ឃាត់ខ្លួន​ចិនជិត​១០០​នាក់ ខុនដូរ​មួយកន្លែង​​នៅ​ខណ្ឌ​ចំការមន

រាជធានីភ្នំពេញ ៖ ក្រុមជនជាតិចិនប្រុសស្រីជិត១០០នាក់ ត្រូវបានកម្លាំងកងរាជអាវុធហត្ថរាជធានីភ្នំពេញ ធ្វើការបង្ក្រាប ដោយបានឃាត់ខ្លួននៅក្នុងខុនដូរដ៏ធំមួយកន្លែង ស្ថិតតាមបណ្តោយផ្លូវលេខ៥០៨ ក្នុងសង្កាត់ផ្សារដើមថ្កូវ ខណ្ឌចំការមន កាលពីវេលាម៉ោង១០ព្រឹកថ្ងៃទី២១ ខែសីហា ឆ្នាំ២០២១ ។

ប្រតិបត្តិការ នៃការចុះបង្ក្រាបខាងលើនេះ ធ្វើឡើងដោយមានការចង្អុលបង្ហាញ ពីឯកឧត្តមនាយឧត្តមសេនីយ៍ផ្កាយមាស៤ សៅ សុខា អគ្គមេបញ្ជាការរងកងយុទ្ធពលខេមរភូមិន្ទ និងមេបញ្ជាការកងរាជអាវុធហត្ថលើផ្ទៃប្រទេស និង ដោយមានការដឹកនាំកម្លាំង និងបញ្ជារផ្ទាល់ ដោយលោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ។

ជុំវិញ ប្រតិបត្តិការខាងលើនេះ ពុំមានប្រភពច្បាស់លាស់ណាមួយពីមន្ត្រីកងរាជអាវុធហត្ថ ថាតើពាក់ព័ន្ធនឹងករណីអ្វីអោយប្រាកដឡើយ។ យ៉ាងណាមិញ ក្រោយការបង្ក្រាប ក្រុមជនសង្ស័យជាជនជាតិចិនទាំងជិត១០០នាក់ ត្រូវបានបញ្ចូនខ្លួនទៅកាន់ទីបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីសាកសួរនាំ និងបន្តនីតិវិធី ៕ លីហេង