កូវីដដែល​តា ​ឆ្លង​ដល់​ ២៣ ខេត្ត​ក្រុង មាន​​ខេត្ត​ចំនួន​ពីរ មិន​ទាន់​មានមួយ​ករណី

ក្រសួង​សុខាភិបាល​បាន​បញ្ជាក់​​កូវីដ​បំប្លែង​ខ្លួន​ដែលតា បាន​ឆ្លង​រីករាល​ដាល​ដល់ ២៣ ខេត្ត​ក្រុង តួលេខ​សរុប​​កើន​ដល់ ១៥៣៤ នាក់​។

គិត​មក​ដល់​ថ្ងៃ ២៦ សីហា​ឆ្នាំ​២០២១ ​មាន​ខេត្ត​ចំនួន​ពីរនៅ​មិន​ទាន់​រកឃើញ​កូវីដ​បំប្លែង​ខ្លួន​មាន​​ប្រភព​មកពី​ឥណ្ឌា​​​គឺ​ខេត្ត​កែប និង​ខេត្ត​ក្រចេះ។

លទ្ធផលធ្វើការ​វិភាគដោយវិទ្យាស្ថានប៉ាស្ទ័រកម្ពុជា តាំងពីថ្ងៃទី៣១ ខែមីនា ឆ្នាំ២០២១ និង វិទ្យាស្ថានស្រាវជ្រាវសុខភាពសាធារណៈ រហូតមកដល់ថ្ងៃទី២៦ ខែសីហានេះ វីរុសកូវីដ-១៩ បំប្លែងថ្មីប្រភេទ B 1.672 (Delta) បាន​រកឃើញ​ទាំងលើអ្នកដំណើរមកពីបរទេសតាមជើងហោះហើរ ពលករខ្មែរត្រលប់ពីប្រទេសថៃ ពីប្រទេសវៀតណាម ប្រជាជនអ្នកភូមិនៅក្នុងសហគមន៍ ក្រុមហ៊ុនឯកជន បុគ្គលិកសុខាភិបាល អាជីវករ មន្ត្រីរាជការ យោធា ពិរុទ្ធជន អ្នកបកប្រែ ភាសា ជនជាតិបរទេស បុគ្គលិករោងចក្រកាត់ដេរ បុគ្គលិកធនាគារ ដូនជីនៅវត្ត និង សិស្ស សរុបទាំងអស់ចំនួន ១៥៣៤ នាក់ (ស្រ្តី ៧៦៤នាក់) ហើយបានប៉ះពាល់ដល់​២៣រាជធានី-ខេត្ត លើកលែងតែ២ខេត្តប៉ុណ្ណោះ គឺ ខេត្តកែប និងខេត្តក្រចេះ នៅមិនទាន់រកឃើញករណ៏ដែលតានៅឡើយ។

ខេត្ត​ក្រុង​ចំនួន​ ៧ កំពុង​រងគ្រោះ​ធ្ងន់ជាង​គេ​មាន​ រាជធានីភ្នំពេញ ខេត្តឧត្តរមានជ័យ សៀមរាប ព្រះវិហារ កំពង់ចាម កំពង់ធំ កណ្ដាល បន្ទាយមានជ័យ។

រដ្ឋមន្ត្រីក្រសួងសុខាភិបាលកម្ពុជា នៅ​តែ​បន្តក្រើនរំលឹកដល់សាធារណជន ប្រជាពលរដ្ឋឱ្យបន្តប្រុងប្រយ័ត្នខ្ពស់ ការពារខ្លួន កុំភ្លេចខ្លួនឲ្យសោះ ដោយត្រូវចេះផ្លាស់ប្តូរទម្លាប់រស់នៅ ដើម្បី​ប្រយុទ្ធកូវីដ-១៩ សំដៅបង្ការ គ្រប់គ្រង និងកាត់ផ្តាច់នូវខ្សែចម្លងនៃវីរុសកូវីដ-១៩ ជាពិសេសពពួកប្រភេទបំប្លែងថ្មីនេះ ឬក ប្រភេទថ្មីផ្សេងទៀត៕

អត្ថបទ៖ ប៊ុណ្ណារ៉ា