បញ្ជូនស្ត្រីម្នាក់ចេញសែកអត់​លុយ ជិត ៣ ម៉ឺនដុល្លារ ឡើងតុលាការ

នគរបាលព្រហ្មទណ្ឌកំរិតស្រាលរាជធានីភ្នំពេញ នាព្រឹកថ្ងៃទី ២៥ សីហា ឆ្នាំ២០២១នេះ បានបញ្ជូនស្ត្រី ឈ្មោះ ឃុយ ភាព អាយុ ៥៦ ឆ្នាំ ឡើងតុលាការពីបទមិនបំពេញកាតព្វកិច្ចចំពោះឧបករណ៍អាចជួញដូរបាន។

សមត្ងកិច្ចបានបញ្ជាក់ឱ្យដឹងថា ការចាប់ខ្លួនស្ត្រីឈ្មោះ ឃុយ ភាព រស់នៅភូមិទួលគោក សង្កាត់ទួលសង្កែ គឺអនុវត្តតាមដីកាបង្គាប់ឱ្យនាំខ្លួនរបស់លោក ឯក ប៉ូលីហ្វៀល ចៅក្រមសើបសួរសាលាដំបូងរាជធានីភ្នំពេញ បន្ទាប់ពីជនត្រូវចោទគេចវេសមិនព្រមចូលខ្លួនមកឆ្លើយបំភ្លឺនៅតុលាការ។

ប្រភពដដែលបន្តថា អំឡុងឆ្នាំ២០១៨ ឈ្មោះ ឃុយ ភាព បានចេញមូលប្បទានប័ត្រ២សន្លឹកមានទឹកប្រាក់ចំនួន២៩ ០០០ដុល្លារឱ្យទៅឈ្មោះ ឃុយ សុភាព និងសួន ចន្ថា។

លុះដល់ថ្ងៃបើកលុយស្រាប់តែខាងធនាគារ អេសុីលីដា បញ្ជាក់ថា សែកនោះគ្មានលុយមួយរៀលទេ ហើយឈ្មោះ ឃុយ ភាព គេចវេសមិនព្រមដោះស្រាយ ទើបម្ចាស់ប្រាក់ប្ដឹងមកអយ្យការអមសាលាដំបូង ហើយតុលាការកោះហៅជាបន្តបន្ទាប់ តែជនសង្ស័យមិនព្រមចូលខ្លួនសោះទើបចៅក្រមសើបសួរបង្គាប់អោយនាំខ្លួនតែម្ដង។

ឥឡូវនេះចៅក្រមសើបសួរកំពង់សាកសួរជនជាប់ចោទនៅឡើយ៕ ដោយ៖ មករា