ភ្នំពេញ តំបន់ខ្លះនៅតែរងការគំរាមកំហែងពីជំនន់ទឹកភ្លៀង

លោក នួន ផារ័ត្ន អភិបាលរងរាជធានីភ្នំពេញបានបញ្ជាក់ប្រាប់ឱ្យដឹងថា តំបន់ខ្លះនៅក្នុងរាជធានីភ្នំពេញ នៅតែទទួលការគំរាមកំហែងពីជំនន់ទឹកភ្លៀង ខណៈដែលកត្តាបម្រែបម្រួលអាកាសធាតុ ជាពិសេសកម្រិតទឹកភ្លៀងដែលកើនឡើងខ្ពស់ និងបញ្ហាហេដ្ឋារចនាសម្ព័ន្ធដែលមិនទាន់រឹងមាំ បានបង្កឱ្យមានការជន់លិចនៅតំបន់មួយចំនួន ដែលរដ្ឋបាលរាជធានីភ្នំពេញ កំពុងខិតខំដោះស្រាយ។

ទោះយ៉ាងណា លោក នួន ផារ័ត្ន ក៏អំពាវនាងដល់បងប្អូនប្រជាពលរដ្ឋឱ្យចូលរួម តាមរយៈការវេចខ្ចប់ ទុក​ដាក់​សំរាម ឲ្យមានអនាម័យ និងមានសណ្តាប់ធ្នាប់ជាប្រចាំ ចៀសវាងការបង្កជាផលរំខានជាយថាហេតុណាមួយ បណ្តាលឲ្យសំរាម និងសំណល់ផ្សេងៗ កកស្ទះបណ្តាញលូនិងប្រព័ន្ធបង្ហូរទឹក។

លោកអភិបាលរងរាជធានីភ្នំពេញ អាជ្ញាធររដ្ឋបាលសង្កាត់ និងរដ្ឋបាលខណ្ឌ នៅថ្ងៃទី ៣១ ខែសីហានេះ បានបន្តចុះពិនិត្យស្ថានភាពទឹកលិច និងប្រព័ន្ធបង្ហូរទឹកភ្លៀង នៅក្នុងមូលដ្ឋានសង្កាត់ចាក់អង្រែលើ​ និងសង្កាត់ចាក់អង្រែក្រោម នៃខណ្ឌមានជ័យ ដើម្បីស្វែងរកដំណោះស្រាយជូនប្រជាពលរដ្ឋក្នុងមូលដ្ឋាន៕