ទីលានចាក់សំរាម ទំហំជាង១០ ហិកតា នៅខេត្តកំពង់ឆ្នាំង នឹងបញ្ចប់ការសាងសង់ នៅដំណាច់ឆ្នាំនេះ

(កំពង់ឆ្នាំង)៖ អាជ្ញាធរខេត្តកំពង់ឆ្នាំង បានអះអាងថា គម្រោងសាងសង់ទីលាន ចាក់សំរាម ដែលមានទំហំជាង ១០ហិកតា ស្ថិតនៅក្នុងភូមិត្រពាំងស្បូវ ឃុំស្រែថ្មី ស្រុករលាប្អៀរ ខេត្តកំពង់ឆ្នាំង គ្រោងនឹងសាងសង់រួចរាល់ នៅដំណាច់ឆ្នាំ២០២១ ខាងមុខនេះ។

ថ្លែងក្នុងឱកាស ដឹកនាំក្រុមការងារ ចុះពិនិត្យមើល ដំណើរការសាងសង់ ទីលានចាក់សំរាម របស់ក្រុងកំពង់ឆ្នាំង លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង​ បានមានប្រសាសន៍ថា គម្រោងសាងសង់ទីលាន ចាក់សំរាមដែលសង់លើផ្ទៃដីប្រមាណ ជាង១០ហិកតានេះ គឺជាគម្រោងកម្ចី របស់ធនាគារអភិវឌ្ឍន៍អាស៊ី (ADB) ដែលបានចាប់ផ្ដើមសាងសង់ កាលពីខែមេសា ឆ្នាំ២០២០ ហើយគ្រោងនឹងបញ្ចប់ នៅដំណាច់ឆ្នាំ២០២១ នេះ។

បើតាមលោកអភិបាលខេត្ត គម្រោងទាំងមូលរួមមាន កន្លែងចាក់សំរាម ស្រះសម្អាតទឹកកខ្វក់ចេញពីសំរាម ស្រះត្រងទឹកកខ្វក់ អគាររដ្ឋបាល អណ្ដូងសម្រាប់ត្រួតពិនិត្យគុណភាពទឹក ផ្លូវចូលទីលានកប់សំរាម បន្ទប់ម៉ាស៊ីនភ្លើង ប្រព័ន្ធលូរបង្ហូរទឹកភ្លៀង របងព័ទ្ធជុំវិញទីលានចាក់សំរាម និងហេដ្ឋារចនាសម្ព័ន្ធមួយចំនួនទៀត។

លោកអភិបាលខេត្ត បានថ្លែងអំណរគុណ យ៉ាងជ្រាលជ្រៅបំផុត ជូនចំពោះរាជរដ្ឋាភិបាលកម្ពុជា និងធនាគារអភិវឌ្ឍន៍អាស៊ី ដែលបានផ្ដល់គម្រោង ដ៏មានសារៈសំខាន់នេះ ដល់ខេត្តកំពង់ឆ្នាំង ដើម្បីលើកកម្ពស់សោ ភ័ណ្ឌភាព អនាម័យ បរិស្ថានទីក្រុង ទីប្រជុំជន ធានាបានសុខុមាលភាពល្អប្រសើរ ជូនប្រជាពលរដ្ឋ និងឆ្លើយ តបទៅ នឹងតម្រូវការចាំបាច់ប្រចាំថ្ងៃ របស់ប្រជាពលរដ្ឋ៕ (ដោយ)៖ សំអឿន