ព័ត៌មានជាតិ

អភិបាលខណ្ឌមានជ័យ ចុះពិនិត្យហាងផឹកស៊ីមួយកន្លែង ឃាត់មនុស្ស១៤នាក់ ដែលល្មើសបម្រាម

បានផុស

៤ years មុន

នៅ

ថ្ងៃពុធ ១១ សីហា ២០២១

ដោយ

មនុស្សប្រុសស្រីចំនួន១៤នាក់ ត្រូវបានកម្លាំងអាជ្ញាធរចម្រុះខណ្ឌមានជ័យ ធ្វើការឃាត់ខ្លួន ក្នុងរង្វង់ការចុះត្រួតពិនិត្យទីតាំងហាងផឹកស៊ីមួយកន្លែងយីហោ «ផ្ទះឈើម្ហូបខ្មែរថៃ» ស្ថិតនៅតាមបណ្តោយផ្លូវបេតុង ក្នុងសង្កាត់ស្ទឹងមានជ័យ២ ខណ្ឌមានជ័យ ដោយរកឃើញថា ទីតាំងនេះបានបង្កលក្ខណៈអោយមានការជួបជុំគ្នាផឹកស៊ី ល្មើសនឹងបម្រាមហាមឃាត់របស់សាលារាជធានីភ្នំពេញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរង្វង់ការចុះឃាត់ខ្លួនខាងលើនេះ ធ្វើឡើងនៅវេលាយប់ថ្ងៃទី១០ ខែសីហា ឆ្នាំ២០២១ ដោយមានការដឹកនាំកម្លាំងដោយលោក ពេជ្រ កែវមុនី អភិបាលខណ្ឌមានជ័យ និងលោកអភិបាលរងខណ្ឌ២រូប រួមជាមួយកម្លាំងនគរបាលជាច្រើននាក់ផងដែរ ។

មន្ត្រីអាជ្ញាធរអោយដឹងថា បន្ទាប់ពីទទួលបានព័ត៌មានពីពលរដ្ឋ អំពីការបើកអោយដំណើរការមានការអនុញ្ញាត្តអោយមានភ្ញៀវចូលទៅផឹកស៊ីនៅក្នុងហាងផឹកស៊ីខាងលើរួចមក កម្លាំងអាជ្ញាធរចម្រុះ ដែលដឹកនាំដោយលោកអភិបាលខណ្ឌ បានធ្វើការចុះទៅពិនិត្យដល់ទីតាំងឃើញថា ពិតជាមានការជួបជុំគ្នាផឹកស៊ីដូចដែលពលរដ្ឋបានរាយការណ៍ប្រាកដមែន ។ បន្ទាប់ពីពិនិត្យឃើញហើយនោះ ក្រុមសមត្ថកិច្ចបានធ្វើការឃាត់ខ្លួនអ្នកពាក់ព័ន្ធនៅក្នុងទីតាំងសរុបទាំងអស់១៤នាក់ ក្នុងនោះស្រី០៥នាក់ ។

នៅក្នុងចំណោមមនុស្សទាំង១៤នាក់ មានភ្ញៀវ៩នាក់ ដែលសុទ្ធតែជាមនុស្សប្រុស ដែលបានចូលទៅអង្គុយជួបជុំគ្នាផឹកស៊ី ។ ដោយឡែកមនុស្សស្រី០៥នាក់ផ្សេងទៀត មានម្នាក់ជាម្ចាស់ទីតាំង និង០៤នាក់ទៀត ជានារីមើលការខុសត្រូវនៅក្នុងទីតាំងហាង ។

ក្រោយការឃាត់ខ្លួន អ្នកពាក់ព័ន្ធទាំង១៤នាក់ ត្រូវបានក្រុមគ្រូពេទ្យចុះធ្វើសំណាក ពិនិត្យរកមេរោគកូវីដ១៩ ហើយជាលទ្ធិផលឃើញថា អវិជ្ជមានទាំងអស់ ។ បន្ទាប់ពីពិនិត្យរួច អ្នកទាំង១៤ ត្រូវបានសមត្ថកិច្ច បញ្ចូនខ្លួនទៅកាន់ស្នងការដ្ឋាននគរបាលរាជធានីភ្នំពេញ ដើម្បីអនុវត្តទៅតាមនីតិវិធីច្បាប់ ។ ដោយឡែកទីតាំង ត្រូវបានអាជ្ញាធរសម្រេចធ្វើការបិទជាបណ្តោះអាសន្នសិន មិនអនុញ្ញាត្តអោយមានការដំណើរការឡើយ រងចាំមានការណែនាំ ឬសេចក្តីសម្រេចសារជាថ្មី នៅពេលក្រោយ ៕

អត្ថបទ ៖ លីហេង