ព័ត៌មានជាតិ

សម្ដេចពិជ័យសេនា ទៀ បាញ់ អំពាវនាវឲ្យចូលរួមអនុវត្តឲ្យបានពេញលេញ ដើម្បីប្រយុទ្ធប្រឆាំងជំងឺកូវីដ១៩

បានផុស

៤ years មុន

នៅ

ថ្ងៃចន្ទ ២៣ សីហា ២០២១

ដោយ

ការអំពាវនាវរបស់សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានធ្វើឡើងនៅក្នុងពិធីប្រគល់ និងទទួលវ៉ាក់សាំងបង្ការជំងឺកូវីដ-១៩ ប្រភេទស៊ីណូហ្វាម (Sinopharm) ចំនួន៥០ម៉ឺនដូស ដែលជាជំនួយរបស់កងទ័ពរំដោះប្រជាជនចិន ផ្តល់ជូនក្រសួងការពារជាតិនៃព្រះរាជាណាចក្រកម្ពុជា នារសៀលថ្ងៃទី២៣ ខែសីហា ឆ្នាំ២០២១នេះ។

មានប្រសាសន៍នៅក្នុងពិធីនោះ សម្ដេចពិជ័យសេនា ទៀ បាញ់ បានថ្លែងអំណរគុណចំពោះស្មារតីសាមគ្គីភាព នឹងជួយគ្នាទៅវិញទៅមក ក្នុងគ្រាលំបាករបស់ប្រទេសជាមិត្ត ដែលបានផ្ដល់វ៉ាក់សាំងបានទាន់ពេលវេលា ជាពិសេសសាធារណរដ្ឋប្រជាមានិតចិន ដែលជាប្រទេសឈានមុខគេក្នុងការផ្ដល់វ៉ាក់សាំង ទាំងជំនួយមនុស្សធម៌ និងការបញ្ជាទិញ។

ជាមួយគ្នានោះ សម្ដេចពិជ័យសេនា ទៀ បាញ់ បានអំពាវនាវដល់ក្រុមគ្រូពេទ្យ កងទ័ព មន្ត្រីរាជការ ថ្នាក់ដឹកនាំ ក៏ដូចជាប្រជាពលរដ្ឋទាំងអស់ ចូលរួមសហការអោយបានសកម្ម និងពេញលេញជាមួយរាជរដ្ឋាភិបាល ក្នុងការប្រយុទ្ធប្រឆាំងជំងឺកូវីដ១៩ ដោយអនុវត្ត និងប្រកាន់ខ្ជាប់នូវវិធានការសុខាភិបាល ជាពិសេសវិធានការ ៣ការពារ ៣កុំ និងចូលរួមយុទ្ធនាការជាតិចាក់វ៉ាក់សាំង ដែលជាយុទ្ធនាការជាតិទប់ស្កាត់ការឆ្លងរាលដាលនៃជំងឺកូវី១៩ ដើម្បីរួមគ្នាការពារសុវត្ថិភាព ក៏ដូចជាសុខមាលភាពរបស់គ្រួសារ សហគមន៍ និងសង្គមជាតិទាំងមូល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសម្ដេចពិជ័យសេនា ទៀ បាញ់ បច្ចុប្បន្នប្រទេសកម្ពុជា ក៏ដូចជាបណ្ដាប្រទេសជាច្រើនលើពិភពលោក បាននឹងកំពុងផ្ដោតការយកចិត្តទុកដាក់យ៉ាងខ្លាំង លើយុទ្ធនាការចាក់វ៉ាក់សាំង ដែលជាដំណោះស្រាយដ៏សមស្របបំផុត ដើម្បីគ្រប់គ្រងការឆ្លងរាលដាលនៃជម្ងឺកូវីដ-១៩ ក៏ដូចជាប្រភេទមេរោគបំប្លែងថ្មីផងដែរ។ ដូច្នេះនៅក្នុងបរិការណ៍នេះ វ៉ាក់សាំង គឺជាទំនិញយុទ្ធសាស្ត្រគន្លឹះ និងមានតម្រូវការខ្ពស់ក្នុងសមរភូមិប្រយុទ្ធប្រឆាំងជំងឺ Covid-19 នៅទូទាំងពិភពលោក។

ដោយយល់ពីសារសំខាន់ និងអត្ថប្រយោជន៍ នៃវ៉ាក់សាំងនេះ រាជរដ្ឋាភិបាលកម្ពុជា ក្រោមការដឹកនាំប្រកបដោយឈ្លាសវៃរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានព្យាយាមខិតខំស្វែងរកប្រាសាទតាមរយៈយន្តការផ្សេងៗ ជាទ្វេភាគីក្តី ជាពហុភាគីក្តី និងក្នុងនាមជាជំនួយមនុស្សធម៌ក្តី តាមរយៈការបញ្ជាទិញក្តី ដើម្បីធានាបាននូវចំនួនវ៉ាក់សាំងគ្រប់គ្រាន់ និងទាន់ពេលវេលាដែលបានកំណត់៕

ដោយ ៖ កោះកែវ