អុីស្រាអែល​ស្នើសុំ​និស្សិត​កម្ពុជា ២០០​នាក់បន្ថែមទៀត ទៅហាត់ការ​លើវិស័យកសិកម្ម

ភ្នំពេញ៖ រដ្ឋាភិបាលអុីស្រាអែលបានស្នើសុំនិស្សិតកម្ពុជាចំនួន២០០នាក់បន្ថែមទៀត ឱ្យទៅបន្តការសិក្សានិងហាត់ការលើវិស័យកសិកម្ម។

លោក វេង សាខុន ​រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទមានប្រសាសន៍ថា សម្រាប់ឆ្នាំសិក្សា ២០២២ខាងមុខនេះ អុីស្រាអែលបានស្នើសុំនិស្សិតកម្ពុជាចំនួន ២០០នាក់ បន្ថែមទៀត ពីវិទ្យាស្ថានជាតិកសិកម្មព្រែកលៀបឱ្យទៅបន្តការសិក្សា និងហាត់ការលើវិស័យកសិកម្ម ដោយសារនិស្សិតកម្ពុជាឧស្សាហ៍ព្យាយាមនិងមានអាកប្បកិរិយាល្អ។

កាលពីឆ្នាំ២០១៩ មជ្ឈមណ្ឌលហ្វឹកហ្វឺនកសិកម្ម Sedot Negev បានព្រមព្រៀងជាមួយវិទ្យាស្ថានជាតិកសិកម្មព្រែកលៀប ទទួលយកនិស្សិត៥០នាក់ ដើម្បីចូលរួម កម្មវិធីរៀននិងរកសម្រាប់រយៈពេល១១ខែ នៅប្រទេសអុីស្រាអែល។ ក្នុងកម្មវិធីនេះ និស្សិតត្រូវរៀនជំនាញប្រមាណ៥០០ម៉ោង និងអនុវត្តជាក់ស្តែង នៅតាមបណ្តាក្រុមហ៊ុនផ្សេងៗ ដើម្បីទទួលបានជំនាញតាមរយៈការហាត់ការ និងប្រាក់កម្រៃតាមការព្រមព្រៀង និងក្នុងក្របខណ្ឌច្បាប់របស់ប្រទេសអ៊ីស្រាអែល។

ក្រៅពីការសិក្សានិងហាត់ការជាក់ស្តែង កម្មវិធីនេះ ក៏បានរៀបចំឱ្យសម្រាប់និស្សិត ទៅកំសាន្តនិងសិក្សាស្វែងយល់អំពី តំបន់ផ្សេងៗរបស់ប្រទេសអ៊ីស្រាអែល។

លោករដ្ឋមន្ត្រីបានបន្ថែមថា និស្សិតទាំងអស់ បានទទួលធានារ៉ាប់រងសុខភាព ក្នុងអំឡុងពេលនៃការស្នាក់នៅក្នុងប្រទេសអុីស្រាអែល។ ដោយឡែកនៅក្នុងបរិបទកូវីដ-១៩ មជ្ឈមណ្ឌល Sedot បានរៀបចំឱ្យមានការចាក់ថ្នាំបង្ការកូវីដ-១៩ សម្រាប់និស្សិតទាំងអស់ ពោលគឺនិស្សិតបានទទួលថ្នាំបង្ការកូវីដ-១៩ ដូចប្រជាជនអុីស្រាអែលដែរ។

លោករដ្ឋមន្ត្រីបានបញ្ជាក់ថា ដោយមើលឃើញពីការខិតខំសិក្សា និងអាកប្បកិរិយាល្អរបស់និស្សិតកន្លងមក មជ្ឈមណ្ឌលហ្វឹកហ្វឺនកសិកម្ម Sedot Negev បានស្នើបង្កើនចំនួននិស្សិតរហូតដល់២០០នាក់សម្រាប់ឆ្នាំ២០២២។

លោករដ្ឋមន្ត្រីបានបញ្ជាក់ទៀតថា តាមការគ្រោងទុក និស្សិត២០០នាក់នឹងចេញទៅប្រទេសអ៊ីស្រាអែលនៅចុងឆ្នាំ២០២១នេះ។

គួរបញ្ជាក់ថា ក្រោយពីការចុះកិច្ចព្រម ព្រៀងសហប្រតិបត្តិការ រវាងសាកលវិទ្យាល័យភូមិន្ទកសិកម្ម និង ក្រុមហ៊ុន Agrostudies នៃប្រទេសអ៊ីស្រាអែល នាឆ្នាំ២០០៨ រួចមក សាកលវិទ្យាល័យភូមិន្ទកសិកម្មបានបញ្ជូននិស្សិតចូលរួមកម្មវិធីហាត់ការ (Internship)លើវិស័យកសិកម្ម នៅ ប្រទេសអ៊ីស្រាអែលបានចំនួន១៣ជំនាន់រួចមកហើយ ដែលមាននិស្សិតសរុបចំនួន ១ ២៧១នាក់៕

អត្ថបទ៖ សំអឿន