ព័ត៌មានជាតិ

កម្មកររោងចក្រជិត ២០០ នាក់ ប៉ះពាល់ជាមួយអ្នកមានវីរុស Delta ខណៈនេះតេស្តអវិជ្ជមានទាំងអស់

បានផុស

៣ years មុន

នៅ

ថ្ងៃសៅរ៍ ២៨ សីហា ២០២១

ដោយ

អាជ្ញាធរខេត្តកណ្តាលបានអះអាងថា កម្មករកម្មការិនីដែលបានប៉ះពាល់ដោយផ្ទាល់ និងប្រយោលចំនួន ១៩៦ នាក់ ជាមួយអ្នកជំងឺកូវីដ១៩បំប្លែងថ្មីប្រភេទថ្មី Delta ម្នាក់នោះ ទទួលបានលទ្ធផលតេស្តអវិជ្ជមានទាំងអស់។ ប៉ុន្តែតម្រូវធ្វើចត្តាឡីស័កឲ្យបានត្រឹមត្រូវ តាមវិធានរបស់ក្រសួងសុខាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកណុប ដារ៉ា អភិបាលរងខេត្តកណ្តាល ដែលបានដឹកនាំក្រុមការងារមន្ត្រីជំនាញរួមជាមួយអាជ្ញាធរស្រុកអង្គស្នួល ចុះស្រាវជ្រាវកាលពីរសៀលថ្ងៃទី២៧សីហាបានបញ្ជាក់ថា បន្ទាប់ពីទទួលបានព័ត៌មានថា មានកម្មករ កម្មការិនីចំនួន៣ នាក់ វិជ្ជមានជំងឺកូវីដ-១៩ ហើយក្នុងនោះមានមួយករណីជាប្រភេទជំងឺកូវីដ-១៩ ប្រភេទថ្មី (Delta) យើងបានចុះស្រាវជ្រាវស្វែងរកអ្នកដែលបានប៉ះពាល់ដោយផ្ទាល់ និងប្រយោល ដើម្បីយកសំណាកធ្វើតេស្តរកមេរោគកូវីដ-១៩ និងធ្វើចត្តាឡីស័កឲ្យបានត្រឹមត្រូវតាមវិធានរបស់ក្រសួងសុខាភិបាលដើម្បីកាត់ផ្ដាច់នូវការចំលងចូលក្នុងសហគមន៍។

លោកអភិបាលរងខេត្តបានឲ្យដឹងថា បុរសម្នាក់អាយុ៣៧ឆ្នាំ មានវិជ្ជមានមេរោគកូវីដ-១៩ ប្រភេទថ្មី ដែលតា (Delta) មានមុខរបរកម្មកររោងចក្រមួយ ស្នាក់នៅភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល។

លោកអភិបាលរងខេត្តបានបន្តថា តាមការពិនិត្យ និងស្រាវជ្រាវបានរកឃើញមានអ្នកពាក់ព័ន្ធដោយផ្ទាល់ និងប្រយោលសរុបចំនួន ១៩៦ នាក់ ក្នុងនោះអ្នកប៉ះពាល់ផ្ទាល់ចំនួន ៣៥នាក់ និងប៉ះពាល់ប្រយោល ចំនួន១៦១នាក់។

លោកអភិបាលរងខេត្ត បានបន្ថែមទៀតថា ដើម្បីធានានូវសុវត្ថិភាពនិងកាត់ផ្ដាច់នូវខ្សែចម្លងចូលសហគមន៍ ពិសេសចៀសវាងការឆ្លងទៅក្រុមគ្រួសារអ្នកដែលប៉ះពាល់ដោយផ្ទាល់ និងប្រយោលទាំង ១៩៦ នាក់ត្រូវយកសំណាកធ្វើតេស្តរកមេរោគកូវីដ-១៩ ឲ្យបានគ្រប់គ្នា។

លោកអភិបាលរងខេត្ត ឲ្យដឹងទៀតថា ក្រោយពីការធ្វើតេស្តយកសំណាកកម្មករចំនួន ១៩៦នាក់ ខាងលើ លទ្ធផលគឺអវិជ្ជមានទាំងអស់។

លោកអភិបាលរងខេត្ត បាន បន្ថែមទៀតថា បើទោះជាលទ្ធផលមិនមានវិជ្ជមានក៏ដោយក្ដី តែអ្នកដែលប៉ះពាល់ដោយផ្ទាល់ និងប្រយោល ត្រូវធ្វើចត្តាឡីស័កឲ្យបានត្រឹមត្រូវតាមវិធានរបស់ក្រសួងសុខាភិបាល ហើយក្នុងកំឡុងពេលនៃការធ្វើចត្តាឡីស័ក បងប្អូនកម្មករ កម្មការិនី ទាំងអស់ ត្រូវតាមដានសុខភាពជាប្រចាំ ក្នុងករណីមានការសង្ស័យទៅរាយការណ៍ទៅអាជ្ញាធរមូលដ្ឋាន ពិសេសក្រុមគ្រូពេទ្យជំនាញដែលនៅជិតបំផុត។

គួរបញ្ជាក់ថាគិតត្រឹមថ្ងៃទី ៣១ ខែ មីនា រហូតមកដល់ថ្ងៃទី ២៦ ខែ សីហា ឆ្នាំ ២០២១ នេះ ខេត្តកណ្តាល មានអ្នកជំងឺកូវីដ១៩បំប្លែងថ្មីប្រភេទថ្មី Delta ចំនួន ៤៣ នាក់ស្រី ២០នាក់ ក្នុងចំណោមអ្នកជំងឺដែលតាសរុបចំនួន ១៥៣៤ នាក់ស្រី ៧៦៤ នាក់នៅតាមរាជធានីខេត្តចំនួន ២៣ លើកលែងតែខេត្តកែបនិងក្រចេះ នៅមិនទាន់មានឆ្លងជំងឺប្រភេទនេះនៅឡើយទេ៕

អត្ថបទ៖សំអឿន