លោក ស ថេត ៖ ការចុះអនុវត្តបម្រាមគោចរ សមត្ថកិច្ចជំនាញ តែងតែអនុវត្តជាប្រចាំ តាមវិធានសុខាភិបាល

លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានលើកឡើងថា ក្នុងនាមជាកងកម្លាំង នគរបាលនគរបាល​ជាតិ​ តែងតែលះបង់គ្រប់យ៉ាង ដើម្បីជាតិ​ និងប្រជាពលរដ្ឋ​ ទោះជាការបំពេញភារកិច្ចពេលថ្ងៃ មានការរវល់ច្រើនយ៉ាងណាក៏ដោយ​។ ក៏មិនភ្លេចការបំពេញភារកិច្ច បន្តនៅពេល​យប់ ដើម្បីអនុវត្តបម្រាមគោចរចាប់ពីម៉ោង​៩ និង០០នាទីយប់​ ដល់ម៉ោង​៣ និង០០នាទីទៀបភ្លឺ​ រយ:ពេល​១៤ថ្ងៃ​ ដោយគិតចាប់ពីថ្ងៃទី២៩​ ខែកក្កដា​ រហូតដល់ថ្ងៃទី១២​ ខែសីហា​ ឆ្នាំ២០២១​។

លោកឧត្តមសេនីយ៍ឯក ស ថេត បានថ្លែងថា ការអនុវត្តបម្រាមគោចរនេះ គឺក្នុងគោលបំណងដើម្បីបង្ការ​ និង​ទប់ស្កាត់ការឆ្លងរាលដាលវីរុសកូវីដ-១៩​ ជាពិសេសការពារអាយុជីវិត របស់បងប្អូនប្រជាពលរដ្ឋពីមេរោគឆ្លងដ៏កាចសាហាវនេះ​ ។ ក្នុងការចុះអនុវត្តកិច្ចការនេះ​ សមត្ថកិច្ចជំនាញតែងតែអនុវត្ត ជាប្រចាំតាមវិធានសុខាភិ​បាល​ ដូចជា៖ ការៀបចំទីកន្លែងឲ្យស្អាត​ ចងខ្សែសុវត្ថិភាព​រក្សាគម្លាត​ មានឧបករណ៍វាស់កំដៅ​ អាល់កុលលាងដៃ​ ជាពិសេសមន្ត្រីនគរបាល ដែលត្រួតពិនិត្យឯកសារ​អ្នកដំណើរ គឺស្លៀកពាក់ក្នុងឯកសណ្ឋានពេទ្យ ដើម្បីបង្ការការឆ្លងវីរុសនេះ​។ 

លោក ស្នងការនគរបាលរាជធានីភ្នំពេញ បានលើកឡើងបន្តថា «ពិតណាស់ទាំងក្រុមគ្រូពេទ្យ​ កងកម្លាំងគ្រប់ប្រភេទ​ ក៏ចង់មានពេលវេលា នៅផ្ទះជួបជុំបងប្អូនក្រុមគ្រួសារដែរ​ ប៉ុន្តែជាតួនាទី​ភារកិច្ច ដែលត្រូវបំពេញ។​ ដូច្នេះ​បងប្អូនប្រជាពលរដ្ឋ ដែលមានពេលសម្រាក នៅផ្ទះជួបជុំក្រុមគ្រួសារហើយ​ គួរតែនៅផ្ទះកុំចេញក្រៅបើមិនចាំបាច់​ ដោយចូលរួមគោរពអនុវត្ត នៅបម្រាមគោចរនេះ​ ដោយជួយគ្នាក្នុងការទប់ស្កាត់ ដើម្បីកុំឲ្យមានការឆ្លងរាតត្បាតកាន់តែធ្ងន់ធ្ងរ​ឡើងៗ»៕ (ដោយ)៖ ឃួន សុភ័ក្រ