កម្ពុជាត្រៀមរថយន្តជាង២០០គ្រឿងដឹកពលករធ្វើចត្តាឡីស័ក៧ថ្ងៃពីព្រំដែនមកខេត្តខាងក្នុងវិញ

សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅរសៀលថ្ងៃទី០៦ ខែសីហា ឆ្នាំ២០២១នេះ បានផ្ញើសារពិសេសជូនជនរួមជាតិ ពាក់ព័ន្ធការធ្វើចត្តាឡីស័ករបស់បងប្អូនពលករខ្មែរត្រឡប់មកពីប្រទេសថៃ ដោយឱ្យអង្គភាពដឹកជញ្ជូនឡានជាង២០០គ្រឿងដើម្បីដឹកពលករធ្វើចត្តាឡីស័ក៧ថ្ងៃពីព្រំដែនមកខេត្តខាងក្នុងវិញ។

សម្ដេចតេជោមានប្រសាសន៍ថា សុំឱ្យកងអង្គភាពដឹកជញ្ជូន​របស់កងយុទ្ធពលខេមរភូមិន្ទ ហើយត្រូវបញ្ជូនរថយន្តដែលបានត្រៀមបន្ថែមជាង២០០គ្រឿង ដឹកជញ្ជូនបងប្អូនដែល​បានធ្វើចត្តាឡីស័កតាមព្រំដែន៧ថ្ងៃហើយនោះ ចូលមកខេត្តរាជធានី​ ដើម្បីធ្វើចត្តាឡីស័កនៅខាងក្នុង។

សម្ដេចតេជោបានបញ្ជាក់ថា ធ្វើយ៉ាងនេះ ដើម្បីទុកមណ្ឌលចត្តាឡីស័កនៅព្រំដែនជូនដល់ប្រជាពលរដ្ឋដែលនៅត្រើយម្ខាងព្រំដែននៃទឹកដីថៃ ចូលមកធ្វើចត្តាឡីស័កនៅកម្ពុជាវិញ។

សម្ដេចតេជោមានប្រសាសន៍ថា៖ “ក្នុងករណីដែលបងប្អូនចូលលើសហួសកំណត់ ត្រូវ​​អនុវត្តរបៀប មកដល់ធ្វើតេស្តភ្លាម ហើយដឹកជញ្ជូនបងប្អូនទាំងនោះចូលមកធ្វើចត្តាឡីស័កនៅខេត្តខាងក្នុងតែម្ដង”។

គួរបញ្ជាក់ថា មកដល់ពេលនេះ មានប្រជាពលរដ្ឋ និងពលករកម្ពុជា វិលត្រឡប់ពីប្រទេសថៃ បានកំពុងធ្វើចត្តាឡីស័កនៅតាមព្រំដែនចំនួនជាង១ម៉ឺននាក់៕

អត្ថបទ៖ ច័ន្ទ វីរៈ