អគ្គីភ័យ ឆេះ​ផ្ទះ​​ពលរដ្ឋច្រើនខ្នង នៅខេត្តត្បូងឃ្មុំ

ផ្ទះប្រជាពលរដ្ឋចំនួន ៦ ខ្នង ត្រូវបាន​អគ្គីភ័យ​ឆាបឆេះ ដោយសារឆ្លងចរន្ត​អគ្គិសនី​ នាវេលាម៉ោង ៨ និង ​៣០​ នាទីព្រឹកថ្ងៃទី ២៦ ខែវិច្ឆិកា ឆ្នាំ ២០២០ ស្ថិតនៅក្នុងភូមិវាលឃ្មុំ ឃុំគរ ស្រុកត្បូងឃ្មុំ ខេត្តត្បូងឃ្មុំ ។

របាយការណ៍បានឲ្យដឹងថា ផ្ទះដែលឆេះ ក្នុងនោះមាន ៤​ខ្នង ធ្វើពីឈើប្រក់ក្បឿង ឆេះរាបដល់ដី និងផ្ទះ ១ខ្នងទៀត ធ្វើពីឈើប្រក់ក្បឿង ឆេះអស់មួយចំហៀង ដោយឡែកផ្ទះមួយខ្នងទៀត ឆេះតែដំបូលបន្តិច ។

មន្ត្រី​ជំនាញ​ពន្លត់​អគ្គីភ័យ​បានឲ្យដឹងថា ក្រោយពីទទួលបាន​ព័ត៌មាន​ភ្លាម កម្លាំង​បានចុះទៅ​ជួយ​អន្តរាគមន៍ ភ្លាមៗ ដោយមានរថយន្តពន្លត់​អគ្គីភ័យ​របស់ស្រុកត្បូងឃ្មុំ ស្រុកអូររាំងឳ និងរថយន្តពន្លត់​អគ្គីភ័យ​ខេត្តត្បូង​ឃ្មុំ ជួយ​អន្តរាគមន៍​ពន្លត់ និងគ្រប់គ្រង​ស្ថានការណ៍​បានទាំងស្រុង នៅវេលាម៉ោងជិត​១២​ថ្ងៃត្រង់ ថ្ងៃ​ដដែល​ ខណៈករណីនេះ ​មិនមាន​​គ្រោះថ្នាក់ដល់ជីវិតមនុស្សនោះទេ រីឯ​ទ្រព្យសម្បត្តិ​​ខូចខាតពុំទាន់​មានរបាយ​ការណ៍​ជាក់​លាក់នៅឡើយទេ ព្រោះសមត្ថកិច្ចកំពុងធ្វើការសាកសួរម្ចាស់ផ្ទះ៕

អត្ថបទ ៖ សាន វិឡែម