រដ្ឋាភិបាលចំណាយថវិកាជិត៨លានដុល្លារសម្រាប់ពលរដ្ឋជាង១២ម៉ឺនគ្រួសាររងគ្រោះក្រោយបិទខ្ទប់

​រដ្ឋាភិបាល​បាន​ចំណាយ​ថវិកា​ប្រមាណ​ជិត​៨​លាន​ដុល្លារ​សម្រាប់​ឧបត្ថម្ភ​ដល់​ប្រជា​ពលរដ្ឋ​ជាង​១២​ម៉ឺន​គ្រួសារ​រងគ្រោះ​ក្រោយពេល​បិទ​ខ្ទប់ អ្នកស្លាប់​និង​អ្នក​ឆ្លង​ជំងឺ​កូ​វីដ​-១៩​ក្នុង​ព្រឹត្តិការណ៍​សហគមន៍​២០​កុម្ភៈ​។​

គម្រោង​ចំណាយ​ថវិកា​ជិត​៨​លាន​ដុល្លារ​នេះ​ត្រូវ​បានបង្ហាញ​នៅក្នុង​កិច្ចប្រជុំ​បូកសរុប​លទ្ធ​ផល​នៃ​ការអនុវត្ត​កម្មវិធី​ជំនួយ​សង្គម​ជា​សាច់ប្រាក់​ក្រោយពេល​បិទ​ខ្ទប់ និង​កម្មវិធី​ជំនួយ​សង្គម​សម្រាប់​គ្រួសារ​ដែលមាន​អ្នកស្លាប់ និងមាន​អ្នក​ឆ្លង​ជំងឺ​កូ​វីដ​-១៩តាម​ប្រព័ន្ធ Zoom​នៅ​ថ្ងៃទី​២៥​សីហា​នេះ​ក្រោម​អធិបតីភាព​លោក វង សូត រដ្ឋមន្ត្រីក្រសួង​សង្គមកិច្ច អតីតយុទ្ធជន និង​យុវនីតិសម្បទា​។​

បើតាម​របាយការណ៍​បានឱ្យដឹងថា ​ជា​លទ្ធផល​នៅ​ទូទាំងប្រទេស​រដ្ឋាភិបាល​បាន​ចំណាយ​ថវិកា​អនុវត្ត​កម្មវិធី​ជំនួយ​សង្គម​ជា​សាច់ប្រាក់​ក្រោយពេល​បិទ​ខ្ទប់ និង​កម្មវិធី​ជំនួយ​សង្គម​សម្រាប់​គ្រួសារ​ដែលមាន​អ្នកស្លាប់ និងមាន​អ្នក​ឆ្លង​ជំងឺ​កូ​វីដ​-១៩​ចំនួន​១២១,៣៩៧​គ្រួសារដោយ​ចំណាយ​ថវិកា​ចំនួន​៣១,៦៥៩,៦៦៦,៦០០​រៀល ​ស្មើនឹង​៧៩១៤៩១៦.៦៦​ដុល្លារ​ ក្នុងនោះ​

១-​គ្រួសារ​ដែលមាន​ការលំបាក​ផ្នែក​ជីវភាព​មាន​ចំនួន ១០៨,៩៣០​គ្រួសារ ស្មើនឹង​ទឹកប្រាក់ ២៧,៨៥៤,៩៦៧,៧០០​រៀល ។​

២-​គ្រួសារ​ដែលមាន​ឆ្លង​ជំងឺ​កូ​វីដ​-១៩​មាន​ចំនួន ១១,៩០២​គ្រួសារ ស្មើនឹង​ទឹកប្រាក់​៣,៣៩៦,០៤៨,៩០០​រៀល​។​

៣-​គ្រួសារ​ដែលមាន​អ្នកស្លាប់​ដោយសារ​ជំងឺ​កូ​វីដ​-១៩​មាន​ចំនួន ៥៦៥​គ្រួសារ ស្មើនឹង​ទឹកប្រាក់ ៤០៨,៦៥០,០០០​រៀល សរុប​ទាំងអស់ ១២១,៣៩៧​គ្រួសារ ស្មើនឹង​ទឹកប្រាក់ ៣១,៦៥៩,៦៦៦,៦០០​រៀល​ស្មើនឹង​៧៩១៤៩១៦.៦៦​ដុល្លារ​។​

នៅក្នុង​កិច្ចប្រជុំ​នោះបាន​សម្រេច​ដាក់​ទិសដៅ​ការងារ​បន្ត​ក្នុងនោះ​រួមមាន​ចូលរួម​ដោះស្រាយ​ភាព​មិនប្រក្រតី​របស់​ម​ន្ត្រី និង​អ្នកទទួលផល​សម្រាប់​យន្តការ​បន្ត ។​ បន្ត​សហការ​ជាមួយ​ក្រសួងនិង​មន្ទីរ​ផែនការ​ក្នុងការ​កំណត់​អត្តសញ្ញាណ​គ្រួសារ​ដែល​ឆ្លង​ជំងឺ​កូ​វីដ​-១៩ ហើយ​មាន​ជីវភាព​លំបាក ។ បន្ត​សហការ​ជាមួយ​រដ្ឋបាល​រាជធានី​ខេត្ត ក្រុង ​ស្រុក ​ខណ្ឌ និង​ឃុំ​សង្កាត់​ក្នុងការ​ស្វែងរក​អត្តសញ្ញាណ​គ្រួសារ​សព​និង​ពង្រឹង​យន្តការ​របស់​រដ្ឋបាលថ្នាក់ជាតិ និង​ថ្នាក់ក្រោម​ជាតិ​ដើម្បី​គាំទ្រ​ការអនុវត្ត​កម្មវិធី​អោយមាន​ប្រសិទ្ធិភាព​៕

អត្ថបទ ៖​ ​សំអឿន​