លោក ពេជ្រ ស្រស់ ប្រធានគណបក្សយុវកម្ពុជា ឆ្លងកូវីដ-១៩

ប្រធានគណបក្សយុវជនកម្ពុជា លោក ពេជ្រ ស្រស់ បានអះអាងតាមបណ្តាញសង្គមហ្វេសប៊ុករបស់លោក នៅយប់ថ្ងៃទី១៤ ខែសីហានេះថា លោកបានឆ្លងជំងឺកូវីដ-១៩ ហើយលោកបានអំពាវនាវឱ្យប្រជាពលរដ្ឋមានការប្រុងប្រយ័ត្នខ្ពស់។

លោក ពេជ្រ ស្រស់ បានបញ្ជាក់យ៉ាងដូច្នេះថា៖ “វាជារឿងគួរឱ្យអស់សំណើចខ្លាំងណាស់ ដែលកូវីដ-១៩ វាបានឆ្លងមកលើខ្ញុំ ដោយខ្ញុំមិនដែលដើរទៅណាទេ ហើយខ្ញុំហាត់ប្រាណជារៀងរាល់ថ្ងៃ គឺ២-៣ ម៉ោងក្នុងមួយថ្ងៃ អ្វីដែលគួរឱ្យសំណើចនោះ គឺគ្រាន់តែខ្ញុំខានហាត់ប្រាណតែមួយថ្ងៃសោះ ស្រាប់តែចាប់ផ្តើមឈឺ ហើយឆ្លងមេរោគកូវីដ-១៩ តែម្តង។ សុំបងប្អូនខ្មែរមានការប្រុងប្រយ័ត្នឱ្យបានខ្ពស់បំផុតចំពោះមេរោគនេះ”។

ជាមួយគ្នានោះ លោក ពេជ្រ ស្រស់ បានអំពាវនាវឱ្យអ្នកពាក់ព័ន្ធជាមួយលោកផ្ទាល់ និងប្រយោល តាមដានសុខភាពផងដែរ។

សូមបញ្ជាក់ថា នៅថ្ងៃទីថ្ងៃទី១៥ ខែសីហា ឆ្នាំ២០២១នេះ ក្រសួងសុខាភិបាលបានរកឃើញអ្នកឆ្លងកូវីដ១៩ ថ្មីចំនួន ៥៨៨នាក់ ជាសះស្បើយ ៧៤២នាក់ និងស្លាប់ ១៧នាក់ ករណីឆ្លងសហគមន៍ ៣៩៥នាក់ អ្នកដំណើរពីបរទេស ១៩៣នាក់។ កម្ពុជាមានអ្នកឆ្លងសរុបចំនួន ៨៥,៤៤៨នាក់ ជាសះស្បើយចំនួន ៨០៣៩៦នាក់ និងមានអ្នកស្លាប់ចំនួន ១៦៨៣នាក់៕

អត្ថបទ៖ កោះកែវ