ក្រសួងអប់រំប្រកាសចាក់វ៉ាក់សាំងកូវីដ-១៩ ដូសទី៣សម្រាប់ថ្នាក់ដឹកនាំ និងបុគ្គលិកអប់រំថ្នាក់ជាតិនៅទី១០ កញ្ញា

ក្រសួងអប់រំ យុវជន និងកីឡាបានប្រកាសចាក់វ៉ាក់សាំងកូវីដ-១៩ ដូសទី៣ ឬដូសជំរុញសម្រាប់ថ្នាក់ដឹកនាំក្រសួង និងបុគ្គលិកអប់រំថ្នាក់ជាតិ នៅទី១០ ខែកញ្ញា ឆ្នាំ២០២១ នៅតាមទីតាំងចំនួន៣កន្លែង។

លោក បណ្ឌិត សភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាបានឱ្យដឹងនៅក្នុងសេចក្តីជូនដំណឹងចុះថ្ងៃទី០៦ ខែកញ្ញាថា គណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស នឹងផ្តល់ការចាក់វ៉ាក់សាំងកូវីដ-១៩ (អាស្ត្រាហ្សេរីកា) ដុសជំរុញ ឬ ដូសទី៣ ជូនដល់ថ្នាក់ដឹកនាំ និងបុគ្គលិកអប់រំក្រោមឱវាទទីស្ដីការក្រសួង ព្រមទាំងស្វាមី ឬ ភរិយា ដែលបានចាក់វ៉ាក់សាំងកូវីសែល ដូសទី១ និងដូសទី២ រួចរាល់ ហើយមានគម្លាតចាប់ពី៤ ទៅ ៦ខែឡើង ចាប់ពីថ្ងៃទី១០ ដល់ ថ្ងៃទី២៥ ខែកញ្ញា ឆ្នាំ២០២១ នៅតាមមន្ទីរពេទ្យធំៗចំនួន៣កន្លែង។

លោករដ្ឋមន្ត្រីបានបន្តថា ចាប់ពីថ្ងៃទី១០ ដល់ថ្ងៃទី១២ ខែកញ្ញា ឆ្នាំ២០២១ ចាក់នៅ មន្ទីរពេទ្យកាល់ម៉ែត សម្រាប់ថ្នាក់ដឹកនាំ ដែលមានតួនាទី ជារដ្ឋមន្ត្រី រដ្ឋលេខាធិការ ឬ មានឋានៈស្មើព្រមទាំងស្វាមី ឬ ភរិយា។ នៅមន្ទីរពេទ្យព្រះអង្គឌួង សម្រាប់ថ្នាក់ដឹកនាំ ដែលមានតួនាទី ជាអនុរដ្ឋលេខាធិការ អគ្គនាយក អគ្គនាយករងឬ មានឋានៈស្មើ ព្រមទាំងស្វាមី ឬ ភរិយា។

លោករដ្ឋមន្ត្រីបានបន្តទៀតថា ចាប់ពីថ្ងៃទី២១ ដល់ថ្ងៃទី២៥ ខែកញ្ញា ឆ្នាំ២០២១ នៅមន្ទីរពេទ្យកុមារជាតិ សម្រាប់បុគ្គលិកអប់រំចាប់ពីថ្នាក់ប្រធាននាយកដ្ឋានចុះរហូតដល់មន្ត្រីជាប់កិច្ចសន្យា ព្រមទាំងស្វាមី ឬ ភរិយា។

លោករដ្ឋមន្ត្រីបានបញ្ជាក់ថា ថ្នាក់ដឹកនាំនិងបុគ្គលិកអប់រំថ្នាំកជាតិទាំងអស់ពេលអញ្ជើញទៅចាក់វ៉ាក់សាំងនៅតាមមន្ទីរពេទ្យទាំង៣ខាងលើសូមភ្ជាប់មកជាមួយនូវឯកសារ រួមមាន៖ ប័ណ្ណចាក់វ៉ាក់សាំងកូរី-១៩ ប័ណ្ណសម្គាល់ខ្លួនមន្រ្តីរាជការ ឬ ប័ណ្ណសម្គាល់មន្ត្រីជាប់កិច្ចសន្យា អត្តសញ្ញាណប័ណ្ណសញ្ជាតិខ្មែរ ឬ ឯកសារដែលប្រើប្រាស់ក្នុងការចាក់វ៉ាក់សាំងដូសទី១ សៀវភៅគ្រួសារ ឬ សៀវភៅស្នាក់នៅ ឬ សំបុត្រអាពាហ៍ពិពាហ៍។

គួរបញ្ជាក់ថា រដ្ឋាភិបាលបានចាប់ផ្តល់ចាក់វ៉ាក់សាំងដូសទី៣ ឬដូសជំរុញនៅថ្ងៃទី០៨ ខែសីហាឆ្នាំ២០២១ ទៅលើក្រុមគោលដៅប្រឈមមុខខ្ពស់នឹងជំងឺកូវីដ-១៩ ពិសេសនៅតាមបណ្តាខេត្តជាប់ព្រំដែនកម្ពុជាថៃហើយរហូតមកដល់ថ្ងៃទី០៦ ខែកញ្ញានេះមានអ្នកចាក់បានចំនួន ៦៨០,៣៥៣នាក់៕

អត្ថបទ៖ សំអឿន