អាជ្ញាធរក្រុងបូកគោ​កំពុងពន្លឿនការងារ​ផ្ដល់សេវាសាធា​រណៈ​ដល់ពលរដ្ឋ

រដ្ឋបាលក្រុងបូកគោ ត្រូវបានប្រកាសដាក់ឱ្យដំណើរការជាផ្លូវការកាលពីថ្ងៃទី ១២ ខែសីហា សប្ដាហ៍មុន ដែលមានលោក ស្រី ងិន ផលរ័ត្ន ជា​អភិបាលក្រុងបូកគោថ្មី។

អភិបាលក្រុងថ្មី និងមន្ត្រីថ្នាក់ក្រោម កំពុងតែពន្លឿនទៅលើការងារផ្ដល់សេវាសាធារណៈ ជូនប្រជាពលរដ្ឋឱ្យបានឆាប់ ខណៈដែលបច្ចុប្បន្នមិនទាន់ដំណើរការបនពេញលេញនៅឡើយនោះទេ។

លោក ឡេង វិបុល នាយករដ្ឋបាលក្រុងបូកគោ ប្រាប់កម្ពុជាថ្មីនៅថ្ងៃទី ១៧ ខែ សីហា នេះថា រដ្ឋបាលក្រុងកំពុង​ពន្លឿនការងារផ្ដល់សេវា ក្នុងការរៀបចំបន្តនិរន្តភាពក្នុងការផ្ដល់សេវា លោកថា ឥឡូវនេះ ការផ្ដល់សេវាមិនទាន់អាចដំណើរការទៅបានទេ ដោយកំពុងរៀបចំផ្ទេរឯកសារពីក្នុងឃុំ សង្កាត់ទាំង ៣ នោះ ដែលកាលពីមុនឯកសារដើម គឺនៅស្រុកទឹកឈូ។

លោកបញ្ជាក់ថា ” ឥឡូវយើងកំពុងតែសហការជាមួយ ស្រុកទឹកឈូ ដើម្បីរៀបចំក្បាលបញ្ជីបញ្ជូនមករដ្ឋបាល ក្នុងរយៈពេលនេះ មានការយឺតយ៉ាវបន្តិច ដោយសារឯកសារសាធារណមួយចំនួនទាក់ទងនឹងដីធ្លី មានភាពស្មុគស្មាញ​ ប៉ុន្តែយ៉ាងយូរ ២ សប្តាហ៍ទៀត សេវាសារធារណៈនឹងដំណើរពេញលេញ”។

រាជរដ្ឋាភិបាល បានសម្រេចបង្កើត ក្រុងបូកគោ នៃខេត្តកំពត ដោយកាត់យកឃុំចំនួន៣ ពីស្រុកទឹកឈូ គឺឃុំ​បឹងទូក ឃុំកោះតូច និងឃុំព្រែកត្នោត ដោយសារស្ថានភាពស្រុកទឹកឈូ មានភូមិសាស្ត្រផ្ទៃដីធំទូលាយ និងមានប្រជាពលរដ្ឋរស់​នៅច្រើន ដែលធ្វើឲ្យអាជ្ញាធរស្រុក ជួបការលំបាក ក្នុងការគ្រប់គ្រងរដ្ឋបាល ការផ្តល់សេវាសាធារណៈ សេវារដ្ឋបាលនានា ការថែរក្សាសន្តិសុខ សណ្តាប់ធ្នាប់សាធារណៈ៕