បេក្ខជនប្រឡងឌីប្លូមឆ្នាំនេះ មានការកើនឡើងជាងឆ្នាំមុន

​លោក រស់ សុវាចា អ្នកនាំពាក្យក្រសួងអប់រំយុវជន និងកីឡា បានមានប្រសា​សន៍នៅព្រឹកថ្ងៃទី២៤​ ខែ​វិច្ឆិកា​នេះ​ថា ការប្រឡងសញ្ញាបត្រមធ្យមសិក្សាបឋមភូមិ ឬឌីប្លូម ដែល​នឹងប្រព្រឹត្តិទៅនៅថ្ងៃទី៣០ ខែវិច្ឆិកា​ខាងមុខ ​មាន​សិស្ស​ចូលរួមប្រឡង ចំនួន១៨៦៤១៦នាក់ ក្នុងនោះ មាន​បេក្ខនារី ចំនួន៩៧៩៩១នាក់​កើន​ឡើងជាងឆ្នាំមុន។
​
ចំនួនបេក្ខជនប្រឡងឆ្នាំនេះ បើប្រៀបធៀបទៅនឹងឆ្នាំមុនឃើញថា មាន​ការកើនប្រមាណជាង១ពាន់នាក់​ខណៈឆ្នាំមុន មានបេក្ខជនចូលរួមប្រឡង ចំនួន១៨៥១ ៨៣នាក់ ក្នុងនោះនារី៩៧៥៩៤នាក់ មាន​១៦៨៤​មណ្ឌលចែកជា៧៤០៧បន្ទប់។

​អ្នកនាំពាក្យបានបន្តថា ​​​​ការប្រឡងឆ្នាំនេះ ក្រសួងនៅតែបន្តប្រគល់សិទ្ធិអំ ណាច និងការទទួល​ខុសត្រូវ​ទាំង ស្រុងជូនគ្រឹះស្ថានមធ្យមសិក្សាសាធារណៈ និង​ឯកជន​នីមួយៗ​ដែលមានអនុវិទ្យាល័យ ​និងវិទ្យាល័យ​ក្នុងការរៀបចំដំណើរការប្រឡង ដោយខ្លួនឯង ដោយរាប់ចាប់តាំងពីការរៀបចំប្រធានវិញ្ញាសា ដំណើរការ​សំណេរ កំណែ ស្រង់បូកពិន្ទុ និងការប្រកាសលទ្ធផលប្រឡងជាដើម។

លោកបានលើកឡើងថា ​ក្រសួង​បានតម្រូវឲ្យ​មន្ទីរអប់រំរាជធានី ខេត្ត ក៏ដូចជាថ្នាក់ដឹកនាំក្រសួង ចុះត្រួត​ពិនិត្យនៅ​តាមមណ្ឌលប្រឡងនីមួយៗផងដែរ ដើម្បីឲ្យដំណើរការប្រឡងកាន់តែមានគុណភាពថែមទៀត។

​បើតាមក្រសួងអប់រំ បានឲ្យដឹងថា ចំពោះមុខវិជ្ជាដែលត្រូវប្រឡង​មានចំនួន ១០មុខវិជ្ជា ត្រូវជា ១១ វិញ្ញា​សា រួមមាន៖ តែងសេចក្ដី ​គីមីវិទ្យា ​ផែនដី និងបរិស្ថានវិទ្យា ​រូបវិទ្យា ​ភូមិវិទ្យា សីលធម៌-ពលរដ្ឋវិជ្ជា​ គណិត​វិទ្យា ការសរសេរតាមអាន  ជីវវិទ្យា ប្រវត្តិវិទ្យា និង ភាសាបរទេស ៕

​​អត្ថបទ ៖ សំអឿន