ចុះឆែកឆេរ រកឃើញ​ស្ថានីយប្រេងឥន្ធនៈ ២ ទីតាំងលក់សាំង​មិន​គ្រប់លីត្រ

មន្ត្រីការពារអ្នកប្រើប្រាស់ កិច្ចការប្រកួតប្រជែង និង បង្ក្រាបការក្លែងបន្លំសាខារាជធានីភំ្នពេញ​(ក.ប.ប.) កាលពីថ្ងៃទី ១៦ សីហា បានចុះអង្កេត និង តាមដានតម្លៃប្រេងឥន្ធនៈនៅតាមស្ថានីយ/ដេប៉ូ ចំនួន ១៧ ទីតាំង ក្នុងនោះ ២ ទីតាំង ត្រូវបានរកឃើញថា ប្រកបអាជីវកម្មមិនសុចរិត។

មន្ត្រីសាខា ក.ប.ប. រាជធានីភំ្នពេញ បានបញ្ជាក់ថា ក្នុងចំណោមទីតាំងចំនួន ១៧ ស្ថានីយនោះ មាន​ ១៥​ទីតាំង​​ដាក់លក់ក្នុងតម្លៃត្រឹមត្រូវស្របតាមប្រកាសរបស់ក្រសួងពាណិជ្ជកម្ម និង ២ ស្ថានីយ/ដេប៉ូ ត្រូវបានរកឃើញ​ភាពមិនអនុលោម​ ដែលបានប្រព្រឹត្តល្មើសនឹងច្បាប់ស្តីពីកិច្ចការពារអ្នកប្រើប្រាស់។

នៅថ្ងៃទី ១៦ សីហានោះដែរ មន្ត្រីក.ប.ប.ខេត្តតាកែវ ក៏បានរកឃើញស្ថានីយប្រេងឥន្ធនៈមិនមានអនុលោមភាព​ចំនួន ២ ទីតាំង បានលក់ប្រេងជូនអតិថិជនក្នុងរង្វាស់រង្វាល់មិនគ្រប់ចំនួន។

បន្ទាប់ពីរកឃើញភាពមិនប្រក្រតី មន្ត្រី ក.ប.ប. បានធ្វើការពិន័យដល់ម្ចាស់សា្ថនីយទៅតាមនីតិវិធីដែលមានចែងក្នុងច្បាប់ ស្ដីពិកិច្ចការពារអ្នកប្រើប្រាស់។

ជាមួយគ្នានោះផងដែរ មន្ត្រី ក.ប.ប. ក៏បានធ្វើការណែនាំដល់ម្ចាស់ស្ថានីយទាំងអស់ឲ្យប្រកបអាជីវកម្មរបស់ខ្លួនដោយតម្លាភាព និង សមធម៌ ព្រមទាំងឈរលើស្មារតីសុចរិតភាព និង ការទទួលខុសត្រូវ៕

អត្ថបទ ៖ សំអឿន