ត្រឹម៣ថ្ងៃ កុមារជាង១២ម៉ឺននាក់បានចាក់វ៉ាក់សាំងកូវីដ-១៩

ភ្នំពេញ៖ រយៈពេល៣ថ្ងៃមានកុមារ និងយុវជនអាយុចាប់ពី១២ឆ្នាំ ដល់ក្រោម១៨ឆ្នាំជាង១២ម៉ឺននាក់បានទទួលការចាក់វ៉ាកសាំងបង្ការកូវីដ-១៩ ដែលស្មើនឹងជាង៦% ធៀបនឹងគោលដៅជិត២លាននាក់។

យោងតាមរបាយការណ៍របស់គណៈកម្មការចំពោះកិច្ចចាក់វ៉ាក់សាំងក្នុងក្របខណ្ឌទូទាំងប្រទេសបានឱ្យដឹងថា ចាប់ពីថ្ងៃទី០១ រហូតដល់ថ្ងៃទី០៣ ខែសីហា ឆ្នាំ២០២១ ក្រុមគ្រូពេទ្យបានចាក់វ៉ាក់សាំងដល់កុមារ និងយុវជនអាយុចាប់ពី១២ឆ្នាំ ដល់ក្រោម១៨ឆ្នាំ បានចំនួន ១២៤,១៥៧នាក់ ស្មើនឹង ៦,៣១% ធៀបនឹងចំនួនកុមារគោលដៅ ១,៩៦៦,៩៣១នាក់។

ចំណែកការចាក់វ៉ាក់សាំងប្រជាពលរដ្ឋចាប់ពីអាយុ១៨ឆ្នាំឡើងទៅនៅទូទាំងប្រទេសវិញ ចាប់ពីថ្ងៃទី១០ ខែកម្ភៈ រហូតមកដល់ថ្ងៃទី០៣ សីហា ក្រុមគ្រូពេទ្យចាក់បានចំនួន ៧,៤៨៣,៦៨៧នាក់ ស្មើនឹង ៧៤,៨៤% ធៀបជាមួយចំនួនប្រជាជនគោលដៅ ១០លាននាក់។

គួរបញ្ជាក់ថា រដ្ឋាភិបាលបានបើកយុទ្ធនាការចាក់វ៉ាក់សាំងការពារជំងឺកូវីដ-១៩ ដល់កុមារ និងយុវជនអាយុចាប់ពី១២ឆ្នាំ ដល់ក្រោម១៨ឆ្នាំ ចាប់ពីថ្ងៃទី០១ ខែសីហា ឆ្នាំ២០២១ នៅតាមរាជធានីខេត្តចំនួន៤រួមមានរាជធានីភ្នំពេញ ខេត្តកណ្តាល ក្រុងព្រះសីហនុ និងខេត្តកោះកុង៕

អត្ថបទ៖ សំអឿន