ព័ត៌មានជាតិ

ខេត្តកោះកុង មាន ៥ ចំណុចលើសគេ សូម្បីកំពង់សោមក៏មិនអាចមកប្រជែងបានដែរ

បានផុស

៥ years មុន

នៅ

ថ្ងៃអង្គារ ២៤ វិច្ឆិកា ២០២០

ដោយ

កោះកុងដូចជាដែនកោះដាច់សង្វែងកណ្តាលសមុទ្រ ដែលគ្រប់គ្នាបានត្រឹមស្រមៃតែពិបាកធ្វើដំណើរទៅដល់កាលពី ២០ឆ្នាំមុន។ ក្រោយផ្លូវជាតិលេខ ៤៨ ត្រូវបានស្ថាបនារួច ធ្វើឲ្យខេត្តសមុទ្រមានព្រំដែនគោកតភ្ជាប់ជាមួយជាប់ថៃនេះ មានការអភិវឌ្ឍ និងក្លាយជាឋានសួគ៌អ្នកទេសចរពនេរចរចូលចិត្តធម្មជាតិ។ ខេត្តដ៏សំបូរធនធាននេះ មានធម្មជាតិដ៏ស្តុកស្តម្ភជាមួយសមុទ្រឈើយ៉ាងខៀវស្រងាត់ នៅម្ខាងមានភ្នំ នៅម្ខាងមានសមុទ្រ រួមទាំងមានកោះជាច្រើនមិនទាន់មានការបំពុល។

ខេត្តកោះកុង មាន ៥ ចំណុចពិសេស ដែលខេត្តជាច្រើនមិនអាចប្រជែងបាន។

ខេត្តមានឆ្នេរសមុទ្រវែងជាងគេ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមខេត្តជាប់ឆ្នេរសមុទ្រទាំងបួន (ព្រះសីហនុ កំពត កែប និងកោះកុង) ខេត្តកោះកុងមានឆ្នេរសមុទ្រប្រវែងជាង ២០៦ គីឡូម៉ែត្រ វែងជាងបណ្តាខេត្តតំបន់ឆ្នេរផ្សេងទៀត ខណៈប្រទេសកម្ពុជាមានឆ្នេរសមុទ្រសរុបប្រវែង ៤៤០ គីឡូម៉ែត្រ។

មានកោះធំជាងគេក្នុងដែនសមុទ្រកម្ពុជា

កោះកុងមានទំហំ ១០៣ គីឡូម៉ែត្រការ៉េ ជាកោះដ៏ធំជាងគេបំផុតក្នុងដែនសមុទ្រប្រទេសកម្ពុជា ដែលមានទីតាំងនៅខេត្តកោះកុង។ នៅលើកោះ មានទឹកជ្រោះ ១០ កន្លែង រួមទាំងឆ្នេរខ្សាច់ដ៏ស្រស់ស្អាតចំនួន ០៦ កន្លែង សម្រាប់ភ្ញៀវទៅកម្សាន្ត។

មានតំបន់អភិរក្សដែនជម្រកសត្វព្រៃធំលំដាប់លេខពីរនៅអាស៊ី

តំបន់អភិរក្សដែនជម្រកសត្វព្រៃពាមក្រសោបក្នុងខេត្តកោះកុង គ្រប់ដណ្តប់លើផ្ទៃដីទំហំ ៤.៦៧២,៦១ ហិកតា ជាប់លំដាប់ទីពីរនៅតំបន់អាស៊ី។ តំបន់ព្រៃកោងកាងធំជាងគេនៅក្នុងប្រទេសកម្ពុជា ក្នុងមួយឆ្នាំទាក់ទាញភ្ញៀវទេសចរទៅកម្សាន្តរាប់ម៉ឺននាក់។

មានវារីអគ្គិសនីច្រើនជាងគេ

វារីអគ្គិសនីចំនួន ៧ កន្លែងត្រូវបានសាងសង់ក្នុងប្រទេសកម្ពុជា ក្នុងនោះមាន ៣ កន្លែងស្ថិតនៅក្នុងខេត្តកោះកុងគឺវារីអគ្គិសនីស្ទឹងឫស្សីជ្រុំក្រោម (៣៣៨ មេហ្គាវ៉ាត់) វារីអគ្គិសនីគិរីរម្យ ៣ (១៨ មេហ្គាវ៉ាត់) និងវារីអគ្គិសនីស្ទឹងតាតៃ (កម្លាំង ២៤៦ មេហ្គាវ៉ាត់)។

ស្ពានឆ្លងសមុទ្រវែងជាងគេ

ស្ពានកោះកុង ដែលមានប្រវែង ១ ៩០០ ម៉ែត្រ បានដាក់ឲ្យប្រើប្រាស់ក្នុងឆ្នាំ ២០០២ តភ្ជាប់ទៅច្រកចាំយាមព្រំដែនខ្មែរថៃ ដែលជាប់ជាស្ពានឆ្លងសមុទ្រវែងជាងគេនៅក្នុងប្រទេសកម្ពុជា៕