ព័ត៌មានជាតិ

បន្ទាប់ពីមានករណីពុលស្រាថ្នាំទំពាំងបាយជូ សមត្ថកិច្ចជំនាញចុះត្រួតពិនិត្យនិង ស្រាវជ្រាវសិប្បកម្មផលិតស្រាកែច្នៃ មាស ហុង

បានផុស

៣ years មុន

នៅ

ថ្ងៃសុក្រ ៣ កញ្ញា ២០២១

ដោយ

ភ្នំពេញ ៖ បន្ទាប់ពីមានករណីស្ត្រី៣នាក់ពុលស្រាទំពាំងបាយជូ បណ្ដាលឲ្យស្លាប់កាលពីថ្ងៃទី១ ខែកញ្ញា ឆ្នាំ២០២១មក ប្រតិភូរាជរដ្ឋាភិបាលកម្ពុជា លោក ផាន អូន អគ្គនាយកនៃអគ្គនាយកដ្ឋានក.ប.ប បានបញ្ជាឲ្យមន្ត្រីជំនាញចុះពិនិត្យ និងស្រាវជ្រាវ ដើម្បីប្រមូលយកសំណាកមកវិភាគរហូតចុះត្រួតពិនិត្យសិប្បកម្មផលិតស្រាកែច្នៃ មាស ហុង ដែលមានអាស័យដ្ឋានស្ថិតនៅសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ ដោយបានរកឃើញស្រាកែច្នៃរួច និងស្រាស រួមទាំងសម្ភារៈកែច្នៃស្រាមួយចំនួនសម្រាប់ធ្វើជាវត្ថុតាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះ មន្ត្រីជំនាញអគ្គនាយកដ្ឋានក.ប.ប. បានចុះត្រួតពិនិត្យតាមបណ្តាទីតាំងចែកចាយ និងផ្ទះលក់ទំនិញនានាក្នុងរាជធានីភ្នំពេញ ដោយបានដកហូតស្រាទំពាំងបាយជូ និងស្រាស សញ្ញា «មាស ហុង» ចំនួន ៤៨យួរ (មួយយួរ ១២ដប) មករក្សាទុកជាបណ្តោះអាសន្ន។

មន្ត្រីជំនាញបានឲ្យដឹងថា សមត្ថកិច្ចបានយកមកវិភាគ នៅមន្ទីរពិសោធន៍ រកសារធាតុមេតាណុល ដែលជាសារធាតុពុល។

លទ្ធផលវិភាគរបស់មន្ទីរពិសោធន៍អគ្គនាយកដ្ឋាន ក.ប.ប. បានបង្ហាញឱ្យឃើញថា ក្នុងចំណោមគំរូស្រាចំនួន ៥គំរូ ដែលទទួលបានពីកន្លែងកើតហេតុ មាន ៣គំរូ មានវត្តមានសារធាតុមេតាណុលពី ១.៣% រហូតដល់ ៨.៨% លើសពីកម្រិតអនុញ្ញាត (០.១៥%) ពី ១៣ ដល់ ៨៨ដង ដែលជាកម្រិតមួយគ្រោះថ្នាក់បំផុត សម្រាប់អ្នកបរិភោគ។

គួរបញ្ជាក់ថា កាលពីរសៀលថ្ងៃទី០២ ខែ កញ្ញា ឆ្នាំ ២០២១ ម្សិលមិញ មានហេតុការណ៍ដ៏គួរអោយភ្ញាក់ផ្អើលមួយ បានកើតឡើង ដោយគេប្រទះឃើញនារីវ័យក្មេងចំនួន ២នាក់ ដេកស្លាប់នៅក្នុងបន្ទប់ជួលមួយកន្លែង នៅជាន់ទី៣ ផ្ទះលេខ២៧ ផ្លួវសុធារស មុខផ្សារទំនើប អ៊ីអន១ ក្នុងសង្កាត់ទន្លេបាសាក់ ខណ្ឌចំការមន និងនារីម្នាក់ទៀត បានស្លាប់ នៅស្រុកកំណើតឯខេត្តកណ្តាល។