អ្នក​​ឧកញ៉ា ​ឡេង ណាវ៉ាត់ ត្រា ប្រកាស​ជួយ​ទិញ​ផ្លែ​មៀន​ពី​កសិករ ១០០០ តោន​ យក​មក​លក់​តម្លៃ​ខាត​ដើម

អ្នក​ឧកញ៉ា នៅប៉ុន្មាននាទីមុនេះ បានប្រកាសជួយទិញផ្លែមៀន និងផ្លែតាង៉ែន ចំនួន ១ ពាន់តោន (១០០០) យកមកដាក់លក់ក្នុងតម្លៃខាតដើមនៅផ្សារកសិផលឡេងណាវ៉ាត់ត្រា។

នៅលើផេកផ្លូវការរបស់អ្នកឧកញ៉ា ឡេង ណាវ៉ាត់ត្រាបានលើកឡើងថា ការលំបាករបស់ ប្រជាកសិករ ការលំបាករបស់រាជរដ្ឋាភិបាល ក៏ដូចជាការលំបាករបស់រូបលោក ហើយលោកមានចំណូល និងជីវភាពល្អក៏ដោយសារតែប្រជាកសិករ និងរាជរដ្ឋាភិបាល។

អ្នក​ឧកញ៉ា​លើកឡើងថា “ដូច្នេះហើយអ្វីដែលអាចជួយបាន យើងត្រូវតែជួយគ្នា ខ្ញុំសម្រេចជួយទិញមៀន​ឬតាង៉ែន ចំនួន ១០០០ តោន ដាក់ក្នុងផ្សារកសិផលឡេងណាវ៉ាត់ត្រា ដោយលក់ក្នុងតម្លៃខាតដើម”។

អ្នក​ឧកញ៉ា បញ្ជាក់ថា លក្ខណ្ឌនៃការទិញ របស់លោក គឺទិញតែពីកសិករ ដាំលក្ខណៈគ្រួសារ ប៉ុណ្ណោះមិនទិញពីក្រុមហ៊ុននិងកសិដ្ឋានធំៗនោះទេ។

អ្នកឧកញ៉ា ឡេង ណាវ៉ាត់ត្រា ជឿជាក់ថា ពុកម៉ែបងប្អូនទាំងអស់ សុទ្ធតែមានបំណងចង់ជួយជ្រុំជ្រែងប្រជាកសិករដែលកំពុងជួបប្រទះនូវការលំបាក ដោយសារជំងឺកូវីដ១៩ ដែលជាវិបត្តិទូទាំងពិភពលោក។ លោកលក់ចេញតែក្នុងតម្លៃ ១៩០០រៀល ក្នុងមួយគីឡូ។

ប្រមុខរាជរដ្ឋាភិបាលកម្ពុជាកាលពីពេលថ្មីៗនេះ បានសម្រេចឲ្យក្រុមការងារប្រមូលទិញផ្លែមៀនប៉ៃលិន (តាង៉ែត) ពីបងប្អូនប្រជាកសិករកំពុងជួបបញ្ហាកង្វះទីផ្សារ ខណៈផែ្លតាង៉ែតជាច្រើនតោននាំចេញទៅប្រទេសថៃត្រូវបានអាជ្ញាធរប្រទេសនេះបិទច្រកព្រំដែនមិនឲ្យនាំចូល៕