ឃុំខ្លួនកូនប្រសារ និងកូនបង្កើត ដែលចាក់គ្នាបណ្ដាលឱ្យឪពុកស្លាប់

កូនបង្កើត និងកូនប្រសារដែលទាស់ទែងគ្នា ហើយយកកាំបិតចាក់គ្នា ឪពុកចូលទៅជួយបែរជាត្រូវចំពោះឪពុកស្លាប់ ត្រូវបានចៅក្រមស៉ើបសួរសាលាដំបូងសម្រេចចេញដីកាឃុំខ្លួនដាកើពន្ធនាគារក្រោមការចោទប្រកាន់ពីបទឃាតកម្ម តាមមាត្រា ១៩៩ នៃក្រមព្រហ្មទណ្ឌ។

ការឃុំខ្លួននេះក្រោយពី លោកម៉ុត ដារា ជាតំណាងអយ្យការបានចោទប្រកាន់ជាផ្លូវការហើយចាត់បញ្ជូនទៅ​ចៅក្រមស៊ើបសួរដើម្បីឃុំខ្លួនជនសង្ស័យដាក់ពន្ធនាគារជាបណ្តោះអាសន្នរង់ចាំសវនាការផ្តន្ទាទោសតាមអំពើដែលជនល្មើសបានប្រព្រឹត្ត។

ជនសង្ស័យ​ជា​ប្តីជាកូនប្រសារឈ្មោះ ហេង សៅរស្មី អាយុ ៣១ ឆ្នាំ និងប្រពន្ធឈ្មោះ ប៊ុ​នសូ​ហ្វែ​រអាយុ​២៨​ ឆ្នាំជាកូនបង្កើត អ្នកទាំងពីរប្រកបមុខរបរលក់អនឡាញ។ ជនរងគ្រោះឈ្មោះប៊ុន វណ្ណា ជាឪពុក អាយុ៥៩ឆ្នាំ។

ពួកគេស្នាក់នៅផ្ទះល្វែង​មួយ​កន្លែងស្ថិត​តាម​បណ្តោយ​ផ្លូវ​ប៉េ​តុងក្នុង ភូមិ​ត្នោត​ជ្រុំ​៤ សង្កាត់​បឹង​ទំពន់​ទី​២ ខណ្ឌមានជ័យ រាជធានី​ភ្នំពេញ។

ជនសង្ស័យត្រូវបានកម្លាំងសមត្តកិច្ចនគរបាលផ្នែកព្រហ្មទណ្ឌខណ្ឌមានជ័យឃាត់ខ្លួននិងបញ្ជូនទៅកាន់សាលាដំបូងរាជធានីភ្នំពេញបន្ទាប់ពីប្តីប្រពន្ធពីរនោះបានរកឃើញជាប់ពាក់ពន្ធអំពើឃាតកម្មចាក់សម្លាប់ឪពុក។

ដើមចមនៃសំណុំរឿងអំពើឃាតកម្មកាលពីវេលាម៉ោង១១ព្រឹកថ្ងៃទី១៣ខែសីហាឆ្នាំ២០២១ប្តីប្រពន្ធពីរនាក់មានជម្លោះឈ្លោះប្រកែកគ្នារហូតក្លាយទៅជាអំពើហឹង្សាកាប់ចាក់ក្នុងគ្រួសារដោយផ្តើមចេញពីភ្លើងប្រច័ណ្ឌ​។

តាម​ប្រភព​ព័ត៌មាននៅកន្លែងកើតហេតុបានឲ្យដឹង​ថាដំបូងប្តី​ប្រពន្ធ​ពីរនាក់នោះបាន​ឈ្លោះប្រកែក​គ្នាដែលប្រពន្ធ​បានចោទប្រកាន់ប្តីថា មាន​ស្រី​លួចលាក់​ខាងក្រៅផ្ទះ។ ការចោទប្រកាន់ពីសំណាក់ស្ត្រីជាភរិយាថាប្តីមានស្រីលួចលាក់ក្រៅផ្ទះនេះបានធ្វើឲ្យប្តីមានការតបតទើបកើតជាជម្លោះ​ដោយប្រើអំពើហិង្សារ​វាយតប់​គ្នាទៅវិញទៅមក។

សាក្សីបញ្ជាក់ថានេះមិនមែនជាលើកទីមួយទេដែលគ្រួសារមួយនេះឈ្លោះទាស់ទែងគ្នាតែរឿងប្រចណ្ឌនោះ។ដោយសម្លេងស្រែកជេរបញ្ចោនិងវាយកាប់ចាក់គ្នាលាន់ឮកងរំពងពេញក្នុងផ្ទះរវាងប្តីប្រពន្ធទាំងពីរដែលធ្វើឲ្យមានការភ្ញាក់ដល់អ្នករស់នៅជិតខាងនោះជាហេតុធ្វើឲ្យបុរសជាឪពុកដែលមានវ័យ​ចំណាស់​ បាន​ដើរចូលទៅ​ឃាត់​ និងជួយចាប់កូន​បង្កើតនិងកូនប្រសារកុំឲ្យឈ្លោះ​ទៀត។

ប៉ុន្តែ​ស្រប​ពេល​នោះកូនស្រី​បាន​ស្ទុះ​ទៅ​យក​កាំបិត​សាំង​គី​មពី​ក្បាល​ដំណេកបម្រុងចាក់​ប្តីតែ​ត្រូវ​ឪពុកនិង​ប្តីចាប់​ប្រតាយប្រតប់​ដណ្តើម​យក​កាំបិតជា​ហេតុ​ធ្វើ​ឲ្យស្ត្រីជ្រុលដៃចាក់​ទៅ​លើ​ឪពុក​ ជា​ច្រើន​កាំបិតបណ្តាលឲ្យឪពុករងរបួសធ្ងន់ធ្ងរនឹងហូរ​ឈាម​ស្រោច​ពេញ​ដងខ្លួន។

ភ្លាម​នោះប្តី​ប្រពន្ធ​ទាំង​២​ នាក់បាន​ស្រ​វេ​ស្រវា​ដឹក​ឪពុកបញ្ជូន​ទៅ​កាន់​មន្ទីរពេទ្យ​មិត្តភាព​ខ្មែរ​សូ​វៀត ដើម្បី​សង្គ្រោះប៉ុន្តែ​ជាអកុសលពេល​ដឹក​ដល់មន្ទីរពេទ្យឈាមលោកអ្នកមានគុណហូរច្រើនពេកជនរងគ្រោះក៏បានលាចាកលោកដោយមិនវិលត្រឡប់ដោយស្នាដៃកូនទាំងពីរនាក់នេះតែម្តងទៅ។

បន្ទាប់​ពី​ឪពុក​ស្លាប់បាត់បង់ជីវិតហើយជនសង្ស័យបាន​ដឹក​សពឪពុក​ត្រឡប់​ទៅ​ផ្ទះ​វិញទើបស្ត្រី​ជា​កូនបង្កើតបាន​រាយការណ៍​ជូន​សមត្ថកិច្ចប្រាប់​ពី​ដំណើរ​រឿងដែល​បាន​កើត​ឡើងដោយពួកគេក៏មិនបានគេចវេសពីហេតុការនោះដែរ ៕ អត្ថបទ៖ មករា