អាជ្ញាធរខណ្ឌទួលគោក បិទខ្ទប់ផ្លូវ៣៣៦​ យកសំណាកអាជីវករ ផ្សារដើមគរ ជាង២០០នាក់

កំណាត់ផ្លូវ៣៣៦ ជាកំណាត់ផ្លូវមួយ នៅខាងជើងជាប់នឹងផ្សារដើមគរ ស្ថិតក្នុងសង្កាត់ផ្សារដើមគរ ខណ្ឌ ទួលគោក ជាផ្លូវមួយ ដែលអាជីវករលក់ដូរ បន្ថែ ត្រីសាច់ ពិសេសនៅពេលព្រឹកព្រលឹម។ កំណាត់ផ្លូវនេះ ត្រូវបានអាជ្ញាធរខណ្ឌទួលគោក សហការជាមួយគណៈកម្មការផ្សារដើមគរ និងក្រុមគ្រូពេទ្យ ចុះបិទខ្ទប់ ដើម្បីពិនិត្យយកសំណាកកូវីដ-១៩ពីអាជីវករ ក្រោយពីមានអ្នកវិជ្ជមាន ប្រភេទថ្មីដែលតាDelta រស់នៅក្នុងសង្កាត់ បឹងសាឡាង ចូលមកទិញបន្លែត្រីសាច់ នៅក្នុងផ្សារលើផ្លូវ៣៣៦នេះ។

លោកគៀង ចក់ ប្រធានគណៈកម្មការផ្សារដើមគរ បានឲ្យដឹងនៅព្រឹកថ្ងៃទី៣០ ខែសីហានេះថា អាជ្ញាធរខណ្ឌទួលគោក សហការជាមួយគណៈកម្មការផ្សារដើមគរ និងក្រុមគ្រូពេទ្យ បានសម្រេចបិទកំណាត់ផ្លូវ លេខ៣៣៦ ជាប់ផ្សារដើមគរ នៅព្រឹកថ្ងៃទី៣០ ខែសីហានេះ ដើម្បីយកសំណាកអាជីវករអ្នកលក់បន្លែត្រីសាច់ នៅលើកំណាត់ផ្លូវនេះ។

លោកបញ្ជាក់ថា អាជីវករដែលត្រូវយកសំណាក មានប្រមាណ ជាង២០០នាក់ ហើយមូលហេតុដែលឈានទៅដល់ការបិទផ្លូវខាងលើ ដើម្បីយកសំណាក់អាជីវករ ទាំងជាង២០០នាក់នេះ គឺដោយសារតែខាងក្រុមគ្រូពេទ្យ បញ្ជាក់ថា មានអ្នកជំងឺកូវីដ-១៩ ប្រភេទថ្មីដែលតា Delta រស់នៅក្នុងសង្កាត់បឹងសាឡាង ខណ្ឌទួល គោក ចូលមកទិញបន្លែត្រីសាច់នៅក្នុងផ្សារនេះ ដោយហេតុនេះហើយ ទើបក្រុមគ្រូពេទ្យ សម្រេចចិត្តក្នុងការបិទផ្លូវ៣៣៦ ដើម្បីយកសំណាករកកូវីដ-១៩ ប្រភេទថ្មីដែលតា ទៅលើអាជីវករ ជាង២០០នាក់នេះ។

លោកគៀង ចក់ បានបញ្ជាក់ថា មកដល់ម៉ោងជាង១០ព្រឹកនេះ មិនទាន់រកឃើញ-១៩ ទៅលើអាជីវករនៅ​ឡើយទេ។ ចំណែកផ្សារដើមគរទាំងមូល នៅតែបើកដំណើរការជាធម្មតា ពោលគឺគ្រាន់តែបិទផ្លូវ៣៣៦នេះ ធ្វើជាទីតាំងដើម្បីពិនិត្យយកសំណាក ពីអាជីវករតែប៉ុណ្ណោះ៕

អត្ថបទ៖ ស្រីរ័ត្ន