Connect with us

ព័ត៌មានជាតិ

ក្រុមហ៊ុនឯកជន​មិនទាន់អាចនាំចូលវ៉ាក់សាំងកូវីដ១៩​​ដោយ​សារ​លក្ខខណ្ឌមួយចំនួន

បានផុស

នៅ

រហូតមកដល់ពេលនេះ មិនទាន់មានក្រុមហ៊ុនឯកជនណាមួយ អាចនាំចូលវ៉ាក់សាំងបង្ការជំងឺ​កូវីដ១៩​ បាននៅ​ឡើយទេ ដោយសារលក្ខខណ្ឌមួយចំនួន។

លោកស្រី យក់ សម្បត្តិ រដ្ឋលេខាធិការក្រសួងសុខាភិបាល ថ្លែងនៅឯអាកាសយានដ្ឋានអន្តរជាតិភ្នំពេញ នៅថ្ងៃទី ៣១ ខែសីហានេះ ឱ្យដឹងថា រាជរដ្ឋាភិបាលបានអនុញ្ញាតឱ្យវិស័យឯកជននាំចូលវ៉ាក់សាំង និងឧបករណ៍តេស្តរហ័ស ដោយត្រូវអនុវត្តទៅតាមគោលការណ៍របស់ក្រសួងសុខាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី បន្តថា រហូតមកដល់ថ្ងៃនេះ មិនទាន់មានក្រុមហ៊ុនឯកជនណាអាចនាំចូលវ៉ាក់សាំងកូវីដ១៩​នៅ​ឡើយ​ទេ ដោយសារតែការកម្មង់ និងបញ្ជាទិញតិចតួចប្រហែលមានការលំបាកដែរ ខណៈដែលលោកស្រី អះអាងថា មានក្រុមហ៊ុនឯកជនខ្លះក៏ព្យាយាម ដើម្បីនាំចូលវ៉ាក់សាំង ចាក់ឱ្យសហការីរបស់ខ្លួន។

លោកស្រី យក់ សម្បត្តិបញ្ជាក់ថា ប្រសិនបើក្រុមហ៊ុនឯកជនអាចនាំចូលមកបាន អាចជូយរំលែកនូវបន្ទុករបស់រាជរដ្ឋាភិបាលបានច្រើន ដោយសារមិនអាចធ្វើតែផ្នែករដ្ឋបានទេ ត្រូវតែមានការចូលរួមពីដៃគូឯកជន។

មន្ទីរពេទ្យរ៉ូយ៉ាល់ភ្នំពេញ នៅថ្ងៃទី ១៧ ខែសីហា ឆ្នាំ ២០២១ បានបញ្ជាក់ប្រាប់ថា ខ្លួនមិនទាន់មាន វ៉ាក់សាំងកូវីដ១៩ Pfizer & Moderna សម្រាប់លក់ និងចាក់ជូនប្រជាពលរដ្ឋនៅឡើយទេ។

មន្ទីរពេទ្យរ៉ូយ៉ាល់ភ្នំពេញបញ្ជាក់ថា មន្ទីរពេទ្យក៏ពុំទាន់មានព័ត៌មានជាក់លាក់ណាមួយដែលថា មន្ទីរពេទ្យ និងអាចបញ្ជាទិញវ៉ាក់សាំងបាននៅពេល​ណានោះដែរ។

ក្រសួងសុខាភិបាលបានអនុញ្ញាតឱ្យមន្ទីរពេទ្យរ៉ូយ៉ាល់ភ្នំពេញ មានសិទ្ធបញ្ជាទិញវ៉ាក់សាំងកូវីដ១៩ មកចាក់ជាឯកជនចាក់ជូនប្រជាពលរដ្ឋ ដោយត្រូវបង់ប្រាក់។

ក្រសួងសុខាភិបាលបានសម្រេចអនុញ្ញាតឱ្យវិស័យឯកជនអាចធ្វើការស្នើសុំនាំចូលវ៉ាក់សាំងកូវីដ-១៩ ដែលទទួលស្គាល់ដោយអង្គការសុខភាពពិភពលោក ដើម្បីផ្ដល់សេវាសុខាភិបាលឱ្យកាន់តែទូលំទូលាយ ទប់ស្កាត់ការឆ្លងរាលដាលជំងឺកូវីដ-១៩។

រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានបញ្ជាក់ថា វ៉ាក់សាំងកូវីដ-១៩​ ដែលអនុញ្ញាតឱ្យនាំចូលនោះគឺវ៉ាក់សាំង ដែលត្រូវបានទទួលស្គាល់​ដោយអង្គការសុខភាពពិភពលោក​ដោយក្រុមហ៊ុនឯកជនត្រូវប្រតិបត្តិការឱ្យបានត្រឹមត្រូវតាមស្តង់ដារបច្ចេកទេសក្នុងការដឹកជញ្ជូន ការថែរក្សា និងការស្តុកវ៉ាក់សាំង​កូវីដ-១៩ នៅក្នុងឃ្លាំងដើម្បីធានាសុវត្ថិភាព និងប្រសិទ្ធិភាពខ្ពស់៕

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម