បិទខ្ទប់ទីតាំងផ្សារចំនួន២៧​ក្នុងក្រុងស្រុកមួយចំនួន​ដែលកំពុងប្រឈមនឹងការ​រីករាលដាលជំងឺកូវីដ១៩

យ៉ាងហោចណាស់មានផ្សារចំនួន២៧ទីតាំងលើស្រុកមួយចំនួននៃខេត្តបាត់ដំបងត្រូវបានអាជ្ញាធរខេត្តសម្រេច​បិទខ្ទប់ជាបណ្តោះអាសន្ន ខណៈស្រុកទាំងនោះ កំពុងប្រឈមនិងការីករាលដាលនៃជំងឺ​កូវីដ​១៩ចូលក្នុងសហគមន៍។

តាមសេចក្តីសម្រេច ទីតាំងបិទខ្ទប់មានចំនួន២៧ទីតាំងស្ថិតក្នុងភូមិសាស្ត្រស្រុកក្រុងចំនួន៥ក្នុងខេត្តបាត់ដំបងចាប់ពីថ្ងៃទី០១ខែសីហាដល់ថ្ងៃទី១៤ ខែសីហា ឆ្នាំ២០២១ ដែលក្នុងនោះមាន ក្រុងបាត់ដំបងចំនួន​០៨ផ្សារ ស្រុកសង្កែចំនួន០៦ផ្សារ ស្រុកថ្មគោលចំនួន០២ ផ្សារស្រុកកំរៀងចំនួន០២ ផ្សារនិងស្រុកមោងឫស្សីចំនួន០៩ផ្សារ។

ពាក់ព័ន្ធនិងការសម្រេចបិទខ្ទប់លើទីតាំងផ្សារជាច្រើននេះបានធ្វើឡើងក្រោយមានកិច្ចប្រជុំបន្ទាន់មួយរបស់រដ្ឋបាលខេត្តកាលពីរសៀលថ្ងៃទី២៩ខែកក្កដាឆ្នាំ២០២១ដើម្បីជំរុញឱ្យអាជ្ញាធរមូលដ្ឋានក្នុងក្រុងស្រុកចំនួន០៤ដែលកំពុងប្រឈមនិងការឆ្លងរីករាលដាលនៃជម្ងឺកូវីដ១៩ដល់ក្នុងសហគមន៍ក្នុងចំណោមទាំង១៤ស្រុក/ក្រុងរបស់ខេត្តបាត់ដំបងពិនិត្យឲ្យបានម៉ត់ចត់លើទីតាំងមួយចំនួនដើម្បីធ្វើការបិទខ្ទប់ជាបណ្តោះអាសន្ន។

ស្របជាមួយគ្នានេះដែរលោកផេង.សិទ្ធីអភិបាលក្រុងបាត់ដំបងក៏បានបញ្ជាក់ឲ្យដឹងដែរថា:គោលដៅមួយចំនួនដែលកំពុងប្រឈមនិងការឆ្លងរីករាលដាលក្នុងក្រុងដែលស្ថិតនៅក្នុងសង្កាត់ចំនួន៣ក្នុងនោះគឺសង្កាត់​ទួលតាឯកសង្កាត់អូរចារនិងសង្កាត់ចំការសំរោងក៏ត្រូវបានរដ្ឋបាលខេត្តសម្រេចបិទខ្ទប់ជាបណ្តោះអាសន្នផងដែរ៕ ដោយៈ សៅ សារិទ្ធ