ជាសញ្ញាល្អ! ខេត្តព្រៃវែង មានអ្នកឆ្លងកូវីដតិចបំផុតមិនធ្លាប់មាន និងជាសះស្បើយជិត២០០នាក់

ក្រោយផ្ទុះករណីឆ្លងជំងឺកូវីដ-១៩ ចូលក្នុងសហគមន៍ ខេត្តព្រៃវែង បានរកឃើញអ្នកឆ្លងជាបន្តបន្ទាប់​ និង​មានចំនួនច្រើន រហូតថ្ងៃខ្លះមានជាង២០០នាក់ក៏មាន។ ហើយក៏មានអ្នកស្លាប់ជិត១០០នាក់​ផងដែរ គិតមក​ដល់​ពេលនេះ។

នៅថ្ងៃទីថ្ងៃទី១២ ខែសីហា ឆ្នាំ​២០២១ នេះ រដ្ឋបាលខេត្ត​ព្រៃវែង បាន​ប្រកាសរកឃើញ​អ្នក​ឆ្លងជំងឺកូ​វីដ​-១៩​តិចបំផុតមិនធ្លាប់មានត្រឹម៣០​នាក់ប៉ុណ្ណោះ​ និងមានអ្នកជាសះស្បើយ​រហូតដល់១៩២​នាក់ និង​ស្លាប់​១​នាក់។

ទោះបីការរកឃើញករណីឆ្លងជំងឺដ៏កាចសាហាវនេះមានការធ្លាក់ចុះក្ដី អាជ្ញាធរនៅតែអំពាវនាវដល់​ប្រជា​ពលរដ្ឋត្រូវចូលរួមអនុវត្តនូវវិធានការសុខាភិបាលឲ្យត្រឹមត្រូវបន្តទៀត ជាពិសេស៣កុំ ៣ការពារ របស់​សម្ដេចតេជោ ដើម្បីកាត់ផ្ដាច់ការឆ្លងរីករាលដាលនៃជំងឺនេះបន្តទៀត។

សូមបញ្ជាក់ថា គិតត្រឹមថ្ងៃទី១២ ខែសីហា ឆ្នាំ២០២១នេះ ខេត្តព្រៃវែង មានអ្នកឆ្លងជំងឺកូវីដ-១៩ សរុប​៥,១៣១នាក់ ព្យាបាលជាសះស្បើយ៤,១៦៤នាក់ កំពុងសម្រាកព្យាបាល៨៧៦នាក់ និងស្លាប់៩១នាក់៕

អត្ថបទ ៖ សុខុម​