មន្ត្រីរាជការ​ចូលនិវត្តន៍ ​៖ កម្ពុជា​បាន​ក្លាយ​ជាទី​តាំង​រណ្តៅ​គ្រាប់បែក​រាប់​លាន​គ្រាប់​របស់​អាមេរិក

ការ​លើកឡើង​របស់​ម​ន្ត្រី​រាជការ​ចូលនិវត្តន៍​ក្រសួងមហាផ្ទៃ គឺជា​ការឆ្លើយតប​លោក Patrick Murphy ឯកអគ្គរដ្ឋទូត​សហរដ្ឋអាមេរិក​ប្រចាំ​កម្ពុជា ក្រោយពី​ឯកអគ្គរដ្ឋទូត​បានចេញ​ផ្សាយ​សេចក្តី​ថ្លែងការណ៍​មួយ​ទាក់ទង​ករណី​បណ្តឹង​ទៅលើ​បុគ្គល​មួយ នៃ​ក្រុម​សង្គម​ស៊ីវិល និង​អ្នកគាំទ្រ​អតីត​គណបក្ស​សង្គ្រោះ​ជាតិ​។

តាមរយៈ​លិខិត​លិខិត​ចំហ ចុះ​ថ្ងៃទី​២៤ ខែវិច្ឆិកា ឆ្នាំ​២០២០ ក្រុមមន្ត្រី​រាជការ​ចូល​និវត្តន៍​ទាំងនោះ​លើកឡើងថា ខណៈ​ដែល​ប្រទេស​កម្ពុជា​កំពុង​ខិតខំ​កសាង ស្តារ និង​អភិវឌ្ឍ​ខ្លួន​ក្រោយ​ងើប​ពី​គំនរ​ផេះផង់ នៃ​របប​ប្រល័យពូជសាសន៍ និង​សង្គ្រាមស៊ីវិល ដែល​បាន​បំផ្លិចបំផ្លាញ​ប្រទេស​កម្ពុជា​ដល់​ចំណុចសូន្យ ជាពិសេស​ក្នុង​កាលៈទេសៈ ដែល​ប្រជាជន​កម្ពុជា​កំពុង​រស់នៅ​ក្នុង​សុខសន្តិភាព មាន​បុគ្គល​អ្នកនយោបាយ​ជ្រុលនិយម​មួយ ចំនួន​តូច​នៅ​សហរដ្ឋអាមេរិក ដែល​តាំងខ្លួន​ជា​អ្នកប្រជាធិបតេយ្យ ស្រលាញ់​សិទ្ធិមនុស្ស និង​ប្រជាធិបតេយ្យ បាននឹងកំពុង​ញុះញង់​មិន​ចេះ​ចប់​មិន​ចេះ​ហើយ ឲ្យ​មានការ​ដាក់ទណ្ឌកម្ម ឬ​ចាត់វិធានការ​រឹតបន្ដឹង​ផ្សេងៗ​មកលើ​ប្រទេស​កម្ពុជា​។

បើ​តាម​ក្រុម​មន្ត្រីរាជការ​ចូលនិវត្តន៍​ទាំងនោះ សច្ចធម៌​ប្រវត្តិសាស្ត្រ​ជាច្រើន​ទសវត្សរ៍​កន្លង​មកនេះ ដែល​បាន​បន្សល់ទុក​នូវ​ស្លាកស្នាម​ប្រវត្តិសាស្ត្រ ដ៏​ជូរចត់​រហូតមកដល់​បច្ចុប្បន្ន ស្តែង​ឲ្យ​ឃើញថា ក្រោយពី​ការបញ្ចប់​នូវ​របប​អាណានិគម ប្រជាជន​កម្ពុជា មាន​ពេលវេលា​តិចតួច​បំផុត​ដែល​បាន​រស់នៅក្នុង​សុខសន្តិភាព​ពេញលេញ​។ ប្រសិនបើ​យើង​ពិនិត្យមើល​ប្រវត្តិសាស្ត្រ​ដ៏​ជូរចត់​ខ្លោចផ្សា​របស់​កម្ពុជា យើង​នឹង​ឃើញថា រដ្ឋ​ដ៏​តូច និង​ទន់ខ្សោយ​មួយ​នេះ បាន​រងគ្រោះ​ឥតឈប់ឈរ ក្រោយ​រួច​ផុតពី​នឹម​អាណានិគមនិយម​បារាំង ហើយ​មិនយូរប៉ុន្មាន​ក៏បាន​បន្ត​ធ្លាក់​ទៅក្នុង​វិបត្តិ​សង្គ្រាម​ជា​បន្តបន្ទាប់ ដោយបាន​ក្លាយជា​ទីតាំង​នៃ​រណ្តៅ​គ្រាប់បែក​រាប់លាន​គ្រាប់​របស់​សហរដ្ឋអាមេរិក មុននឹង​បន្ត​ធ្លាក់​ទៅក្នុង​កណ្ដាប់ដៃ នៃ​របប​ប្រល័យពូជសាសន៍​ដ៏​យង់ឃ្នង​។

​ប្រជាពលរដ្ឋ​ទូទៅ​សុទ្ធតែ​បានដឹង​យ៉ាង​ច្បាស់​ថា ខណៈ​ដែល​ប្រទេស​កម្ពុជា កំពុង​ទទួលរង​ទុក្ខវេទនា យ៉ាង​ខ្លោចផ្សា បែរជា​របប​ប្រល័យពូជសាសន៍​មួយ​នេះ​ត្រូវ​បានទទួល​ការគាំទ្រ​យ៉ាង​ងងើល​ពី​ប្រទេសមួយ ចំនួន​ដែល​ស្រលាញ់​ប្រជាធិបតេយ្យ និង​សិទ្ធិមនុស្ស រួមទាំង​សហរដ្ឋអាមេរិក ឲ្យ​អង្គុយ​ក្នុង​អ​សនៈ​នៃ​អង្គការសហប្រជាជាតិ ធ្វើជា​តំណាង​ឲ្យ​ប្រជាពលរដ្ឋ​ដែល​របប​របស់​ខ្លួន​កាប់សម្លាប់​ទៅវិញ​។ មិន​ត្រឹមតែ​មិនបាន មើលឃើញ​នូវ​តថភាព​ប្រវត្តិសាស្ត្រ​ទាំងនេះ អ្នកនយោបាយ​មួយ​ក្តាប់​តូច​នៅ​សហរដ្ឋអាមេរិក បែរជាយក​លេស​ក្រោម​ហេតុផល​សិទ្ធិមនុស្ស និង​ប្រជាធិបតេយ្យ មក​ធ្វើការ​គាបសង្កត់​ក្នុង​មហិច្ឆតា​បំផ្លិចបំផ្លាញ សមិទ្ធផល​ជា​ផ្លែផ្កា នៃ​សន្តិភាព ដែល​រាជរដ្ឋាភិបាល​បាន​ខិតខំ​កសាង​ប្រទេស​ដ៏​កំសត់​មួយ​នេះ​ចេញពី​គំនរ​ផេះផង់ ទាំង​ពួកគេ​ដឹង​យ៉ាងច្បាស់​ថា គ្មាន​ប្រទេស​ណាមួយ​នៅលើ​សកលលោក រួម​ទាំង​នៅ​សហរដ្ឋអាមេរិក​ផង​ដែរ អនុវត្តបាន​ល្អឥតខ្ចោះ​លើ​វិស័យ​សិទ្ធិមនុស្ស​នោះទេ​។

ក្រុម​មន្ត្រី​រាជការ​ចូល​និវត្តន៍​លើកឡើង​ទៀតថា តាមពិត​រដ្ឋាភិបាល​ក​ម្ពុ​ជា​ទៅវិញ​ទេ ដែលជា​អ្នក​បានធ្វើ​ពលិកម្ម ក្នុង​បុព្វហេតុ​ស្តារ​ឡើងវិញ​នូវ​សិទ្ធិ និង​សេរីភាព ឲ្យ​ងើប​ចេញពី​រណ្តៅ​ប្រល័យពូជសាសន៍ រហូត​ទាមទារ​បានមក​វិញ​នូវ​សិទ្ធិ​ជា​មូលដ្ឋាន​ទាំងស្រុង​របស់​មនុស្ស រួមមាន សិទ្ធិ​រស់រានមានជីវិត សិទ្ធិ​ទទួល បានការ​អប់រំ និង​សិទ្ធិ​ជា​មូលដ្ឋាន​ដទៃទៀត​។ ផ្ទុយទៅវិញ អន្តរជាតិ​រួមទាំង​បុគ្គល​មួយ​ក្តាប់​តូច​នៅ​សហរដ្ឋអាមេរិក​នោះ គួរតែ​សាទរ​ចំពោះ​ការខិតខំ​ស្តារឡើងវិញ នូវ​ប្រទេស​ដ៏​អភ័ព្វ​មួយ​នេះ និង​ការខិតខំ​ត្រដររស់ ទាំង​លំបាក រហូត​បង្កើតបាន​សមិទ្ធ​ផល​សង្គម​ដូច​សព្វថ្ងៃ​។

ផ្អែក​តាម​តថភាព​នៃ​ប្រវត្តិសាស្ត្រ ក្រុមមន្ត្រី​រាជការ​ចូល​និវត្តន៍​មាន​ក្តីសង្ឃឹម​យ៉ាង​មុតមាំ​ថា លោក​ឯកអគ្គរដ្ឋទូត និង​អ្នកនយោបាយ​គ្រប់រូប​នៅ​សហរដ្ឋអាមេរិក នឹង​បន្ត​ចូលរួមចំណែក​លើកស្ទួយ​ទំនាក់ទំនង និង​កិច្ចសហប្រតិបត្តិការ​ទ្វេភាគី​នេះ​ឲ្យ​កាន់តែ​ប្រសើរឡើង ដើម្បី​បម្រើ​ដល់​ឧ​ត្ត​ម​ប្រយោជន៍​រួម​របស់​ប្រជាជន និង​ប្រទេស​ទាំងពីរ ហើយ​សូមកុំ​ទាញ​កម្ពុជា​ឲ្យ​ដើរ​ជាន់​ដាន​ប្រវត្តិសាស្ត្រ​ខ្លួនឯង ដូច​សហរដ្ឋអាមេរិក​ធ្លាប់​បានធ្វើ​មកលើ​កម្ពុជា​នៅក្នុង​ទសវត្សរ៍​៦០ រហូតដល់​ទសវត្សរ៍​៩០​។

សូម​បញ្ជាក់​ថា ថ្មីៗ​នេះ​លោក Patrick Murphy ឯកអគ្គរដ្ឋទូត​សហរដ្ឋអាមេរិក​ប្រចាំ​កម្ពុជា បានចេញ​ផ្សាយ​សេចក្តី​ថ្លែង​ការ​ណ៍​អះអាង​ថា សហរដ្ឋអាមេរិក​កំពុងធ្វើការ​តាមដាន​ដោយ​យកចិត្តទុកដាក់​លើ​ករណី​បណ្តឹង​តុលាការ ដែលមាន​ចំនួន​កាន់តែ​ច្រើនឡើង​ទៅលើ​សក​ម្ម​ជន​ក្នុងសង្គម​ស៊ីវិល អ្នកសារព័ត៌មាន និង​អ្នកគាំទ្រ​គណបក្ស​សង្គ្រោះ​ជាតិ​កម្ពុជា ដែល​លោក​បាន​ហៅថា ជា​គណបក្ស​ដែល​ធំជាងគេ​នៅ​កម្ពុជា​៕
ដោយ ៖ កោះ​កែវ