អគ្គិភ័យ១ករណី នៅខេត្តកំពង់ឆ្នាំង បណ្ដាលឲ្យឆេះផ្ទះអស់១ ខ្នង និងកុមារ២នាក់ បានស្លាប់

(កំពង់​ឆ្នាំង)​៖ ករណីអគ្គិភ័យមួយ បានកើតឡើងនៅខេត្តកំពង់ឆ្នាំង​ បានបណ្ដាលឆេះផ្ទះអស់១ខ្នង និងបាន​បណ្ដា​លឲ្យកុមារ២នាក់ បានស្លាប់ផងដែរ។ ហេតុការណ៍ គ្រោះអគ្គិភ័យនេះ បានកើតឡើងនៅវេលាម៉ោង៩ និង​១៦ព្រឹក ថ្ងៃទី១៦ ខែសីហា ឆ្នាំ២០២១ ស្ថិតនៅភូមិពោធិ៍រិទ្ធិក្រៃ ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង។

ប្រភពព័ត៌មាន ពីនាយកដ្ឋាននគរបាល បង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាន នគរបាលជាតិ បា​ន​ឲ្យដឹងនៅរសៀលថ្ងៃនេះថា ម្ចាស់ផ្ទះដែលឆេះនោះ មានឈ្មោះ អ៊ូ ចាន់នឿន អាយុ៧០ឆ្នាំ និងមានប្រពន្ធឈ្មោះ សួន សំអូន។ ករណីអគ្គិភ័យនេះ បាន​បណ្តាល​ឲ្យ​ឆេះផ្ទះ ១​ខ្នង​ ទំហំ១២×០៥ម៉ែត្រ​ និងបានបណ្តាល​ឲ្យកុមារ ​ចំនួន​២​នាក់​ បានស្លាប់​​ រួម​មាន​៖

១.​ ឈ្មោះ​ នឿន ចិត្រា ភេទ​ប្រុស អាយុ១០ឆ្នាំ​។

២.​ ឈ្មោះ​ នឿន ចាន្ថា ភេទ​ស្រី អាយុ៧ឆ្នាំ និងសម្ភារៈប្រើប្រាស់ ក្នុងផ្ទះមួយចំនួន។ 

ចំពោះមូលហេតុវិញ ត្រូវបានសមត្ថកិច្ច អះអាងថា បណ្តាល​មកពីឆ្លងចរន្តអគ្គិសនី​ ពេលឪពុកម្តាយ ចេញទៅធ្វើការបាត់ និងតាយាយមិននៅផ្ទះ៕