សម្ដេចតេជោ ហ៊ុន សែន អំពាវ​នាវថ្នាក់ដឹកនាំ រាជរដ្ឋាភិបាល ចូលរួមចំណែក ជាមួយអាជ្ញាធរ ដើម្បីគ្រប់គ្រង ស្ថានភាពកូវីដ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវដល់ ថ្នាក់ដឹកនាំរាជរដ្ឋាភិបាល ដែលចុះជួយតាម​បណ្ដា​ខេត្តនានា សូមចូលរួមចំណែក ជួយឧបត្ថម្ភជាថវិកា ឬសម្ភារៈ និងមើលការខុសត្រូវ នៅក្នុងខេត្តរបស់ខ្លួនចុះ​ជួយ ដើម្បីគ្រប់គ្រងស្ថានភាព នៃការរីករាលដាលនៃជំងឺកូវីដ-១៩ ជាពិសេសករណីពលករខ្មែរ ត្រឡប់មកពី​ប្រទេ​សថៃ។ ការអំពាវនាវយ៉ាងដូច្នេះ គ្រាដែលសម្ដេចតេជោនាយករដ្ឋមន្ត្រី បាន​ដាក់​វិធានការ​ជា​បន្ទាន់ ​ដល់​អាជ្ញាធរ​រាជធានី-ខេត្ត​ ត្រូវ​រៀបចំ​មណ្ឌលចត្តាឡីស័ក និងមណ្ឌលព្យាបាល ដើម្បីទទួលយកពលករខ្មែរ ដែលវិលត្រឡប់មកពីប្រទេសថៃ។

យោងតាមសារសំឡេងពិសេស ផ្ញើជូនជនរួមជាតិ នៅល្ងាចថ្ងៃទី៦ ខែសីហានេះ សម្ដេចតេជោ ហ៊ុន សែន បានថ្លែងដោយអំពាវនាវថា «ហើយសូមអំពាវនាវ ដល់សម្ដេច ឯកឧត្ដម លោកជំទាវ អ្នកឧកញ៉ា ដែលជាមន្ត្រីទទួល ចុះជួយ​ចំពោះខេត្ត​-រាជធានី ជួយឧបត្ថម្ភ និងមើលការខុសត្រូវ ទៅលើបញ្ហានេះ រួមចំណែកជា​មួយខេត្ត ដើម្បីគ្រប់គ្រង​ស្ថា​ន​ភាពកូវីដ-១៩ តាមរយៈអ្នកដែលមាន នៅខាងក្នុងហើយស្រាច និងអ្នកដែលបានទើប វិលត្រឡប់មកពីព្រះរាជា​ណាចក្រ​ថៃ»។

ត្រង់ចំណុចសម្ដេចតេជោ ហ៊ុន សែន បានសង្កត់ធ្ងន់ទៀតថា សូមឲ្យថ្នាក់ដឹកនាំរាជរដ្ឋាភិបាល ដែលចុះជួយ​រាជ​ធា​នី​-ខេត្តនីមួយ ជួយមើលការខុសត្រូវ និងរួមចំណែកក្នុងការផ្គត់ផ្គង់ថវិកា សម្ភារៈចាំបាច់នានា ដើម្បី​ជួយដល់អាជ្ញា​ធររាជធានី-ខេត្ត​ បន្ថែមពីលើថវិកាជាតិ ដែលរាជរដ្ឋាភិបាលបានផ្ដល់ជូន៕ (ដោយ)៖ ឃួន សុភ័ក្រ