ព័ត៌មានជាតិ

ក្រសួងសុខាភិបាលកំពុងរៀបចំសាងសង់ទីកន្លែងសម្រាប់ដាក់វ៉ាក់សាំងកូវីដ១៩

បានផុស

៤ years មុន

នៅ

ថ្ងៃអង្គារ ២៤ វិច្ឆិកា ២០២០

ដោយ

ភ្នំពេញ ៖ ក្រសួងសុខាភិបាលកំពុងសាងសង់ទីកន្លែងមួយដែលមានទីតាំងស្ថិតនៅក្នុងឃ្លាំងឱសថកណ្តាលចោមចៅសម្រាប់ដាក់វ៉ាក់សាំងកូវីដ១៩ ដែលកម្ពុជានឹងទទួលបាននាពេលខាងមុខនេះ។

ការរៀបចំសាងសង់កន្លែងដាក់វ៉ាក់សាំងរបស់ក្រសួងសុខាភិបាលនេះបានធ្វើឡើងបន្ទាប់ពីមានប្រទេសជាមិត្តរបស់កម្ពុជាមួយចំនួនបានសន្យាថា នឹងផ្តល់វ៉ាក់សាំងកូវីដ១៩ដល់កម្ពុជានៅពេលដែលវ៉ាក់សាំងទាំងនោះដាក់ឲ្យប្រើប្រាស់ជាផ្លូវការ។

លោកស្រី វេជ្ជបណ្ឌិត យក់ សម្បិត្តិ រដ្ឋលេខាធិការនិងជាអ្នកនាំពាក្យក្រសួងសុខាភិបាលបានមានប្រសាសន៍នៅរសៀលថ្ងៃទី២៤វិច្ឆិកានេះថា «កន្លែងដាក់វ៉ាក់សាំងកូវីដ១៩នេះយើងកំពុងសាងសង់នៅក្នុងឃ្លាំងឱសថកណ្តាលចោមចៅរបស់ក្រសួងសុខាភិបាលហើយសង្ឃឹមថានឹងធ្វើការសាងសង់បញ្ចប់ឲ្យរួចរាល់ក្នុងរយៈពេល៥ខែខាងមុខនេះដោយប្រើប្រាស់ប្រព័ន្ធសីតុណ្ហភាពក្រោមសូន្យអង្សាសេដើម្បីរក្សាវ៉ាក់សាំងឲ្យមានគុណភាពសុវត្តិភាពនិងប្រើប្រាស់បានយូរអង្វែង»។

លោកស្រីបានបន្តថា កម្ពុជានឹងទទួលយកវ៉ាក់សាំងបានលុះត្រាតែវ៉ាក់សាំងនោះមានគុណភាពនិងមានការទទួលស្គាល់ត្រឹមត្រូវពីអង្គការសុខភាពពិភពលោកហើយក្រុមចំណុចប្រជាជនដែលគ្រោងនឹងផ្តល់វ៉ាក់សាំងនេះមុនគេនោះក្រសួងនឹងសុំគោលការណ៍ពីប្រមុខរដ្ឋាភិបាលដើម្បីធ្វើការសម្រេច។

យ៉ាងណាក៏ដោយលោកស្រីមិនបានបញ្ជាក់ច្បាស់លាស់ទេថា តើនឹងទទួលបានវ៉ាក់សាំងកូវីដ១៩នេះនៅពេលណាឲ្យពិតប្រាកដទេនោះទេ ដោយលោកស្រីគ្រាន់តែលើកឡើងថា អាចទទួលបាននៅពាក់កណ្តាលឆ្នាំ២០២១ឬពេលវេលាណាមួយនៅក្នុងឆ្នាំ២០២១ វាអាស្រ័យទៅលើការកំណត់គុណភាពវ៉ាក់សាំងទទួលស្គាល់ដោយអង្គការសុខភាពពិភពលោកប៉ុណ្ណោះ៕
ដោយ ៖ សំអឿន

Related Topics: