លោក ចាន់​ យុត្ថា​ ៖ កម្ពស់ទឹកទន្លេអាចនឹងចាប់ផ្ដើមងើបឡើងបន្តិចម្ដងៗ នៅសប្តាហ៍ទី៣ នេះ

កម្ពស់ទឹកទន្លេអាចនឹងចាប់ផ្ដើមងើបឡើងបន្តិចម្ដងៗ នៅក្នុងសប្តាហ៍ទី៣ ខែសីហានេះ ដោយសារបាតុ​ភូតរបាយទឹកភ្លៀងចាប់ផ្ដើមកើតមានឡើងជាបន្តបន្ទាប់ចាប់ពីពេលនេះទៅ។

លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយមបានប្រាប់ឱ្យដឹងថា ការព្យាករណ៍របស់ក្រសួងធនធានទឹកលើកទី១ ទឹកមានកំរិតជាង ៩ ម៉ែត្រ ដែលចាត់ទុកថា ស្ថានភាពទឹកជំនន់មានកម្ពស់មធ្យមនៅក្នុងឆ្នាំ ២០២១នេះ។

លោកថា ជាទូទៅនៅក្នុង១ឆ្នាំ អាចមានកម្ពស់ទឹកអតិបរិមា ២ដង លើកទី១ អាចកើតមាននៅក្នុងកំឡុង ចុង​ខែកក្កដា ខណៈលើកទី២ អាចកើតមាននៅចុងខែ ៩ ឬដើមខែ១០ តែអាចប្រែប្រួលពេលវេលាតិចតួច។

បើតាមលោក ចាន់ យុត្ថា បច្ចុប្បន្នអតិបរមាលើកទី១ ទាបក្នុងរង្វង់ប្រមាណ ៦ ម៉ែត្រ ប៉ុន្តែអាចនឹងមានលើក​ទី២ ដោយសារតែរដូវវស្សានៅយូរ ហើយកន្លងមកបាតុភូតនានាមានព្យុះ ឬប្រពន្ធសម្ពាធទាប ជាពិសេសគឺព្យុះ មិនទាន់មានឃើញព្យុះដើរចូលមកក្នុងតំបន់ផ្ទៃរងទឹកភ្លៀង​របស់មេគង្គនៅ​ឡើយ​ទេ ឃើញតែនៅចិន ជប៉ុន កូរ៉េជាដើម។

លោក ចាន់ យុត្ថា បន្តថា លុះត្រាតែចូលចុងខែ ៨ ឃើញមានព្យុះងាកចុះមកបន្តិចម្ដងៗ មករកតំបន់ផ្ទៃរងទឹកភ្លៀងរបស់ទន្លេមេគង្គ ជាជំហររបស់ក្រសួងគឺរក្សាកម្ពស់ទឹកក្នុងរង្វង់ ៩.៩០ ម៉ែត្រ គិតថាជាជំនន់មធ្យម។

ប៉ុន្តែយ៉ាងណាក៏ដោយលោក ចាន់ យុត្ថាបញ្ជាក់ថានេះគឺជាការព្យាករណ៍លើកទី១ ហើយក្រសួងនឹងធ្វើការព្យាករណ៍លើកទី២ ទៀតឆាប់ៗនេះ៕