ព័ត៌មានជាតិ

នាយឧត្តមសេនីយ៍ ខៀវ សុភ័គ ប្រាប់ពីដំណើរទៅកាន់សាធារណរដ្ឋបារាំងរបស់សម្តេចក្រឡាហោម ស ខេង

បានផុស

៣ years មុន

នៅ

ថ្ងៃចន្ទ ២៣ សីហា ២០២១

ដោយ

សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួង មហាផ្ទៃ បានធ្វើដំណើរទៅប្រទេសបារាំងចាប់ពីថ្ងៃទី២២ ខែសីហា រហូតដល់ថ្ងៃទី០៥ ខែកញ្ញា ឆ្នាំ២០២១ នេះបើយោងតាម សេចក្តីជូនដំណឹងរបស់ខុទ្ទកាល័យ ចុះថ្ងៃទី២២ ខែសីហា ហើយបើតាមនាយឧត្តមសេនីយ៍ ខៀវ សុភ័គ អះអាងថា ដោយសារតែមានធុរៈខ្លួន មិនមានអ្វីក្រៅពីនេះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងប្រាប់កម្ពុជាថ្មី នៅថ្ងៃទី២៣ ខែសីហា នេះថា “តាមដឹង ពុំមានអីទេ គាត់មានធុរៈផ្ទាល់ខ្លួន មានការត្រួតពិនិត្យសុខភាពរបស់គាត់ ហើយការត្រួតពិនិត្យសុខភាពរបស់គាត់អាចប្រើពេលពីរបីថ្ងៃដែរ ហើយត្រូវសំរាក ការងារគ្រួសារ ជារួមគាត់មានការការងារផ្ទាល់ខ្លួនតែម្តង”។

សូមបញ្ជាក់ថា តាមសេចក្តីជូនដំណឹងរបស់ខុទ្ទកាល័យ សម្តេចក្រឡាហោម ស ខេង ឧបនាយក រដ្ឋមន្ត្រី រដ្ឋមន្ត្រីក្រសួងមហាផ្ទៃ នៅថ្ងៃទី២២ ខែសីហា បានឲ្យដឹងថា ដោយមានធុរៈផ្ទាល់ខ្លួន និងបានទទួលការអនុញ្ញាតដ៏ខ្ពង់ខ្ពស់ពី សម្តេចអគ្គមហាសេនាបតីតជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញធ្វើដំណើរទៅកាន់សាធារណរដ្ឋបារាំង ចាប់ពីថ្ងៃទី ២២ ខែ សីហា រហូតដល់ថ្ងៃទី ០៥ ខែកញ្ញា ឆ្នាំ២០២១។

ខុទ្ទកាល័យសម្តេចក្រឡាហោម ស ខេង បានបញ្ជាក់ថា ក្នុងរយៈពេលអវត្តមាននេះ លោកសក់ សេដ្ឋា រដ្ឋលេខាធិការប្រចាំការ ទទួលភារកិច្ចជារដ្ឋមន្ត្រីស្តីទី ដើម្បីដឹកនាំការងារទូទៅរបស់ក្រសួងមហាផ្ទៃរហូតដល់សម្តេចក្រឡាហោម ស ខេង អញ្ជើញវិលត្រឡប់មកដល់មាតុប្រទេសវិញ៕

ដោយ ៖ កោះកែវ