ឆក់ទូរស័ព្ទដៃពីជនជាតិចិនមិនបានសម្រេចត្រូវសមត្ថកិច្ចឃាត់ខ្លួន

ភ្នំពេញ៖ នគរបាលប៉ុស្តិ៍រដ្ឋបាលអូរបែកក្អម នៃអធិការដ្ឋាននគរបាលខណ្ឌសែនសុខ បានធ្វើការឃាត់ខ្លួនជនសង្ស័យ ១នាក់ ករណីឆក់ទូរស័ព្ទដៃមិនបានសម្រេចពីជនជាតិចិន។
សមត្ថកិច្ចនគរបាលខណ្ឌសែនសុខ ប្រាប់ឱ្យដឹងថា នគរបាលប៉ុស្តិ៍រដ្ឋបាលអូរបែកក្អម ឃាត់ខ្លួនជនសង្ស័យ ០១នាក់ ករណីលួចមានស្ថានទម្ងន់ទោស ឆក់ទូរស័ព្ទដៃមិនបានសម្រេច នៅចំណុចមុខធានាគារកាណាឌីយ៉ា ផ្លូវណតប្រ៊ីត ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ វេលាម៉ោង១៦ និង៣០នាទី កាលពីថ្ងៃទី១៣ ខែសីហា ឆ្នាំ២០២១។

ជនសង្ស័យឈ្មោះ ណុប គីមទ្រី  ភេទប្រុស អាយុ២០ឆ្នាំ ជនជាតិខ្មែរ មុខរបរដឹកអីវ៉ាន់តាមអនឡាញ ស្នាក់នៅបន្ទប់ជួល ផ្លូវបេតុង ភូមិប៉ប្រកខាងត្បូង សង្កាត់កាកាប ខណ្ឌពោធិ៍សែនជ័យ (មានសារធាតុញៀន) មធ្យោបាយដោយម៉ូតូ ០១គ្រឿង ម៉ាកនិច ផលិតឆ្នាំ២០២០ ពណ៌ស ពាក់ស្លាកលេខភ្នំពេញ 1GK-9256។ ជនសង្ស័យបានធ្វើសកម្មភាពឆក់យកទូរស័ព្ទដៃ ០១គ្រឿង មិនបានសម្រេចរបស់ជនរងគ្រោះឈ្មោះ YI FENPING  ភេទស្រី អាយុ៣៦ឆ្នាំ ជនជាតិចិន មុខរបរបុគ្គលិកររោងចក្រ កាន់លិខិតឆ្លងដែន EE9776768 បច្ចុប្បន្នស្នាក់នៅបន្ទប់ជួល ផ្លូវបេតុង ភូមិតាងួន សង្កាត់កាកាប១ ខណ្ឌពោធិ៍សែនជ័យ។ 
ជនសង្ស័យត្រូវបានសមត្ថកិច្ចឃាត់ខ្លួនយកទៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនិតិវិធី៕

អត្ថបទ៖ រ៉ាវុទ្ធ