ព័ត៌មានជាតិ

ដុតបំផ្លាញឱសថបំប៉នសុខភាពជាង១តោន គ្មានលេខបញ្ជិកាពីក្រសួងសុខាភិបាល

បានផុស

៣ years មុន

នៅ

ថ្ងៃអង្គារ ៧ កញ្ញា ២០២១

ដោយ

មន្ត្រីជំនាញសុខាភិបាលខេត្តសៀមរាបនិយាយថា ការដុតបំផ្លាញឱសថបំប៉នសុខភាពដែលពុំមានការឆ្លងកាត់ការត្រួតពិនិត្យរបស់ក្រសួងសុខាភិបាលប្រមាណជាង១តោនមានការយឺតយ៉ាវក៏ពិតមែន តែគឺវាបានទប់ស្កាត់ហានីភ័យសុខភាពនៃអ្នកប្រើប្រាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឱសថបំប៉នសុខភាព ដែលមិនមានចុះបញ្ជិកាដោយក្រសួងសុខាភិបាលប្រមាណជាង១តោន ត្រូវបានដុតបំផ្លាញចោល ក្នុងបរិវេណនៃទីលានចោលសំរាមរបស់ក្រុមហ៊ុនឯកជនមួយ នៅភូមិអន្លង់ពីរ ឃុំត្រពាំងធំ ស្រុកប្រាសាទបាគង ឬអាចនិយាយបានថា ទីកន្លែងដុតឱសថបំប៉ននេះត្រូវបានធ្វើឡើងលើទីតាំងដែលនៅឆ្ងាយពីក្រុងសៀមរាប។

ការដុតបំផ្លាញនេះ ត្រូវបានធ្វើឡើងនាព្រឹកថ្ងៃទី០៧ ខែកញ្ញា ឆ្នាំ២០២១ តាមចំណារឯកភាពរបស់ក្រសួងសុខាភិបាល និងទទួលបានការអនុញ្ញាតដោយរដ្ឋបាលខេត្តផងដែរ។ មន្ត្រីជំនាញនៃមន្ទីរសុខាភិបាលខេត្តសៀមរាប មន្ត្រីមកពីបណ្តាអង្គភាពជំនាញពាក់ព័ន្ធផ្សេងទៀត រួមទាំងមន្ត្រីនៃកងកម្លាំងសមត្ថកិច្ចដែលជាដៃគូសហការក៏មានវត្តមានក្នុងពិធីដុតកម្ទេចនេះដែរ។

លោកស្រី លី វណ្ណៈ ប្រធានការិយាល័យនិយ័តកម្ម នៃមន្ទីរសុខាភិបាលខេត្តសៀមរាប បញ្ជាក់ឲ្យដឹងថា កម្លាំងនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្ត បានរួមសហការអនុវត្តតាមបញ្ជារបស់ព្រះរាជអាជ្ញា ក្នុងការចាប់យកវត្ថុតាងទាំងនោះ។ ឱសថទាំងនេះផលិតនៅសហរដ្ឋអាមេរិក និងដឹកជញ្ជូនតាមជើងយន្តហោះ។ ក្រោយការចាប់បានវត្ថុតាង អង្គភាពប៉ូលីសបានប្រគល់ឲ្យជំនាញសុខាភិបាលផាកពិន័យអន្តរកាលតាមច្បាប់គ្រប់គ្រងឱសថ និងស្របតាមទម្ងន់សាលក្រមព្រហ្មទណ្ឌលេខ(៦០) របស់សាលាដំបូងខេត្តសៀមរាប។

នៅក្នុងដីកាបញ្ជូនរបស់សាលាដំបូងខេត្តសៀមរាប សំណុំរឿងព្រហ្មទណ្ឌលេខ៥៩០ ចុះថ្ងៃទី៣១ ខែឧសភា ឆ្នាំ២០១៦ ជូនមកប្រធានមន្ទីរសុខាភិបាលខេត្តសៀមរាប បានវិនិច្ឆ័យសេចក្តីថា គឺត្រូវបានរឹបអូសទំនិញចម្រុះ ( អាហារបំប៉ន ម្សៅក្រែម ស្កគ្រាប់ និងនំ ) មានចំនួន៧០មុខ ស្មើនឹងជាង១លាន២សែនគ្រាប់ ទម្ងន់១តោន ៣០០គីឡូក្រាម ដែលនាំចូលដោយគ្មានការអនុញ្ញាតិដោយសួងសុខាភិបាលកាលពីថ្ងៃទី២៤ ខែមិនា ឆ្នាំ២០១៦ នៅចំណុចភូមិគោកដូង សង្កាត់ទឹកវិល ក្រុងសៀមរាប។

វត្ថុចាប់យកទាំងនេះ ត្រូវបានរក្សាទុកនៅមន្ទីរសុខាភិបាលខេត្តសៀមរាប ហើយសាលក្រមជំនុំជម្រះនេះ ប្រកាសជាសាធារណៈកំបាំងមុខជនជាប់ចោទ នឹងត្រូវបានទុកសិទ្ធិប្តឹងទាស់ និងប្តឹងឧទ្ធរណ៍តាមកំណត់ច្បាប់។

យ៉ាងណាក៏ដោយ មន្ត្រីជំនាញបានទទួលស្គាល់ដែរថា វាពិតជាមានការយឺតយូរបន្តិច ចំពោះចំណាត់ការដុតនេះ ក៏ប៉ុន្តែយ៉ាងហោចណាស់ វាបានទប់ស្កាត់ទាន់ពេលវេលាការធ្វើចរាចរណ៍ឱសថទាំងនេះលើទីផ្សារ ដែលវាមិនប្រាកដថា គុណភាពរបស់វាយ៉ាងដូចម្តេច? ឬក៏ថា វាអាចបង្កគ្រោះថ្នាក់សុខភាពដល់អ្នកប្រើប្រាស់យ៉ាងណានោះទេ បើសិនជាឱសថទាំងនោះវាបានធ្លាយទៅដល់ដៃអតិថិជនរបស់គេនោះ៕

អត្ថបទ៖ គឿនវេត

Related Topics:ផលិតផលក្លែងក្លាយ