ព័ត៌មានជាតិ

ក្រូចពោធិ៍សាត់ខេត្តបាត់ដំបង នៅតែរក្សាតម្លៃដដែលក្នុងរដូវកាលកូវីដ ធ្វើឲ្យកសិករត្រេកអរខ្លាំង

បានផុស

៤ years មុន

នៅ

ថ្ងៃអង្គារ ១៧ សីហា ២០២១

ដោយ

ប្រជាកសិករដែលប្រកបមុខរបរដាំដំណាំក្រូចពោធិ៍សាត់ ក្នុងខេត្តបាត់ដំបង បើទោះបីគ្រានេះហត់នឿយបន្តិចក៏មានការសប្បាយចិត្ត ខណៈដែលរដូវនេះពួកគាត់កំពុងតែប្រមូលផលជាបណ្តើៗ ដើម្បីតម្រូវការដល់អតិថិជននិងអាជីវករ ដែលបានទៅទិញដល់ទីតាំងចម្ការក្នុងតម្លៃគួរសមដែលធ្វើឲ្យកម្រិតសេដ្ឋកិច្ចគ្រួសាររបស់ពួកគាត់រក្សាបានល្អប្រសើរបើទោះបីសង្គមជាតិកំពុងឋិតក្នុងវិបត្តិជំងឺកូវីដ១៩ជាសកលក៏ដោយចុះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រជាកសិករឈ្មោះ ជា ឆោវ័ន្ត ភេទប្រុស អាយុ២៤ឆ្នាំ រស់នៅភូមិអូរខ្ជាយ ឃុំវត្តតាមិម ស្រុកសង្កែ ខេត្តបាត់ដំបង ១រូបក្នុងចំណោមប្រជាកសិករជាអ្នកប្រកបរបរដូចគ្នានេះ បានរៀបរាប់ឲ្យដឹងកាលពីថ្ងៃទី១៦ ខែសីហានេះថា គ្រួសារលោកកំពុងប្រមូលផលផ្លែក្រូចជាបណ្តើៗសម្រាប់តម្រូវការរបស់អតិថិជន និងអាជីវករមកទិញដល់ចម្ការ ក្នុងតម្លៃ១ផ្លូនស្មើនិង៤០ផ្លែក្រូច បានតម្លៃ៦ម៉ឺនរៀល សម្រាប់គ្រាប់ផ្លែលេខ១ហើយផ្លែលេខ២បាន៥ម៉ឺនរៀល និងលេខ៣បាន៤ម៉ឺនរៀល។

លោកបន្តថា ក្នុងតម្លៃខាងលើនេះ មិនបានធ្លាក់ចុះឬកើនឡើងជាងឆ្នាំកន្លងទៅនោះទេ គឺជាតម្លៃហ្នឹង(ថេរ)ដូចនិងឆ្នាំមុនៗដែរ ដែលក្រុមគ្រួសារលោកនិងកសិករផ្សេងទៀតទទួលយកបាន ខណៈការប្រមូលផលរបស់លោកលើផ្ទៃដីជិត១ហិកតា បើគិតជាដើមប្រហែលជិត១ពាន់ដើមក្នុងបច្ចុប្បន្ននេះ ដែលក្នុង១រដូវគិតជាថវិកាបានគួរសមធ្វើឲ្យសេដ្ឋកិច្ចគ្រួសារ លោកមានភាពប្រសើររាល់រដូវកាល។

លោករៀបរាប់បន្តថា ដំបូងឡើយលោកមានទំហំផ្ទៃដីដាំដុះត្រឹមជិត២រ៉ៃប៉ុណ្ណោះ ក្រោយពីបានចំណូលពីក្រូចនេះ លោកបានពង្រីកផ្ទៃដីបន្តិចម្តងៗទៅតាមកម្រិតគ្រួសារហើយរហូតមកដល់បច្ចុប្បន្ននេះ លោកបានពង្រីកផ្ទៃដីជិត១ហិកតាស្មើជិត១ពាន់ដើមក្រូច ក្នុងរយៈពេលដែលក្រុមគ្រួសារលោកបានចាប់របរនេះ បានរយៈពេល៥ឆ្នាំកន្លងមកហើយ ក្នុងទំហំខាងលើនេះ លោកអះអាងថា ក្នុង១រដូវក្រុមគ្រួសារលោកទទួលប្រាក់ចំណូលបានជិត១ម៉ឺនដុល្លារបើគិតជាមធ្យម។

លោកបន្តថា សម្រាប់រស់ជាតិផ្លែក្រូច ក្នុងចម្ការលោកមានរស់ជាតិគួរសមទៅតាមប្រភេទផ្លែហើយឆ្នាំនេះ ក៏មានអតិថិជននិងអាជីវករមកកុម្ម៉ង់ច្រើន ខណៈដែលលោកថែទាំមិនប្រើជីគីមីនោះទេ ដោយលោកថានិយាយជារួមលោកប្រើជីតាមដំណចាស់ទុំ(ដូនតា)ដែលពួកគាត់បានពន្យល់ពីរបៀបដាំនិងថែដោយប្រើជីធម្មជាតិសុទ្ធសាធមិនប៉ះពាល់សុខភាពអ្នកបរិភោគ ក៏ដូចជារក្សាភាពល្បីល្បាញតាំងពីសម័យដើមផង។

បើយោងតាមរបាយការណ៍របស់មន្ទីរកសិកម្មខេត្តបានបង្ហាញថា ដំណាំក្រូចពោធិ៍សាត់ក្នុងខេត្តបាត់ដំបង ប្រជាកសិករបានធ្វើការដាំដុះលើផ្ទៃដីសរុប៩២២ហិកតា ក្នុងនោះផ្ទៃដីប្រមូលផលសរុប៨២៤ហិកតានិងបរិមាណផលសរុប១១,៤៦២តោន និងទិន្នផលសរុប១៣,៩១០តោន៕

អត្ថបទ៖ សៅ សារិទ្ធ