មេឃុំកំពង់ថ្កូវ ទទួលមរណភាព ដោយសារជំងឺកូវីដ-១៩

មេឃុំកំពង់ថ្កូវ ស្រុកក្រឡាញ់ នៃខេត្តសៀមរាប លោក លន់ រួប បានទទួលមរណភាព នៅថ្ងៃទី១៥ ខែសីហា ឆ្នាំ​២០២១ នៅវេលាម៉ោង១០ និង៥០នាទី ក្នុងជន្មាយុ៧៥ឆ្នាំ ដោយសារជំងឺកូវីដ-១៩ នៅឯមន្ទីរពេទ្យបង្អែកខេត្តសៀមរាប។ នេះបើតាមការឲ្យដឹងពីអ្នកឧកញ៉ា សៀង ណាំ តំណាងរាស្ត្រមណ្ឌលខេត្តសៀមរាប នៅព្រឹកថ្ងៃទី១៦ ខែសីហា ឆ្នាំ២០២១នេះ។

អ្នកឧកញ៉ា សៀង ណាំ តាមរយៈទំព័រហ្វេសប៊ុករបស់ខ្លួន បានសរសេរថា «ខ្ញុំបាទ មានការសោកស្តាយ ដោយឃុំកំពង់ថ្កូវ បានបាត់បង់នូវមេឃុំដ៏ល្អម្នាក់ គឺលោក លន់ រួប លោកគឺជាបុគ្គលដែលមានចរិកសុភាពរាបសារ ស្លូតបូត  និងជាទីគោរពស្រលាញ់ នៃប្រជាជនឃុំកំពង់ថ្កូវ លោកមេឃុំ លន់ រួប គាត់បានលះបង់កម្លាំងកាយ កម្លាំងចិត្ត បម្រើប្រទេសជាតិ អស់រយៈពេល៤២ឆ្នាំ ដោយមិនគិតអំពីការនឿយហត់ និងបានចូលរួម ការពារ និងអភិវឌ្ឍ  ឃុំកំពង់ថ្កូវ ឲ្យទទួលបានការរីកចម្រើន គ្រប់វិស័យ  រហូតមកដល់ដង្ហើមចុងក្រោយនេះ»។

តំណាងរាស្ត្រមណ្ឌលខេត្តសៀមរាបរូបនេះ​ បានសរសេរបន្តថា «ខ្ញុំបាទ សូមចូលរួមរំលែកនូវមរណទុក្ខ ដ៏សែនក្រៀមក្រំនេះ ជាមួយក្រុមគ្រួសារនៃសព។ ខ្ញុំបាទ សូមឧទ្ទិសដល់ដួងវិញ្ញាណក្ខន្ធ លោកមេឃុំ លន់ រួប បានទៅកាន់សុគតិភព កុំបីឃ្លៀងឃ្លាតឡើយ»៕