ព័ត៌មានជាតិ

ដំណាំស្រូវជាង២៥ម៉ឺនហិកតា ត្រូវបានដាំដុះរួចជាស្រេចនៅខេត្តបាត់ដំបង នាដើមឆ្នាំនេះ

បានផុស

៤ years មុន

នៅ

ថ្ងៃពុធ ២៨ កក្កដា ២០២១

ដោយ

មន្ត្រីនៃមន្ទីរកសិកម្មខេត្តបាត់ដំបងបានឲ្យដឹងថា ដោយស្ថានភាពទឹកភ្លៀងអំណោយផលពីដើមដៃកសិករនៅខេត្តបាត់ដំបង បន្តដាំដុះស្រូវវស្សាបានជាង២៥៥ ០០០ហិកតាហើយ ពោលគឺបានជាង ៧៧ភាគរយនៃផែនការដាំដុះស្រូវសរុប៣៣០ ០០០ហិកតា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ព្រំ វិត អនុប្រធានផែនការ គណនេយ្យនៃមន្ទីរកសិកម្មរុក្ខាប្រមាញ់និងនេសាទខេត្តបាត់ដំបងបានឲ្យដឹងថា បើប្រៀបធៀបនៃការដាំដុះស្រូវវស្សាឆ្នាំមុន គឺឆ្នាំនេះការដាំដុះស្រូវបានលឿននិងច្រើនជាង១ម៉ឺនហិកតា។ មន្ត្រីកសិកម្មខាងលើបញ្ជាក់ថាការដាំដុះស្រូវ បានលឿនជាងឆ្នាំទៅនេះ ដោយសារតែឆ្នាំនេះការដាំដុះស្រូវបានទៅតាមរដូវកាល គឺដោយសារតែភ្លៀងធ្លាក់ ចាប់ពីខែឧសភាមក ទើបតែមានការរអាក់រអួលខ្លះនៅខែកក្កដា។

បើតាម លោក ជឿន សុខុម ប្រធានការិយាល័យធារាសាស្ត្រនៃមន្ទីរធនធានទឹកបានឲ្យដឹងថា ការរអាក់រអួលនៃការ ធ្លាក់ភ្លៀង នៅខែកក្កដា បានធ្វើឲ្យស្រូវកសិករតំបន់ខ្លះ ដែលឆ្ងាយពីប្រព័ន្ធធារាសាស្ត្រ ពិសេស ផ្នែកខាងលើនៃស្រុកមួយចំនួនមានការខ្វះខាតទឹក។ ទោះបីយ៉ាងណាមន្ត្រីជំនាញបានលើកទឹកចិត្តកសិក រដែលដាំដុះស្រូវធ្ងន់នៅតំបន់ដែលឆ្ងាយពីប្រភពទឹក និង កំពុងខ្វះខាតទឹកនោះ កុំទាន់អស់សង្ឃឹម និង កុំទាន់ភ្ជួររាស់ចោលនាំឲ្យខាតបង់ ព្រោះស្រូវធ្ងន់វាធន់នឹងអាកាសធាតុណាស់។ កសិករត្រូវរង់ចាំខែ ក្រោយៗទៀត ទឹកភ្លៀងនឹងមានធ្លាក់ច្រើនគួរសម ដោយយោងតាមការព្យាករណ៍របស់ក្រសួងធនធានទឹកនាពេលកន្លងមក។

ព្រំវិត អនុប្រធានផែនការគណនេយ្យនៃមន្ទីរកសិកម្មបានមានប្រសាសន៍បន្ថែមថា កន្លងទៅមន្ទីរបាន ចុះអប់រំផ្សព្វផ្សាយដល់កសិករទៅតាមការណែនាំរបស់ក្រសួងកសិកម្មជាបន្តបន្ទាប់ដែរ ដោយសារតែ អាកាសធាតុបច្ចុប្បន្ន មានការប្រែប្រួល ហើយប្រព័ន្ធធារារាស្ត្ររបស់យើងមិនទាន់អាចគ្របដណ្តប់លើផ្ទៃដីធ្វើស្រែរបស់កសិករបានគ្រប់គ្រាន់នោះ។ កសិករដែលមានដីឆ្ងាយពីប្រព័ន្ធធារារាស្ត្រ ត្រូវប្តូរយុទ្ធសាស្ត្រនៃការដាំដុះស្រូវ ដោយកន្លែងដែលធ្លាប់ដាំស្រូវធ្ងន់ ដូរមកដាំស្រូវកណ្តាល កន្លែងដែលធ្លាប់ដាំដុះស្រូវកណ្តាល ដូរមកធ្វើស្រូវស្រាលវិញ ជាការល្អ។

មន្ត្រីជំនាញបានឲ្យដឹងថា បច្ចុប្បន្ននេះខេត្តបាត់ដំបងមានប្រព័ន្ធធារាស្ត្រអាចគ្របដណ្តប់លើដីស្រែរបស់កសិករបាន៦០ ទៅ ៧០ភាគរយហើយ ខណៈដែលប្រព័ន្ធធារាសាស្ត្រធំៗមួយចំនួនកំពុងបន្តអភិវឌ្ឍន៍ ដូចជាប្រព័ន្ធធារាសាស្ត្រទំនប់សាលាតាអន ស្ថិតនៅស្រុកឯកភ្នំ ប្រព័ន្ធធារារាស្ត្រទំនប់ដូនទ្រី ស្ថិតនៅក្បាលស្ទឹងមោង និង ទំនប់ស្ទាក់ទឹក នៅឃុំតាក្រី ស្រុកកំរៀងជាដើម ។ បើទំនប់ទាំងនេះធ្វើរួច អាចស្រោចស្រពផ្ទៃដីស្រែរបស់កសិកររាប់ម៉ឺនហិកតាបន្ថែមទៀត៕

អត្ថបទ៖ សោ និយមរ័ត្ន