ព័ត៌មានជាតិ

ប្រជាពលរដ្ឋប្រទះឃើញគ្រាប់មីនធុន៤៧និងគ្រាប់ដេការធុន១០៧ នៅលើដីស្រែរបស់គាត់

បានផុស

៤ years មុន

នៅ

ថ្ងៃពុធ ៤ សីហា ២០២១

ដោយ

បាត់ដំបង ៖ គ្រាប់យុទ្ធភណ្ឌ ដែលបន្សល់ទុកតាំងពីសម័យសង្គ្រាមស៊ីវីល២ប្រភេទខុសៗគ្នាចំនួន៤គ្រាប់ត្រូវបានប្រជាពលរដ្ឋជាកសិករម្នាក់ប្រទះឃើញនៅលើដីស្រែរបស់ខ្លួននៅចំណុចវាលស្រែស្ថិតនៅភូមិមុខរាហ៍២ ឃុំមុខរាហ៍ ស្រុករុក្ខគិរី ខេត្តបាត់ដំបង។

សមត្ថកិច្ចប្រាប់ថា កសិករមានឈ្មោះមុំ សុខុម ភេទប្រុស អាយុ៥៧ឆ្នាំ រស់នៅភូមិឃុំខាងលើដែលបានប្រទះឃើញគ្រាប់យុទ្ធភណ្ឌទាំង២ប្រភេទខាងលើ នៅព្រឹកថ្ងៃទី០៤ ខែសីហា ឆ្នាំ២០២១ ខណៈដែលប្រជាកសិកររូបនេះដើរមើលស្រូវរបស់ខ្លួនដែលកំពុងប្រឈមខ្វះទឹកក៏ប្រទះឃើញតែម្តងសង្ស័យមានមនុស្សមិនស្គាល់អត្តសញ្ញាណយកមកដាក់ប្លុងចោល។

សមត្ថកិច្ចបន្តថា ក្រោយទទួលបានសេចក្តីរាយការណ៍ពីកសិករម្នាក់ខាងលើភ្លាមៗនោះសមត្ថកិច្ចជំនាញនៃអធិការស្រុកបានសហការជាមួយក្រុមការងារCMAKចុះទៅពិនិត្យដល់ទីតាំងក៏បានឃើញគ្រាប់យុទ្ធភណ្ឌចំនួន០៤គ្រាប់ដែលមាន២ប្រភេទខុសៗគ្នាដូចសេចក្តីរាយការណ៍ពីកសិករម្នាក់ខាងលើពិតប្រាកដមែន។

ក្រោយជំនាញបានពិនិត្យទៅលើគ្រាប់យុទ្ធភណ្ឌទាំង៤គ្រាប់ ក្នុងនោះមានមីនកង្កែប៤៧ចំនួន០៣គ្រាប់ផលិតនៅប្រទេសចិននៅមានគុណភាពមួយរយភាគរយនិងគ្រាប់ដេកា១០៧ចំនួន០១គ្រាប់ផលិតនៅប្រទេសសូវៀតនៅមានគុណភាព៧០ភាគរយដែលអាចបង្កឲ្យមនុស្សរងគ្រោះបាន។

បច្ចុប្បន្នគ្រាប់យុទ្ធភណ្ឌទាំង៤គ្រាប់ខាងលើ សមត្ថកិច្ចបានប្រគល់ឲ្យទៅក្រុមការងារCMAKយកទៅរក្សាទុកដើម្បីកម្ទេចចោលតាមជំនាញនិងបច្ចេកទេសនៅពេលក្រោយ៕

ដោយ ៖ សៅ សារិទ្ធ

Related Topics:គ្រាប់មីន