឲ្យដឹងទៀតថា ឈ្មោះ ផុន កុលចំរើន ភេទប្រុស មានអាយុ៣២ឆ្នាំ និងមានស្រុកកំណើតភូមិសៀមរាប សង្កាត់សៀមរាប ក្រុងសៀមរាប ខេត្តសៀមរាប។ ប៉ុន្តែទីលំនៅបច្ចុប្បន្ន នៅភូមិបឹងព្រាវ ឃុំបឹងព្រាវ ស្រុកស្រែអំបិល ខេត្តកោះកុ ហើយមុខរបរ ជាអ្នកនិពន្ធតាមអនឡាញ (ស្លាបប៉ាកាទេវរាជ)។

ថ្មីៗនេះមានបុគ្គលម្នាក់ ឈ្មោះ កុល ចំរើន អាយុ៣២ឆ្នាំ បានប្រើប្រាស់បណ្ដាញសង្គមឈ្មោះ ស្លាបប៉ាកកាទេវរាជ បានបង្ហោះសារ អមជាមួយវីដេអូ នៅថ្ងៃទី១៨ ខែកក្កដា ឆ្នាំ២០២១ថា «ការចាក់វ៉ាក់សាំងយកកាតគឺជាការរៀបគម្រោងប្លន់អាយុជីវិតប្រជាជនខ្មែរ របស់រដ្ឋាភិបាលលោក ហ៊ុន សែន សូមឧបត្ថម្ភម្នាក់១$ ដើម្បីជីវភាពរស់តាមរយ: ABA: 500 013 244»។ បន្ទាប់មកទៀត នៅថ្ងៃទី២០ ខែកក្កដា ឆ្នាំ២០២១ បុគ្គលដដែលនេះ បានសរសេរ និងបង្ហោះជាវីដេអូថា «ការចាក់វ៉ាក់សាំងចិន គឺជាការចាក់មេរោគចូលទៅក្នុងរាង្គកាយយើង។ សូមឧបត្ថម្ភ មកខ្ញុំបាទម្នាក់មួយដុល្លារ ក្នុងជីវភាពរស់នៅ ដើម្បីធ្វើការកសាងសន្តិភាព ជូនប្រទេសជាតិតាមរយ: Account ABA: 500 013 244 សូមអរគុណ»។

ភ្លាមៗលោកឧត្តមសេនីយ៍ទោ គង់ មនោ ស្នងការនគរបាល នៃស្នងការដ្ឋាននគរបាលខេត្តកោះកុង នៅថ្ងៃទី២១ ខែកក្កដា ឆ្នាំ២០២១ បានចេញមុខបដិសេធទាំងស្រុង ចំពោះការបង្ហោះសារ និងវីដេអូរបស់បុគ្គលឈ្មោះ ផុន កុលចំរើន ដែលជាម្ចាស់ទំព័រហ្វេសប៊ុក ឈ្មោះស្លាបប៉ាកាទេវរាជនេះ។ ជាមួយគ្នានេះ លោកស្នងការនគរបាលខេត្តកោះកុង ក៏បានអំពាវនាវដល់មហាជនទាំងអស់ មេត្តាកុំចាញ់បោក ការបង់ថវិកាចូលតាមសំណេររបស់បុគ្គល កុល ចំរើន នេះ។

ចំណែកលោក ទិត្យ សុផា មុខរបរបើកកន្លែងព្យាបាលជំងឺទូទៅ រស់នៅឃុំបឹងព្រាវ ស្រុកស្រែអំបិល ខេត្តកោះកុង ដែលជាឪពុកបង្កើតរបស់ឈ្មោះ ផុន កុលចំរើន បានចេញមុខសុំទោសសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសាធារណជនទូទៅ ដោយស្នើសុំក្តីយោគយល់អនុគ្រោះ ចំពោះទង្វើកូនរបស់ខ្លួន។ លោក ទិត្យ សុផា បាននិយាយថា មូលហេតុដែលកូនរបស់គាត់បង្ហោះយ៉ាងដូច្នេះ ក៏ព្រោះតែមានជំងឺសរសៃប្រសាទ សតិមិនគ្រប់គ្រាន់ ចាប់ពីតាំងប្រពន្ធរបស់លោកស្លាប់ចោលកាលពីឆ្នាំ២០១៥មកម្លេះ។

បុរសដែលជាឪពុកបង្កើតរបស់ម្ចាស់ហ្វេសប៊ុកស្លាបប៉ាកកាទេវរាជ បានអះអាងទៀតថា រូបលោកបាននាំកូនរបស់ខ្លួន ទៅពិនិត្យធ្វើរោគវិនិច្ឆ័យសុខភាព ហើយគ្រូពេទ្យបានបញ្ជាក់ថា កូនរបស់គាត់ពិតជាមានជំងឺសរសៃប្រសាទប្រាកដមែន តម្រូវឲ្យព្យាបាលនៅមន្ទីរ។ យ៉ាងណាក៏ដោយបុគ្គលឈ្មោះ ផុន កុលចំរើន ពុំបានរួមរស់នៅជាមួយក្រុមគ្រួសារឡើយ ព្រោះតែការមិនស្តាប់ការអប់រំណែនាំរបស់ឪពុក និងកិច្ចសន្យាលើទី១ ជាមួយសមត្ថកិច្ច ដោយរូបគេក៏សុំទៅធ្វើខ្ទមមួយ នៅកណ្តាលវាលស្រែ ដែលឆ្ងាយពីផ្ទះតែម្នាក់ឯង។

មហាជន ជាពិសេសអ្នកប្រើប្រាស់បណ្ដាញសង្គមហ្វេសប៊ុក បានបង្ហាញការភ្ញាក់ផ្អើល ក្រោយទទួលព័ត៌មានថា ម្ចាស់ទំព័រហ្វេសប៊ុកឈ្មោះ ស្លាបប៉ាកាទេវរាជ ដែលបញ្ចេញមតិរិះគន់ទាំងទទឹងទិសនោះ បែរជាចុងក្រោយឪពុករបស់បុគ្គលរូបនេះ ប្រាប់ថា កូនរបស់ខ្លួនមានជំងឺសរសៃប្រសាទ ដោយមានការបញ្ជាក់ពីមន្ទីរពេទ្យថែមទៀត។

លើសពីនេះទៀត មានមតិខ្លះលើកឡើងថា បើសិនជាបុគ្គលរូបនេះ មានសតិមិនគ្រប់មែន ហេតុអ្វីបានជាបុគ្គលរូបនេះ មើលទៅដូចជាជំនាញខាងប្រើប្រាស់បណ្ដាញសង្គម ហើយមើលក៏ទៅយុវជនរូបនេះ ក៏ប្រហែលជាមានជំនាញកាត់តវីដេអូថែមទៀត។ ម្យ៉ាងទៀត បើសិនជាមានជំងឺសរសៃប្រសាទមែន ហេតុអ្វីបានជាចេះឲ្យគេផ្ញើលុយ ចូលកុង ABA របស់ខ្លួនទៀត? ដូច្នេះអាជ្ញាធរមានសមត្ថកិច្ច មានកាតព្វកិច្ចត្រួតពិនិត្យច្បាស់លាស់ ចំពោះករណីនេះ កុំឲ្យប្រព្រឹត្តខុសហើយ សុំទោសរួចខ្លួន ឬបង្ហាញតែលិខិតបញ្ជាក់ពីមន្ទីរពេទ្យថា សតិមិនគ្រប់ហើយ រួចខ្លួននោះទេ៕ (ដោយ)៖ ឃួន សុភ័ក្រ