អភិបាលរង ខេត្តកណ្តាល ៖ ដេប៉ូខ្សាច់ណា មិនមានអាជ្ញាប័ណ្ណស្របច្បាប់ ត្រូវបញ្ឈប់អាជីវកម្មជាបន្ទាន់

(កណ្ដាល)៖ អាជ្ញាធរខេត្តកណ្តាល បានណែនាំដល់អាជ្ញាធរក្រុង-ស្រុកទាំងអស់ ត្រូវគ្រប់គ្រងដេប៊ូខ្សាច់ឲ្យបានល្អ ហើយក្នុងករណីដេប៉ូខ្សាច់ណាមួយ មិនមានអាជ្ញាប័ណ្ណស្របច្បាប់ទេនោះ ត្រូវបញ្ឈប់អាជីវកម្មជាបន្ទាន់។

ថ្លែងនៅក្នុងកិច្ចជុំ ក្រុមការងារអាជីកម្មខ្សាច់ ដោយមានការចូលរួម ពីបណ្តាមន្ទីរពាក់ព័ន្ធ កងកម្លាំងមានសមត្ថកិច្ច អាជ្ញាធរក្រុង-ស្រុក និងមន្ត្រីជំនាញ តាមរយៈប្រព័ន្ធវីដេអូ Zoom Meeting នៅសាលាខេត្តកណ្តាល នៅព្រឹកថ្ងៃទី១៧ សីហានេះ លោក ណុប ដារ៉ា អភិបាលរងខេត្តកណ្តាល បានជំរុញដល់អាជ្ញាធរក្រុង-ស្រុក ត្រូវគ្រប់គ្រងដេប៊ូខ្សាច់ឲ្យបានល្អ បើដេប៊ូខ្សាច់ណាមួយមិនមានអាជ្ញាប័ណ្ណស្របច្បាប់ ត្រូវបញ្ឈប់អាជីវកម្មជាបន្ទាន់។

លោកអភិបាលរងខេត្ត បានណែនាំទៀតថា រាល់ការដឹក ខ្សាច់ត្រូវអនុវត្ត តាមបទដ្ឋានបច្ចេកទេសត្រឹមត្រូវ កុំឲ្យហុយ និងជ្រុះខ្សាច់មកលើផ្លូវ ធ្វើឲ្យប៉ះពាល់ដល់អ្នកធ្វើដំណើរ និងប្រជាពលរដ្ឋរស់នៅតាមដងផ្លូវ។ លោកអភិបាលរងខេត្ត បានបញ្ជាក់ថា អាជ្ញាធរគ្រប់លំដាប់ថ្នាក់ ត្រូវផ្ដល់ព័ត៌មានមកដល់ថ្នាក់ខេត្ត ដើម្បីមានវិធានការ នៅពេលដែលមានភាពមិនប្រក្រតី កើតឡើងក្នុងមូលដ្ឋានខ្លួន៕ (ដោយ)៖ សំអឿន