ក្រសួងមុខងារសាធារណៈប្រកាសជ្រើសមន្ត្រីក្របខណ្ឌ ៧៩នាក់ឱ្យចូលបម្រើការងារនៅក្រសួងយុត្តិធម៌

ភ្នំពេញ៖ ក្រសួងមុខងារសាធារណៈបានប្រកាសការប្រឡងប្រជែងជ្រើសរើសនិស្សិត និងមន្ត្រីរាជការស៊ីវិលចំនួន ៧៩នាក់ ឱ្យចូលបម្រើការងារក្នុងក្របខ័ណ្ឌក្រសួងយុត្តិធម៌ សម្រាប់ឆ្នាំ២០២១។

ក្នុងសេចក្តីជូនដំណឹងរបស់ក្រសួងមុខងារសាធារណៈបានឱ្យដឹងថា យោងតាមសំណើសុំបញ្ចូលការប្រឡងជ្រើសរើសក្របខ័ណ្ឌថ្មី ឆ្នាំ២០២១ របស់ក្រសួងយុត្តិធម៌ ក្រសួងសម្រេចបញ្ចូលការប្រឡងជ្រើសរើសនិស្សិតនិងមន្ត្រីរាជការចំនួន ៧៩កន្លែង របស់ក្រសួងយុត្តិធម៌ទៅក្នុងការប្រឡងជ្រើសរើសក្រសួងស្ថាប័នទាំង៨ ។

មន្ត្រីក្របខណ្ឌ ៧៩កន្លែងនោះ សម្រាប់បេក្ខជនប្រឡងក្របខ័ណ្ឌប្រភេទ ក និង ខ នីតិសាស្ត្ររដ្ឋបាលសាធារណៈ នីតិសាធារណៈ ទំនាក់ទំនងអន្តរជាតិ គ្រប់គ្រងធនាគារហិរញ្ញវត្ថុ គណយ្យនិងហិរញ្ញវត្ថុ ភាសាអង់គ្លេស និងព័ត៌មានវិទ្យា ដើម្បីបំពេញការងារនៅតាមអង្គភាពចំនួន២៥។

ចំពោះលក្ខខណ្ឌជ្រើសរើសគឺទី១ បេក្ខជនត្រូវមានសញ្ជាតិខ្មែរ ត្រូវវមានអាយុចាប់ពី ១៨ឆ្នាំឡើងទៅ ។ ចំពោះបេក្ខជនជាមន្ត្រីរាជការត្រូវបានលើកលែងលក្ខខណ្ឌអាយុ។ បេក្ខជនជាមន្ត្រីរាជការត្រូវមានលិខិតអនុញ្ញាតឱ្យចូលរួមប្រឡងប្រជែងពីប្រធានក្រសួងស្ថាប័នសាមី។

ក្រោយពេលប្រឡងជាប់ជាស្ថាពរនៅតាមក្រសួង ស្ថាប័ន ឬអង្គភាពណាមួយហើយ ត្រូវបានរៀបចំផ្ទេរក្របខ័ណ្ឌទៅកន្លែងថ្មី បេក្ខជនជាមន្ត្រីរាជការត្រូវបានរក្សាអតីតភាពការងារ ប៉ុន្តែមិនរក្សាមុខតំណែងគ្រប់គ្រងទេ។

ចំពោះបេក្ខជនជានារី ជនពិការ និងអ្នករស់នៅតំបន់ដាច់ស្រយាលត្រូវបានផ្តល់អាទិភាព និងលើកទឹកចិត្ត។

សញ្ញាបត្រ ឬ លិខិតបញ្ជាក់ការសិក្សាគ្រប់កម្រិតជំនាញត្រូវបានដាក់វិធានការដូចខាងក្រោម៖

-ករណីរកឃើញមានការក្លែងបន្លំសញ្ញាបត្រ ឬលិខិតស្នាមផ្សេងៗ បេក្ខជននិងត្រូវលុបឈ្មោះចេញជាស្វ័យប្រវត្តិ ទោះបីជាបេក្ខជននោះប្រឡងជាប់ក្នុងក្របខ័ណ្ឌក្រសួង ស្ថាប័នណាមួយក៏ដោយ។

-ចំពោះសញ្ញាបត្រដែលបានបញ្ចប់ការសិក្សាពីបរទេស ឬសញ្ញាបត្រជាភាសាបរទេសត្រូវយកទៅបញ្ជាក់ជា ភាសាជាតិ ដោយមានការទទួលស្គាល់ពីក្រសួងអប់រំ យុវជន និងកីឡា។

កាលបរិច្ឆេទទទួលពាក្យ ចាប់ពីថ្ងៃទី១៦ ខែសីហា ឆ្នាំ២០២១ ពេលព្រឹកចាប់ពីម៉ោង ០៨៖០០នាទី ដល់ម៉ោង ៣០នាទី និងពេលរសៀលចាប់ពីម៉ោង ១៤:០០នាទី ដល់ម៉ោង ១៧៖០០នាទី។

ចំពោះ កាលបរិច្ឆេទឈប់ទទួលពាក្យនៅថ្ងៃទី១៦ ខែកញ្ញា ឆ្នាំ២០២១ វេលាម៉ោង ១៧:០០នាទី ។

ដើម្បីចូលរួមទប់ស្កាត់ការរីករាលដាលនៃជំងឺកូដ-១៩ បេក្ខជនអាចទាញយកពាក្យសុំសិទ្ធិប្រឡង
តាមរយៈគេហទំព័ររបស់ក្រសួងមុខងារសាធារណៈ អាសយដ្ឋាន (www.mrcm.gov.kh) ឬតាមបណ្ដាញសង្គមហ្វេសប៊ុកក្រសួងមុខងារសាធារណៈ(http://tacebo ok.corniCiiServiceCambodia) ឬតាមរយៈគេហទំព័ររបស់ក្រសួងយុត្តិធម៌អាសយដ្ឋាន (www.moj.ok.kh) ឬតាមបណ្តាញសង្គមហ្វេសប៊ុកក្រសួងយុត្តិធម៌ (www.facebook.com/mojcambodia) យកទៅបំពេញ និងមកដាក់ពាក្យសុំសិទ្ធិប្រឡងនៅនាយកដ្ឋានគ្រប់គ្រងក្របខ័ណ្ឌនៃក្រសួងមុខងារសាធារណះ (អគារ បែរមុខទៅលិចជាន់ផ្ទាល់ដី បន្ទប់A5) ឬមកដាក់ពាក្យសុំសិទ្ធិប្រឡងនៅនាយកដ្ឋានកិច្ចការបុគ្គលិកនៃសាលាជម្រះក្តីនៃអគ្គនាយកដ្ឋានកិច្ចការរដ្ឋបាលតុលាការ ក្រសួងយុត្តិធម៌ (មហាវីថីសម្តេចសុធារសខណ្ឌដូនពេញ រាជធានីភ្នំពេញ)។

បញ្ជាក់៖ បេក្ខជនទាំងអស់ត្រូវមកដាក់ពាក្យសុំសិទ្ធិប្រឡងដោយខ្លួនឯងផ្ទាល់។

កាលបរិច្ឆេទបឡង និងមណ្ឌលប្រឡងគណៈកម្មការរៀបចំការប្រឡងនឹងជូនដំណឹងអំពីកាលបរិច្ឆេទ
ប្រឡង និងមណ្ឌលប្រឡងនៅពេលក្រោយ បេក្ខជនទាំងអស់តាមដានព័ត៌មាននៅគេហទំព័ររបស់ក្រសួងមុខងារសាធារណៈ តាមរយៈអាសយដ្ឋាន(www.rcs.gov.kh) ឬតាមបណ្តាញសង្គមហ្វេសប៊ុករបស់ក្រសួងមុខងារសាធារណៈ (http://facebook.com/CiviIsrviceCambodia)។

គួរបញ្ជាក់ថា គណៈកម្មការរៀបចំការប្រឡង សូមរក្សាសិទ្ធិកែប្រែសេចក្ដីជូនដំណឹងនេះ ក្នុងករណីចាំបាច់។

ព័ត៌មានលម្អិត សូមធ្វើការទាក់ទងមកក្រសួងមុខងារសាធារណៈ ដែលមានទីតាំងស្ថិតនៅផ្លូវវត្តអង្គតាម៉ិញ ភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ (ទល់មុខវត្តអង្គតាមិញ)៕

អត្ថបទ៖ សំអឿន

ចុចអាន៖ ក្រសួងប្រៃសណីយ៍ និងក្រុមហ៊ុន Google រួមគ្នាផ្ដល់វគ្គបណ្តុះបណ្តាលដល់កូនខ្មែរឱ្យក្លាយជាអ្នកផលិតមាតិកា YouTube