ព័ត៌មានជាតិ

ខេត្តកណ្តាលរៀបចំក្រុមការងារព្យាបាលអ្នកជំងឺកូវីដ កម្រិតស្រាលនៅតាមផ្ទះ

បានផុស

៣ years មុន

នៅ

ថ្ងៃព្រហស្បតិ៍ ២៩ កក្កដា ២០២១

ដោយ

អាជ្ញាធរខេត្តកណ្តាល សហការជាមួយគណៈកម្មាការប្រយុទ្ធនឹងជំងឺកូវីដ-១៩ បានរៀបចំក្រុមការងារព្យាបាលអ្នកជំងឺកូវីដ-១៩ កម្រិតស្រាលនៅតាមផ្ទះទូទាំង១១ក្រុង-ស្រុកនៃខេត្តកណ្តាល។

ថ្លែងនៅក្នុងកិច្ចប្រជុំតាមប្រព័ន្ធ video Zoom នៅថ្ងៃទី២៩ ខែកក្កដា ឆ្នាំ២០២១ លោក គង់ សោភ័ណ្ឌ អភិបាលខេត្តកណ្តាល និងជាប្រធានគណៈកម្មាការខេត្តប្រយុទ្ធនឹងជំងឺកូវីដ-១៩ បានមានប្រសាសន៍ថា កិច្ចប្រជុំនាពេលនេះ ពិតជាមានសារៈសំខាន់ខ្លាំងណាស់ ដើម្បីធ្វើការតាមនីតិវិធី សម្រាប់គ្រប់គ្រង ថែទាំ និងព្យាបាលអ្នកជំងឺកូវីដ-១៩ នៅតាមផ្ទះដើម្បីឈានទៅដល់ការដំណើរការនាពេលខាងមុខនេះ ក្នុងគោលបំណង ផ្សព្វផ្សាយដល់កងកម្លាំងប្រដាប់អាវុធ មន្ទីរជំនាញពាក់ព័ន្ធ និងរដ្ឋបាលក្រុង-ស្រុក រៀបចំការអនុវត្តការគ្រប់គ្រង ថែទាំ ព្យាបាលអ្នកជំងឺកូវីដ-១៩ កម្រិតស្រាលនៅតាមផ្ទះ និងការងារគ្រប់គ្រងមណ្ឌលចត្តាឡីស័ក សម្រាប់ទទួលប្រជាពលករមកពីប្រទេសថៃ ដើម្បីបង្ការការឆ្លងរាលដាលមេរោគកូវីដ-១៩ បំប្លែងថ្មី (Delta) និងផ្សព្វផ្សាយ រៀបចំផែនការចាក់វ៉ាក់សាំងដល់កុមារអាយុពី១២ឆ្នាំ ដល់១៧ឆ្នាំអោយបានឆាប់រហ័ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអភិបាលខេត្ត បានបន្ថែមថា ប្រតិបត្តិការងារ ថែទាំ ព្យាបាលអ្នកជំងឺកូវីដ-១៩ តាមផ្ទះនេះ គឺធ្វើឱ្យបានជោគជ័យ ក្នុងនោះរដ្ឋបាលខេត្តបានត្រៀមរៀបចំរួចហើយលក្ខណៈតាមការណែនាំ រៀបចំក្រុមការងារប្រចាំការខេត្ត និងជាក្រុមតាមស្រុក-ក្រុង ក្រុមប្រចាំការ Hot line និងក្រុមគ្រូពេទ្យ។

លោកអភិបាលខេត្ត បានបញ្ជាក់ថា« ការថែទាំ ព្យាបាលតាមផ្ទះមានសារៈសំខាន់ណាស់ ក្នុងការជួយដោះស្រាយការលំបាករបស់អាជ្ញាធរទាំងការកាត់បន្ថយការចំណាយ តាមអនុសាសន៍ណែនាំយកចិត្តទុកដាក់ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា»។

លោកអភិបាលខេត្តបានសម្តែងការកោតសរសើរដល់អាជ្ញាធរក្រុង-ស្រុកដែលបានយកចិត្តទុកដាក់ស្តាប់ និងមានការប្តេជ្ញាខ្ពស់ក្នុងការរៀបចំក្រុមការងារព្យាបាលអ្នកជំងឺកូវីដ-១៩ កម្រិតស្រាលនៅតាមផ្ទះ នេះជាការចូលរួមចំណែកដ៏សំខាន់ ដើម្បីប្រសិទ្ធភាពការគ្រប់គ្រង និងទប់ស្កាត់នៃជំងឺកូវីដ-១៩ ក្នុងមូលដ្ឋាន ខេត្តរបស់យើង។

គួរបញ្ជាក់ថា ខេត្តកណ្តាលជាខេត្តទី៣ហើយបន្ទាប់ពីរាជធានីភ្នំពេញនិងខេត្តបន្ទាយមានជ័យ ដែលបានរៀបចំព្យាបាលអ្នកជំងឺកូវីដ-១៩ កម្រិតស្រាលនៅតាមផ្ទះ៕

អត្ថបទ ៖ សំអឿន

Related Topics:រដ្ឋបាលខេត្តកណ្ដាល