ជំនន់ទឹកភ្លៀងកំពុងជន់លិច​​នៅតំបន់វាលទំនាប​ក្នុង​ក្រុងប៉ោយប៉ែត

ស្ថានភាពជំនន់ទឹកភ្លៀងនៅក្នុងក្រុងប៉ោយប៉ែត នៅតែបន្តជន់លិចនៅតំបន់វាលទំនាបដដែល ធ្វេីឲ្យប៉ះពាល់ដល់ហេដ្ឋារចនាសម្ព័ន្ធនិងផ្ទះប្រជាពលរដ្ឋដែលរស់នៅក្នុងក្រុងប៉ោយប៉ែត។

លោកឧត្តមសេនីយ៍ទោ សេង ធារិន មេបញ្ជាការរង នាយសេនាធិការយោធភូមិភាគទី៥ បានឱ្យដឹងថា
ប៉ុន្មាន​​ថ្ងៃមានភ្លៀងជាប់ៗគ្នា បានបង្កឱ្យមានជំនន់ទឹកភ្លៀង ជន់លិចតំបន់មួយចំនួន នាតំបន់វាលទំនាប ធ្វេីឲ្យប៉ះពាល់ដល់ហេដ្ឋារចនាសម្ព័ន និងផ្ទះប្រជាពលរដ្ឋដែលរស់នៅក្នុងក្រុងប៉ោយប៉ែត។

លោកបានបញ្ជាក់ឱ្យដឹងបន្តទៀតថា យោងតាមបទបញ្ជាថ្នាក់ដឹកនាំកងទ័ពគ្រប់លំដាប់ថ្នាក់ មេបញ្ជាការកងទ័ពជេីងគោក មេបញ្ជាការយោធភូមិភាគទី៥ កម្លាំងកងពលតូចថ្មេីរជេីងលេខ៥១បានធ្វើអន្តរាគមន៍នៅក្នុងទីតាំងនោះ ហើយត្រៀមប្រុងប្រៀបរួចជាស្រាច់ក្នុងការត្រៀមជួយអន្តរាគមន៍ និងជួយសង្គ្រោះដល់ប្រជាពលរដ្ឋទៅទីទួលសុវត្តិភាពផងដែរ។​

បើទោះបីកម្លាំងមួយចំនួនកំពុងបំពេញប្រតិបត្តិការ នៅតាមបន្ទាត់ព្រំដែន និងចុះយុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសទី១ និងដូសទី២ ជូនប្រជាពលរដ្ឋដែលនៅសេសសល់ដើម្បីបិទបញ្ចប់យុទ្ធនាការក៏ដោយ កម្លាំងដែលត្រៀមអន្តរាគមន៍ក្នុងទីតាំង គឺត្រៀម២៤លើ២៤ម៉ោង គ្រប់បណ្តាគោលដៅឈរជើង សម្រាប់ជួយសង្រ្គោះ ប្រជាពលរដ្ឋដែរងគ្រោះដោយគ្រោះមហន្តរាយធម្មជាតិផ្សេងៗ។

ជាមួយគ្នានោះដែរលោក សេង ធារិន បានធ្វើការក្រើនរំលឹកស្មារតី បងប្អូនប្រជាពលរដ្ឋដែលរស់នៅក្នុងភូមិ​សាស្ត្រក្រុងប៉ោយប៉ែត សូមមេត្ដាប្រុងប្រយ័ត្នខ្ពស់ ដើម្បីធានា នៃការខាតបង់ទ្រព្យសម្បត្តិ និងអាយុជីវិត ជាពិសេសកូនចៅតូចៗព្រោះប៉ុន្មានថ្ងៃនេះឃើញថា ជំនន់ទឹកភ្លៀងក្នុងរដូវវស្សាបានហក់ឡើងសន្ទុះខ្ពស់ រីឯមេឃ​នៅតែបន្តភ្លៀងធ្លាក់មករៀងរាល់ផងដែរ៕

អត្ថបទៈ វ៉ាន់ ណាង