បិទវគ្គបណ្តុះបណ្តាលកម្រិតអន្តរជាតិពី “សុវត្ថិភាពចរាចរណ៍”

នៅព្រឹកថ្ងៃអាទិត្យ ទី២៩ ខែសីហា ឆ្នាំ២០២១ ឯកឧត្តម ឌី វិជ្ជា ប្រធានសហភាពសហព័ន្ធយុវជនកម្ពុជា ខេត្តស្វាយរៀង បាន​ចូលរួមកម្មវិធី​បិទវគ្គបណ្តុះបណ្តាលកម្រិតអន្តរជាតិស្តីពី “សុវត្ថិភាពចរាចរណ៍ (មូលដ្ឋានគ្រឹះ)” និងការសរសេរគម្រោងផែនការសកម្មភាព តាមរយៈប្រព័ន្ធអនឡាញ Zoom ចាប់ពីថ្ងៃទី១៩ ខែមិថុនា ដល់ថ្ងៃទី១៥ ខែសីហា ឆ្នាំ២០២១។

ក្នុង​កម្មវិធី​បិទ​វគ្គ ក៏​មាន​តំណាងគ្រូឧទ្ទេស សាស្ត្រាចារ្យ បណ្ឌិត Ray Shuey APM ប្រធានប្រឹក្សា​ភិបាល និងជានាយកមូលនិធិសុវត្ថិភាពអន្តរជាតិ ការិយាល័យថ្នាក់កណ្តាលប្រចាំរដ្ឋវិកតូរី (Victoria) និងសហការីនៅប្រទេសអូស្រ្តាលី (Australia)។ ជាមួយ​គ្នា​នេះ ក៏មានការចូលរួមពីវាគ្មិនលោក មាស ចាន់ឌី អ្នកជំនាញផ្នែកតម្រង់ទិសឥរិយាបថ ប្រចាំអង្គការខែមសហ្វ លោក គង់ សុវណ្ណ អ្នកជំនាញសុខភាពសាធារណៈ និងជាស្ថាបនិករបស់អង្គការខែមសេហ្វនៅកម្ពុជា (Cambodia) រួមទាំងក្រុមការងារស.ស.យ.ក. និង​មន្ត្រីនាយកដ្ឋានសុវត្ថិភាពចរាចរណ៍ និងសមាជិកក្រុមការងារអ្នកស្ម័គ្រចិត្ត អង្គការខេមសេហ្វ។

ក្នុងឱកាសនេះ ក៏មានការធ្វើបទបង្ហាញអំពីគម្រោងសកម្មភាពកិច្ចការដែលតម្រូវពីវគ្គបណ្តុះបណ្តាល និងលទ្ធផលពិស្ដារ នៃការអនុវត្តផែនការសុវត្ថិភាពចរាចរណ៍ របស់ក្រុមសិក្ខាកាមចំនួន​ ៩ក្រុម ដើម្បីបញ្ចប់វគ្គផងដែរ។ ជាចុងក្រោយ មានការ​ផ្តល់​បណ្ណថ្លែងអំណរគុណដល់គ្រូឧទ្ទេស វាគ្មិន និងវិញ្ញាបនបត្រដល់សិក្ខាកាមគ្រប់រូប ដែលបានបញ្ចប់វគ្គដោយជោគជ័យ៕