វ៉ាក់សាំង Johnson & Johnson ចាប់ផ្តើមចាក់ជូនប្រជាពលរដ្ឋខេត្តត្បូងឃ្មុំ

ត្បូងឃ្មុំ៖ យុទ្ធនាការ វ៉ាក់សាំងបង្ការជំងឺកូវីដ-១៩ ត្រូវបានបន្តទៀត គឺវ៉ាក់សាំងប្រភេទ ចនសុន ចនសុន ត្រូវបានផ្តល់ជូនប្រជាពលរដ្ឋនៅស្រុកចំនួនបីទៀតក្នុង ខេត្តត្បូងឃ្មុំ។ 

នៅព្រឹកថ្ងៃទី២ ខែសីហានេះ លោក ជាម ច័ន្ទ សោភ័ណ អភិបាលខេត្តត្បូងឃ្មុំ បានអញ្ជេីញបេីកយុទ្ធនាការចាក់វ៉ាក់សាំងបង្ការជំងឺកូវីដ-១៩ ប្រភេទ Johnson & Johnson របស់សហរដ្ឋអាមេរិក ចំនួន ៩៨,៤៨៥ ដូស ដែលបែងចែកជាទីតាំងសំខាន់ៗចំនួន៣២ ក្នុងនោះស្រុកត្បូងឃ្មុំ ចំនួន១១ទីតាំង ស្រុកពញាក្រែក ១០ទីតាំង និងស្រុុកអូរាំងឪ ១១ទីតាំង។ លោក ជាម ច័ន្ទ សោភ័ណ បានអំពាវនាវបន្ថែមទៀតដល់បងប្អូនប្រជាពលរដ្ឋ ត្រូវយកចិត្តទុកដាក់ និងបង្កេីនការប្រុងប្រយ័ត្នខ្ពស់ ព្រោះជម្ងឺកូវីដ-១៩ បំំប្លែងថ្មី ប្រភេទ ដែលតា បានមកដល់ស្រុកយេីងហេីយ ជាក់ស្ដែងនៅក្នុងភូមិសាស្ត្រខេត្តត្បូងឃ្មុំ មានអ្នកជំងឺឆ្លងចំនួន១២នាក់ ប៉ុន្តែបានជាសះស្បេីយអស់ចំនួន១០នាក់ និងកំពុងសម្រាកព្យាបាលជំងឺនៅមន្ទីរបន្តទៀត។

គួរបញ្ជាក់ថា ប្រជាពលរដ្ឋដែលបានមកទទួលវ៉ាក់សាំងពីរាជរដ្ឋាភិបាលកម្ពុជាទាំងពីរដូស សម្រាប់ខេត្ត ត្បូង ឃ្មុំ មានចំនួនជាង១ម៉ឺននាក់ និងដោយឡែកអ្នកកំពុងបានចាក់វ៉ាក់សាំងដូសទី១បានប្រមាណជិត១០ម៉ឺននាក់៕

អត្ថបទ និងរូបភាព៖ ហុង ម៉េងហៀ