អភិបាលខណ្ឌឆ្លើយបំភ្លឺករណីភ្លៀងលិចផ្លូវក្រោមដី​ស្ពានអាកាស​ចោមចៅ

លោក ហែម ដារិទ្ធិ អភិបាលខណ្ឌពោធិ៍សែនជ័យ បានថ្លែងបញ្ជាក់ថា រូបភាពប៉ុន្មានសន្លឹកដែលដែលបង្ហាញ​ពីទិដ្ឋភាពទឹកលិចផ្លូវក្រោមដី ស្ពានអាកាសចោមចៅ គឺទឹកលិចមិនយូរនោះទេ ខណៈដែលអាជ្ញាធរសង្កាត់ បានបើកផ្លូវទឹកឱ្យហូរចេញវិញអស់ នៅប៉ុន្មានម៉ោងក្រោយ។

លោក ហែម ដារិទ្ធិ បញ្ជាក់ថា ” រូបហ្នឹងមុនម៉ោង ៩ គឺករណីនេះ ទឹកវាច្រាល ដោយសារទឹកភ្លៀងមួយមេធំ ប៉ុន្តែការលិចក៏មិនលិចយូរដែរ ត្រឹមម៉ោង ៩៖ ៣០ យប់ គឺអាជ្ញាធរសង្កាត់បានបើកបង្ហូរអស់ហើយ ដោយ​សារខ្លាចលិចសាលាជម្ពូរវ័ន្ត”។

នៅល្ងាចម៉ោង ជាង ៤ រសៀលថ្ងៃទី ១ ខែកញ្ញា ភ្លៀងបន្តធ្លាក់មួយមេធំធ្វើឱ្យទឹកជនន់លិចតាមដងផ្លូវមួយចំ​នួនក្នុងរាជធានីភ្នំពេញ ក្នុងនោះគេសង្កេតឃើញផ្លូវក្រោមដី ស្ពានអាកាសចោមចៅក៏រងការជន់លិច នឹងការកកស្ទះចរាចរផងដែរ។

លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក ប្រាប់កម្ពុជាថ្មីថា រាជធានី ខេត្ត ជានៅតាមតំបន់មួយចំនួន ដូចជារាជធានីភ្នំពេញ នៅតែប្រឈម នឹងជំនន់ទឹកភ្លៀង នាអំឡុងពាក់​កណ្ដាល​រដូវវស្សានេះ ដោយសារជ្រលងសម្ពាធទាបឥណ្ឌា ធ្វើឱ្យមូសុងនិរតីបង្កើនឥទ្ធិពលខ្លាំងរួមផ្សំ​ និងបាតុភូតសមុទ្រ​ចិនខាងត្បូង។

លោកប្រាប់ថា ការធ្លាក់ភ្លៀងនៅល្ងាចថ្ងៃទី ១ ខែកញ្ញា ម្សិលមិញ របាយទឹកភ្លៀងមិនស្មើគ្នាទាំងអស់នោះទេ ដូចនៅខណ្ឌសែនសុខ ៦២ មម នៅទួលសង្កែមានតិចប្រមាណ២០ មម ខណៈដែលខណ្ឌនៅកណ្ដាលរាជធានីភ្នំពេញ ដូចជាទួល​គកម្ដុំផ្សារដើមគរ ម្ដុំផ្លូវមុនីរ៉េត និងម្ដុំបាសាំងទឹកអូរឡាំពិក កម្រិតទឹកភ្លៀងធ្លាក់ចន្លោះពី ៥០ ទៅ ៦១ មម៕