ព័ត៌មានជាតិ

បិទផ្សារ២កន្លែង ក្នុងក្រុងប៉ៃលិន ដើម្បីទប់ស្កាត់កូវីដ-១៩បំប្លែងថ្មី

បានផុស

៤ years មុន

នៅ

ថ្ងៃសៅរ៍ ៧ សីហា ២០២១

ដោយ

នារសៀលថ្ងៃទី៧ ខែសីហា ឆ្នាំ២០២១នេះ រដ្ឋបាលក្រុងប៉ៃលិន បានសម្រេចបិទផ្សារចំនួន២កន្លែងផ្សេងគ្នា ក្នុងភូមិសាស្ត្រក្រុងប៉ៃលិន គឺផ្សារសាមគ្គី ហៅផ្សារប៉ាហ៊ី និងផ្សារជាងអូន ស្ថិតក្នុងភូមិប៉ាហ៊ីត្បូង-ប៉ាហ៊ីជើង សង្កាត់ប៉ៃលិន ក្រុងប៉ៃលិន បន្ទាប់ពីអាជ្ញាធរក្រុង និងមន្ត្រីសុខាភិបាលរកឃើញអ្នកវិជ្ជមានកូវីដ១៩ លើអាជីវករលក់ដូរក្នុងផ្សារជាបន្តបន្ទាប់ និងដើម្បីចូលរួមទប់ស្កាត់ការឆ្លងរាលដាលជំងឺកូវីដ-១៩ ពិសេសមេរោគបំប្លែងថ្មីប្រភេទ Delta។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងលិខិតលេខ២៣១/២១ របស់រដ្ឋបាលក្រុងប៉ៃលិន ចុះថ្ងៃទី៥ ខែសីហា ឆ្នាំ២០២១ បានស្នើសុំអភិបាលខេត្តប៉ៃលិន ដើម្បីបិទផ្សារចំនួនពីរកន្លែង ក្នុងភូមិសាស្ត្រក្រុងប៉ៃលិន ដើម្បីទប់ស្កាត់ការឆ្លងរាលដាលជំងឺកូវីដ-១៩ ពិសេសមេរោគបំប្លែងថ្មីប្រភេទDelta។

លោក ស៊ុន យី អភិបាលក្រុងប៉ៃលិន មានប្រសាសន៍ឲ្យដឹង នៅរសៀសថ្ងៃទី៧ ខែសីហា ឆ្នាំ២០២១ថា៖ រដ្ឋបាលក្រុងប៉ៃលិន បានទទួលសំណើឯកភាពពីលោកស្រី បាន ស្រីមុំ អភិបាលខេត្តប៉ៃលិនរួចហើយ កាលពីថ្ងៃទី៥ ខែសីហា កន្លងទៅ។ ក្នុងអំឡុងពេលបិតផ្សារបណ្តោះអាសន្ននេះ អាជ្ញាធរក្រុង នឹងរៀបចំទីតាំង ដែលមានគម្លាតសុវត្ថិភាព ដើម្បីឱ្យអាជីវករលក់ដូរ គ្រឿងឧបភោគបរិភោគ បន្លែ ត្រី សាច់ និងសម្ភារប្រើប្រាស់ចាំបាច់ផងដែរ។

លោកអភិបាលក្រុងប៉ៃលិន មានប្រសាសន៍បន្តថា ជាជំហានដំបូងគឺយើងបិទជាបណ្តោះអាសន្ន រយៈពេល១៤ថ្ងៃ ហើយប្រសិនជា ការឆ្លងនៅតែមានជាបន្ត យើងនិងបន្តបិទទៀត ចំពោះផ្សារដែលបិទមានផ្សារសាមគ្គីហៅ ផ្សារប៉ាហ៊ី និងផ្សារជាងអូន ហៅផ្សារត្រី។លោកបន្តថា៖ ទោះបីជាយ៉ាងណា ក្នុងការផ្លាស់ទៅលក់ទីតាំងថ្មី អ្នកលក់ដូរ និងអ្នកទិញទាំងអស់ តម្រូវឱ្យពាក់ម៉ាស និងលាងសម្អាតដៃសម្លាប់មេរោគ ជាមួយជែល ឬអាល់កុលជាប្រចាំផងដែរ៕

អត្ថបទ៖ សេង សុវណ្ណារិទ្ធ