ក្រសួងពាណិជ្ជកម្មស្នើដល់ផលិតករ ឬអ្នកនាំចេញទាំងអស់ចូលរួមកែសម្រួលសេចក្តីព្រាងយន្តការអនុគ្រោះ​ពន្ធទូទៅថ្មី២០២២របស់ចក្រភពអង់គ្លេស​

​​ក្រសួងពាណិជ្ជកម្ម​ស្នើ​ដល់​ផលិតករ ឬ​អ្នក​នាំចេញ​ទាំងអស់​ចូលរួម​កែសម្រួល​សេចក្តីព្រាង​យន្តការ​អនុគ្រោះ​ពន្ធ​ទូទៅ​ថ្មី​២០២២​របស់​ចក្រភព​អង់គ្លេស​ដើម្បី​ឱ្យមាន​លក្ខណៈ​ងាយស្រួល និង​សាមញ្ញ ប្រកប​ដោយ​តម្លាភាព និង​បរិ​យា​ប័ន្ន​។​

យោងតាម​សេចក្តីជូនដំណឹង​របស់​ក្រសួងពាណិជ្ជកម្ម ចុះ​ថ្ងៃទី​១៦​ សី​ហា នេះ​ឲ​ដឹងថា​ក្រសួង​មាន​មាន​កិត្តិយស​សូម​ជម្រាប​ជូនដំណឹង​ដល់ អ្នកឧកញ៉ា លោក​ឧកញ៉ា លោក លោកស្រី អ្នកនាង កញ្ញា ដែលជា​ផលិតករ ឬ​អ្នក​នាំចេញ​ទាំងអស់​ឱ្យបាន​ជ្រាបថា ចក្រភព​អង់គ្លេស​បានប្រកាស​ជូន​ដំណឹង​ដល់​បណ្តា​ប្រទេស​អភិវឌ្ឍន៍​តិចតួច និង​ប្រទេស​មាន​ចំណូល​មធ្យម​កម្រិត​ទាប ទាំង​វិស័យ​ឯកជន និង​សាធារណៈ ជាពិសេស​ក្រុមហ៊ុន​នាំ​ទំនិញ​ចូល​ទីផ្សារ​ចក្រភព​អង់គ្លេស អំពី​សេចក្តីព្រាង​យន្តការ​អនុគ្រោះ​ពន្ធ​ទូទៅ​ថ្មី​។​

ក្រសួង​បាន​បន្តថា​ក្នុង​ដំណើរការ​នៃ​ការរៀបចំ​សេចក្តីព្រាង​យន្តការ​អនុគ្រោះ​ពន្ធ​ទូទៅ​ថ្មី​នេះ ចក្រភព​អង់គ្លេស​ផ្តល់ឱកាស​ឱ្យ​ភាគី​ពាក់ព័ន្ធ​ចូលរួម​ប្រឹក្សា​យោបល់​សាធារណៈ ប្រមូល​ធាតុ​ចូល និង​សំណូមពរ តាមរយៈ​ការបំពេញ​នូវ​កម្រង​សំណួរ ដើម្បី​ចូលរួម​កែសម្រួល​លក្ខខណ្ឌ​តម្រូវ និង​នីតិវិធី ឱ្យមាន​លក្ខណៈ​ងាយស្រួល និង​សាមញ្ញ ប្រកបដោយ​តម្លាភាព និង​បរិ​យា​ប័ន្ន​។ បន្ទាប់ពី​ទទួលបាន​ធាតុ​ចូល​ពី​គ្រប់ភាគី​ពាក់ព័ន្ធ ចក្រភព​អង់គ្លេស​នឹង​ពិនិត្យ​សម្រេច ដាក់ចេញ​នូវ​ប្រព័ន្ធ​អនុគ្រោះ​ពន្ធ​ទូទៅ​ថ្មី​មួយ សម្រាប់​អនុវត្ត​នៅ​ឆ្នាំ​២០២២​ខាងមុខ​។​

ក្រសួង​ប​នា​បន្តទៀតថា « ក្នុងន័យនេះ ក្រសួងពាណិជ្ជកម្ម​សូម​ជម្រាបជូន​ដំណឹង​ដល់ អ្នកឧកញ៉ា លោក​ឧកញ៉ា លោក លោកស្រី អ្នកនាង កញ្ញា ដែលជា​ផលិតករ ឬ​អ្នក​នាំចេញ​ទាំងអស់ ចូលរួម​ឆ្លើយ​នូវ​កម្រង​សំណួរ តាមរយៈ​គេហទំព័រ​ផ្លូវការឱ្យបាន​ត្រឹម​ថ្ងៃទី​១២ ខែកញ្ញា ឆ្នាំ​២០២១»​។​

សម្រាប់​ព័ត៌មាន​បន្ថែម សូម​ទំនាក់ទំនង​មន្ត្រី​បច្ចេកទេស​នៃ​ក្រសួងពាណិជ្ជកម្ម ដូចខាងក្រោម​៖

១-​លោក ស៊ី បា​ទិ​ត្យ អនុប្រធាននាយកដ្ឋាន ទូរស័ព្ទ​៖ ០១២ ៩៤៨ ៤៨៤

២-​លោក ខុង ប៊ុន​រ័ត្ន អនុប្រធាននាយកដ្ឋាន ទូរស័ព្ទ​៖ ០១២ ៣០៤ ០១១

៣-​លោក ជី សុថា​រិ​ទ្ធ ប្រធានការិយាល័យ ទូរស័ព្ទ​៖ ០១៦ ៤៣២ ៤៤៤

៤-​លោកស្រី ម៉ក់ ច័ន្ទ​សុវណ្ណ​វ​ល័​ក្ខ អនុប្រធាន​ការិយាល័យ ទូរស័ព្ទ​៖ ០១២ ៦៩២ ០៨៨៕

អត្ថបទ ៖ ​សំអឿន​