ខេត្តបន្ទាយមានជ័យបន្តរកឃើញអ្នកវិជ្ជមានកូវីដ-១៩ ចំនួន១៤៩នាក់

ខេត្តបន្ទាយមានជ័យ៖ រដ្ឋបាលខេត្តបន្ទាយមានជ័យ នៅល្ងាចថ្ងៃទី៩ ខែសីហានេះ បានប្រកាសរកឃើញមានអ្នកជំងឺកូវីដ-១៩ ចំនួន១៤៩នាក់ ក្នុងនោះមានអ្នកជាសះស្បើយ៤៣នាក់។

រដ្ឋបាលខេត្តបន្ទាយមានជ័យ បានជូនដំណឹងដល់សាធារណជនឱ្យបានជ្រាបថា យោងតាមលទ្ធផលធ្វើតេស្តរហ័ស មន្ទីរពិសោធន៍ជាតិភ្នំពេញនៅថ្ងៃទី0៨ ខែសីហាឆ្នាំ ២០២១ នេះបានរកឃើញវិជ្ជមានជំងឺកូវីដ-១៩ថ្មីដែលជាករណីឆ្លងនៅក្នុងព្រឹត្តិការណ៍សហគមន៍ ២០ កុម្ភៈឆ្នាំ ២០២១ និងពលករវិលត្រឡប់ពីមកពីប្រទេសថៃដែលស្ថិតក្នុងការគ្រប់គ្រងរបស់ខេត្តលើបុរសស្ត្រីជនជាតិខ្មែរចំនួន១៤៩នាក់។ ក្នុងនោះរដ្ឋបាលខេត្ត បានប្រកាសព្យាបាលជាសះស្បើយអ្នកជំងឺកូវីដ-១៩ ចំនួន ៤៣
នាក់។

ជាមួយគ្នានេះ រដ្ឋបាលខេត្តបានធ្វើការអំពាវនាវចំពោះអ្នកដែលបានប្រាស្រ័យទាក់ទងប៉ះពាល់ដោយផ្ទាល់ ឬប្រយោលជាមួយបុគ្គលវិជ្ជមានកូវីដ-១៩ ខាងលើ សូមដាក់ខ្លួនដាច់ដោយឡែក តាមដានសុខភាព រយៈពេល១៤ថ្ងៃ និងរាយការណ៍មកអាជ្ញាធរដើម្បីយកសំណាកនិងធ្វើចត្តាឡីស័ក៕

អត្ថបទ៖ វ៉ាន់ ណាង